Bakı, 9 yanvar, AZƏRTAC

“Azərreyl”in rumıniyalı voleybolçusu Anamaria Berdila AZƏRTAC-ın suallarını cavablandırıb. Həmin müsahibəni təqdim edirik.

- İlk dəfədir ki, legioner həyatı yaşayırsınız. Necə düşünürsünüz, Azərbaycan və Rumıniya voleybolu arasında nə kimi fərqlər var?

- Azərbaycana gələnə qədər Rumıniyadan başqa ölkədə oynamamışdım. Onu deyə bilərəm ki, "Azərreyl"də oynamağın üstünlükləri daha çoxdur. Çünki burada bir voleybolçu üçün hər cür şərait yaradılıb. Peşəkar oyunçulardan ibarət kollektivimiz var və onlar yüksək səviyyəli oyun nümayiş etdirirlər. Klub daxilində hər kəs öz işini görür. Xüsusilə baş məşqçi voleybolçularla yaxından məşğul olur və faydalı məşqlər keçir. Rumıniya klubunda isə bu proses bir qədər qarışıqdır. Həmçinin Azərbaycanda insanlar istiqanlıdır. Burada voleybolçu kimi çox sevildiyimi hiss edirəm.

- Bəs, iki ölkənin liqalarını necə müqayisə edərdiniz?

- Əslində əvvəllər Azərbaycan çempionatını izləmirdim. Amma güclü klublardan təşkil olunan çempionat olduğunu eşitmişdim. Rumıniya isə bu sahədə daha çox inkişaf edib. Çempionatda çox güclü legionerlər çıxış edir. Rumıniyanın yüksək liqasında 12 qadın və 12 kişi komandası var. Azərbaycanda isə bu say cəmi 6-dır. Burada çempionatın səviyyəsi yüksək olmasa da, inkişaf hiss olunur. Klublar ölkə xaricindən legionerləri cəlb etməyə cəhd göstərirlər. 2024-cü il üçün isə gözləntilər daha böyükdür. Komanda olaraq bizim də məqsədlərimiz var.

- Voleybol üzrə Azərbaycan çempionatının Rumıniya ilə müqayisədə bir qədər zəif olduğunu qeyd etdiniz. Bu mənada “Azərreyl”ə keçdikdən sonra peşmanlıq hissi yaşamadınız?

- Xeyr, mən bu kluba tam istəklə gəldim. Burada gözlədiyimdən daha yaxşı şəraitlə qarşılaşdım. Baş məşqçim, onun köməkçisi və komanda yoldaşlarım məni isti qarşıladılar. Onlarla birlikdə çox vaxt keçirirəm. Mükəmməl ünsiyyətimiz var və mənə hər zaman müsbət enerji verirlər. Ona görə də onlarla işləməkdən zövq alıram. “Azərreyl”ə keçdiyim üçün heç vaxt peşman olmamışam. Çünki bu, hər şeydən öncə mənim üçün təcrübədir. Ölkə xaricində oynamağın necə hiss olduğunu anladım. Düşünürəm ki, bu hissi bütün idmançılar yaşamalıdır.

- Bura gələnədək Azərbaycanda çıxış edən qadın voleybolçulardan kimləri tanıyırdınız?

- Polina Rəhimova, Odina Əliyeva və Yelizaveta Rubanı tanıyırdım. Sonuncu hazırda Rumıniya çempionatında oynayır. “Milli Aviasiya Akademiyası”nın bir neçə oyunçusunu isə üzdən tanıyırdım, ancaq adlarını bilmirdim.

- Bəs, Yüksək Liqada hansı voleybolçuların oyun üslubunu daha çox xoşlayırsınız?

- Bütün voleybolçularla münasibətim əladır. “Abşeron” və “Milli Aviasiya Akademiyası”nda çıxış edən oyunçularla dostluq əlaqələrim var. Amma sözsüz ki, öz klubumdan birini seçməyə üstünlük verirəm. Həm enerjisinə, həm potensialına, həm də peşəkarlığına görə dominikanlı Xineyri Martinesin adını çəkə bilərəm. Onunla oynayanda enerjimin və voleybol bacarıqlarımın artdığını hiss edirəm. Mənə mənəvi cəhətdən də yaxşı təsir göstərir. Martineslə oynamaq mənim üçün şərəfdir. Enerjisi yüksək voleybolçuların olduğu klubun nailiyyətləri də getdikcə artır və bunun sayəsində ortaya yaxşı nəticələr çıxır. Uğurlarımızın davamını gətirmək niyyətindəyik. Klubumuzdan Aişə Alismanovanın da oyununu çox bəyənirəm. O, böyük potensiala malikdir. Öz üzərində çox çalışır. İntizamlı və təshillidir. Sevindirici haldır ki, gənc nəsildə idmana, xüsusilə də voleybola qarşı böyük sevgi var. Ümumiyyətlə, Cengiz Akarçeşmə kimi baş məşqçimiz olduğu üçün çox şanslıyıq. Çünki o, bizim daha yaxşı voleybolçu olmağımıza yaxından kömək edir.

- “Azərreyl”ə keçidinizdən öncə Azərbaycan haqqında məlumatınız var idi?

- Açığı, məlumatım yox idi. Amma internetdə həm ölkə, həm də onun mədəniyyəti və adət-ənənələrini araşdırdım. Çünki məlumatlı olmağı sevirəm. Həmçinin kitablardan da ölkə haqqında məlumat əldə etdim. Azərbaycan sözünün mənasını öyrəndim və paytaxt şəhər Bakı haqqında ətraflı məlumat topladım. Burada mehriban və istiqanlı insanlarla tanış oldum. Onlarla söhbət etdikcə, məndə bu ölkənin insanlarına qarşı hörmət yarandı. Mən də öz növbəmdə ölkəmi, ailəmi və adət-ənənələrimizi Azərbaycanda yaxşı təmsil etməyə çalışıram.

