Bakı, 6 iyun, AZƏRTAC

İyunun 6-da Bakıda Azərbaycan Respublikası Kənd Təsərrüfatı Nazirliyi və Avropa İttifaqının birgə təşkilatçılığı ilə 3-cü Donor Əlaqələndirmə Görüşü keçirilib.

AZƏRTAC xəbər verir ki, 20-dən çox beynəlxalq təşkilat və birlik təmsilçilərinin, xarici ölkə diplomatlarının, qeyri-hökumət təşkilatları nümayəndələrinin qatıldığı tədbirin keçirilməsində məqsəd kənd təsərrüfatı sahəsində Azərbaycanda icrası davam edən layihələrin gedişinə diqqət ayırmaq, aqrar sahədə mövcud trendləri müzakirə etmək, gələcək əməkdaşlıqların istiqamətini müəyyənləşdirmək olub.

Kənd təsərrüfatı naziri Heydər Əsədov çıxış edərək, dövlətimizin başçısının aqrar sahəyə göstərdiyi diqqət və qayğıdan danışıb, həyata keçirilən institutsional islahatlar, aqrar sektorda baş verən köklü dəyişikliklər, fermerlərə güzəştli kreditlərin verilməsi, elektron hökumətin yaradılması ilə əlaqədar görülən işlərlə bağlı geniş məlumat verib.

Beynəlxalq donor təşkilatlarla birgə icra olunan layihələrdən də danışan nazir deyib ki, bu layihələr çərçivəsində heyvandarlığın və bitkiçiliyin inkişafı, insan və heyvan sağlamlığı üçün xəstəliklərlə mübarizə, bitki örtüyünün mühafizəsi, aqrar sahədə ixtisaslı kadrların yetişdirilməsində beynəlxalq təcrübədən yararlanma, kənd yerləri infrastrukturunun inkişaf etdirilməsi ilə aqrar sahədə çalışanların fəaliyyətinin asanlaşdırılması, icmayönümlü gəlir gətirən layihələrin hazırlanıb həyata keçirilməsi kimi kənd təsərrüfatının inkişafına dəstək olan mühüm addımlar atılıb.

Son 2 ildə Azərbaycana 7 min 400 ədəddən artıq müxtəlif növ kənd təsərrüfatı texnikası alınıb gətirildiyini deyən H.Əsədov bildirib ki, alınan kənd təsərrüfatı texnikasının dəyərinin 40 faizinin ödənməsi ilə bağlı qərardan sonra bu istiqamətdə 60 milyon manatdan çox vəsait ayrılıb. Eyni zamanda, süni mayalama ilə doğulan hər bir buzova görə sahibkara 100 manat subsidiya verilməsi qərara alınıb. Artıq payız aylarında ödəmələrə başlanılacaq. Görülən işlərin səmərəliliyini artırmaq məqsədilə Süni Mayalama Mərkəzi yaradılıb və bir neçə aydan sonra istifadəyə veriləcək.

"Azərbaycanda baramaçılığa dövlət tərəfindən subsidiyaların ayrılması təklif edilir. Kənd Təsərrüfatı Nazirliyi bununla bağlı təkliflər hazırlayaraq hökumətə təqdim edib. Baramaçılıqda subsidiya son məhsula veriləcək. Bu təcrübə xarici ölkələrdə də bu şəkildə həyata keçirilir. Hər kiloqrama görə təxminən 2 manat həddində subsidiya verilməsi nəzərdə tutulub", - deyə nazir vurğulayıb.

Heydər Əsədov deyib: “Toxumçuluğun idarə olunması, subsidiyanın son məhsula görə verilməsi prinsipini tətbiq etməyi düşünürük və yaxın 1-2 həftə ərzində bu mexanizm hökumətə təqdim olunacaq. Digər kənd təsərrüfatı sahələrində isə subsidiya torpağın hektarı üzrə verilir və bu sahədə elektron uçot yaxşılaşdırılacaq".

Avropa İttifaqının Azərbaycandakı nümayəndəliyinin rəhbəri Malena Mard Avropa İttifaqı ilə Kənd Təsərrüfatı Nazirliyi arasında uzunmüddətli tərəfdaşlığın mövcud olduğunu bildirib. Qeyd edib ki, biz daha sıx şəkildə əməkdaşlıq etməyə çalışırıq. Malena Mard ərzaq və qida təhlükəsizliyi, kənd yerlərinin inkişafı proqramlarının gələcəkdə də davam edtiriləcəyini diqqətə çatdırıb.

Fransanın Azərbaycandakı səfiri Orelia Buşez bildirib ki, Fransa İnkişaf Agentliyi Azərbaycanın nəqliyyat sahəsinə 112,5 milyon avro həcmində yardım ayırıb: “Biz kənd təsərrüfatı sahəsinə də, - əgər bu sahələrdəki layihələr buna əsas verərsə, - bu məbləğə yaxın, hətta daha artıq miqdarda yardım ayırmağa hazırıq”. Səfir deyib ki, Fransa İnkişaf Agentliyi Asiya İnkişaf Bankı, Dünya Bankı və Avropa İttifaqı ilə əməkdaşlıq edir. Kənd təsərrüfatı sahəsi ən ümidverici sahədir. Fransa kənd təsərrüfatı sektorunda, xüsusən də baytarlıq sahəsindəki təcrübəsini Azərbaycana gətirir. Heyvanların sağlamlığı önəmli məsələlərdəndir. Biz Avropa İttifaqının müvafiq yardım alətləri vasitəsilə Azərbaycana kömək edirik. Ölkənizdə kənd təsərrüfatı sahəsində ixtisaslı kadrların yetişdirilməsində də kömək etməyə hazırıq.

FAO-nun Azərbaycandakı tərəfdaşlıq və əlaqələndirmə ofisinin rəhbəri Mələk Çakmak deyib ki, təmsil etdiyi təşkilat Azərbaycanda bir sıra layihələr həyata keçirir. Bunların arasında toxumçuluq sektorunun inkişafı ən başlıca layihələrdəndir. Biz, eyni zamanda, Dünya Bankı ilə də əlaqəli işləyirik. M.Çakmak qida məhsullarının təhlükəsizliyi baxımından fitosanitar sektorun təkmilləşdirilməsinin nəzərdə tutulduğunu diqqətə çatdırıb.

Dünya Bankı ilə Azərbaycan arasında uğurlu əməkdaşlığın həyata keçirildiyini deyən Dünya Bankının Azərbaycan üzrə meneceri Larisa Leşşenko bu əlaqələrin bundan sonra da davam etdiriləcəyini vurğulayıb. L.Leşşenko biznes mühitinin daha da yaxşılaşdırılması, birgə bir sıra layihələrin həyata keçirilməsi üçün əməkdaşlığın genişləndirilməsinin zəruriliyini bildirib.

Tədbirdə kənd təsərrüfatı sahəsində ölkədə yaranmış yeni imkanlar, qanunvericilik məsələləri, aqrar sahəyə dövlət dəstəyi, qarşıya qoyulan hədəflər, aqrar sahənin inkişaf istiqamətləri və prioritetləri müzakirə olunub.