Aprelin 11-də Bakı Biznes Universitetində (BBU) bu ali məktəbin yaranmasının 15 illik yubileyinə həsr olunmuş geniş tədbir keçirilmişdir.

Tədbirin əvvəlində Azərbaycan Respublikasının dövlət himni səslənmişdir.

AZƏRTAC xəbər verir ki, tanınmış alim və pedaqoqların, ayrı-ayrı ali məktəb rəhbərlərinin, Milli Məclis deputatlarının, tələbələrin iştirak etdikləri tədbirdə Bakı Biznes Universitetinin təsisçisi və rektoru, professor İbad Abbasov ulu öndərimiz, dünya şöhrətli siyasi xadim Heydər Əliyevin elm və təhsilimizin inkişafına daim böyük önəm verdiyini, ümummilli liderimizin siyasi xəttinin Prezident İlham Əliyev tərəfindən uğurla davam etdirildiyini bildirmişdir.

Rektor dövlətimizin başçısı İlham Əliyevin təhsilimizlə bağlı imzaladığı fərman və sərəncamların əhəmiyyətini vurğulamışdır.

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təhsilimizə xüsusi diqqət göstərdiyini qeyd edən rektor, onun təşəbbüsü ilə son illərdə ölkəmizdə müasir tələblərə cavab verən çoxlu sayda məktəb binalarının inşa edildiyini nəzərə çarpdırmışdır.

Sonra 1993-cü ildə yaradılan Bakı Biznes Universitetinin fəaliyyəti, inkişaf yolu barədə ətraflı məlumat verilmişdir.

Respublikamızın özəl ali təhsil sistemində özünəməxsus yeri olan Bakı Biznes Universitetinin bakalavr və magistr pillələrində 12 ixtisas (“Biznesin təşkili və idarəedilməsi”, “Mühasibat uçotu və audit”, “Beynəlxalq iqtisadi münasibətlər”, “Maliyyə və kredit” və s.) üzrə mütəxəssislər hazırlanır.

Ötən 15 il ərzində universitetdə bakalavr hazırlığı üzrə 11, magistr hazırlığı üzrə isə 7 buraxılış olmuş, 14 doktorluq, 21 namizədlik dissertasiyası müdafiə edilmişdir.

Müasir tipli tədris korpusları olan BBU-da tədrisin yüksək səviyyədə təşkili üçün bütün lazımi şərait yaradılmışdır. Universitetdə “Heydər Əliyev dövlət idarəçiliyi məktəbi” fəaliyyət göstərir. Bundan əlavə, təhsil müəssisəsində 45 min nüsxəyə yaxın müxtəlif adda ədəbiyyatı olan kitabxana, linqafon kabinetləri, televiziya-tədris otağı, idman zalı və s. müəllim və tələbələrin istifadəsinə verilmişdir. Universitetdə Bolonya prosesinə uyğun olaraq bütün kurslarda kredit sistemi tətbiq edilmiş və tələbələrin biliyinin qiymətləndirilməsi 100 ballı sistem üzrə aparılır. Professor–müəllim kollektivinin yaradıcı əməyi nəticəsində yüzlərlə dərslik, dərs vəsaiti, monoqrafiya, proqram və s. işlənib nəşr olunmuşdur.

Bakı Biznes Universiteti xarici ölkələrin bir sıra tanınmış ali təhsil müəssisələri, o cümlədən ABŞ-ın Ayova Beynəlxalq Biznes Universiteti, Moskva Sahibkarlıq Akademiyası, Sankt–Peterburq Maliyyə - İqtisad Universiteti, Türkiyənin İsparta Universiteti ilə əməkdaşlıq əlaqələri qurmuşdur.

Yubileyə bir sıra ölkələrin ali məktəblərindən təbrik məktubları göndərilmişdir.

Tədbirdə çıxış edən Qazaxıstanın Bakıdakı səfiri Serik Primbetov xalqlarımızın dostluq münasibətlərindən danışmışdır. Ölkələrimiz arasında təhsil əlaqələrinin əhəmiyyətini qeyd edən səfir, bu sahədə əməkdaşlığın genişləndirilməsinin vacibliyini söyləmişdir.

Təhsil nazirinin müavini İradə Hüseynova, AMEA-nın müxbir üzvləri Ağasəlim Ələsgərov, Şahbaz Muradov, Yeni Azərbaycan Partiyası Yasamal rayon təşkilatının sədri Fikrət İsmayılov, Bakı Metropoliteninin rəisi Tağı Əhmədov, Yasamal Rayon İcra Hakimiyyətinin başçısı İbrahim Mehdiyev, Dövlət Sosial Müdafiə Fondunun sədri Səlim Müslümov və digər natiqlər də ümummilli liderimiz Heydər Əliyevin ölkədə təhsilin inkişafına göstərdiyi qayğıdan, ulu öndərin siyasi kursunun layiqli davamçısı Prezident İlham Əliyevin bu sahəyə böyük önəm verməsindən bəhs etmişlər.

Yüksək ixtisaslı kadrların hazırlanmasında BBU-nun rolunu yüksək dəyərləndirən natiqlər, əlamətdar gün münasibətilə müəllim və tələbələri təbrik etmiş, onlara yeni nailiyyətlər arzulamışlar.

Universitetin elmi və pedaqoji fəaliyyəti ilə fərqlənən müəllimlərinə Təhsil Nazirliyinin fəxri fərmanları təqdim edilmişdir.

######