- Ölkə çempionatında əsas rəqibiniz “Abşeron”dur. Çempionluq şanslarını necə dəyərləndirirsiniz?

- Voleybol gözlənilməz sürprizləri olan idman növüdür. Hazırkı hədəfimiz çempionluqdur. Düzdür, “Abşeron” çətin rəqibdir. Amma heç birimiz ilk oyunda bu kluba uduzacağımızı gözləmirdik. Buna baxmayaraq, səhvlərimizdən nəticə çıxara bilirik və hazırda yüksəlişdəyik. Səhv etməkdən qorxmaq lazım deyil, çünki çox şey öyrənirik və özümüzü inkişaf etdiririk. Bu gün yeni ildə ilk oyunumuza çıxacağıq. Oyuna tam hazırıq. Özümə və komandama güvənirəm. Qış fasiləsində çox çalışdıq. Ümid edirəm ki, nəticə ürəkaçan olacaq.

- “Azərreyl” Çağırış Kubokunda evdə İspaniyanın "Avarka de Menorka" klubuna qalib gəlsə də, səfərdə uduzaraq mübarizəni erkən dayandırdı. Bakıda əldə etdiyiniz üstünlüyü qoruya bilməməyinizin əsas səbəbi nə oldu?

- Bu, karyeram ərzində ən ağır məğlubiyyət oldu. İspaniya klubunun voleybolçuları cavab oyununa böyük motivasiya və inamla çıxmışdılar. Belədə onların şansı bizdən daha çox idi. Bu amil yekun nəticəyə təsir göstərdi. Bir sözlə, onlar öz enerjiləri ilə bizi məğlub etdilər. Oyun baxımından biz üstün idik. Amma voleybol elə idman növüdür ki, burada bacarıq kifayət etmir. Bəzi məqamlarda çətinlik yaşadıq və rəqib zəif nöqtələrimizi taparaq bizi üstələdi. Bəzən nə qədər çalışsan da, mental olaraq yaxşı deyilsənsə, məğlub olursan. Müsbət nəticə üçün məşqlər və psixoloji durum qaydasında olmalıdır. Düzdür, biz Bakıda böyük hünər və cəsarətlə oynadıq. İspaniyada uduzanda hamımız depressiyaya düşdük.

- Klubunuzun kapitanı Aynur İmanova legionerlərin Bakını yaxşı tanıdığını bildirib. Hansı görməli yerləri gəzmisiniz?

- Buraya gəldiyim ilk həftə çox həyəcanlı idim. Şəhərə çıxıb doyunca gəzdim və bir çox yerləri kəşf etmək imkanım oldu. Mükəmməl görünüşə malik şəhəriniz var. Ümumiyyətlə, Bakının mərkəzində maraqlı yerlər çoxdur. Onlardan biri də qəhvə içmək üçün olan məkanlardır. Bu içkini çox sevdiyim üçün burada ilk növbədə belə yerlər axtarıb tapdım. Həmçinin Xəzər dənizinin sahilində çox yaxşı vaxt keçirirəm. Musiqi dinləyərək dənizkənarı parkda yürüş etməkdən zövq alıram. Qədim tarixə malik İçərişəhəri də gəzmişəm, çox gözəldir. Lakin mən insanın sıx olduğu yerləri daha çox xoşlayıram. İstəyirəm ki, getdiyim məkanda yüksək enerjili insanlar, əsasən də musiqi olsun.

- Azərbaycan mətbəxindən ən sevdiyiniz yeməklər hansıdır?

- Əslində, yeməklərin çoxunu hələ dadmamışam. Bir çox ölkənin mətbəxinə bələdəm. Azərbaycan paxlavasını çox sevirəm. Sizin mətbəxiniz Türkiyə mətbəxi ilə çox oxşardır. Sadəcə, spesifik yeməklərin adlarını çəkə bilərəm. Bunlardan biri də kababdır. Çox dadlı olur. Buradakı bəzi yeməklərin dadına baxdıqdan sonra qərar verdim ki, siz bu işdə çox yaxşısınız. Azərbaycan mətbəxi tərifəlayiqdir.

- Ailəniz və ya dostlarınız Azərbaycan haqqında soruşanda, onlara nə deyirsiniz?

- Mənə tez-tez zəng edirlər. Burada baş verən son dəyişikliklər haqqında soruşurlar. Hətta onları Bakıya gəlməyə məcbur edirəm. Çünki bura doğrudan da çox gözəldir. Bəlkə də Bakının adı bir çox insanın səyahət siyahısında yoxdur, amma onlar mütləq bu şəhəri görməlidirlər. Çünki burada dadlı yeməklər, istiqanlı insanlar və gözəl atmosfer var. Buna görə də Rumıniyadakı tanışlarım Bakıya, mənim yanıma gəlməkdə maraqlıdırlar.

- “Azərreyl”lə müqaviləniz bu mövsümün sonuna kimidir. Təklif olsa, sözləşmənin müddətini uzatmaq istərdiniz?

- Gələn təkliflərlə ilk növbədə menecerim maraqlanır. Bu klubla əməkdaşlığımın davam edib-etməyəcəyimi dəqiq bilmirəm. Amma mən buradan getmək istəmirəm. Hətta başqa komandalardan təklif alsam belə, heç vaxt pulu düşünmərəm. Düzdür, hər bir idmançının yüksək maaşa ehtiyacı var. Ancaq mənəvi cəhətdən özümü harada yaxşı hiss edirəmsə, elə orada da qalmaq istəyirəm. Çünki xoşbəxtliyi pulla ala bilmərəm.