AZƏRTAC xəbər verir ki, iyunun 3-də Heydər Əliyev adına İdman-Konsert Kompleksində XV Beynəlxalq Xəzər neft, qaz, neftayırma, neft kimyası sərgi və konfransı işə başlamışdır.

Azərbaycan Prezidenti İlham Əliyev açılış mərasimində iştirak etmişdir.

Yubiley sərgi və konfransını açan İTE Group Plc şirkətinin baş məsləhətçisi Endryu Vud Prezident İlham Əliyevi, sərgi və konfransın iştirakçılarını salamladı. Azərbaycanda sabitlik və inkişafın hökm sürdüyünü vurğulayan Endryu Vud bildirdi ki, bütün bunların təməlində ümummilli lider Heydər Əliyevin uzaqgörən siyasəti dayanır. Həmin siyasət bu gün Prezident İlham Əliyev tərəfindən uğurla davam etdirilir.

Sonra çıxış edən Azərbaycan Ticarət və Sənaye Palatasının prezidenti Süleyman Tatlıyev dedi ki, XV Beynəlxalq Xəzər neft, qaz, neftayırma, neft kimyası sərgi və konfransı təməli ulu öndər Heydər Əliyev tərəfindən qoyulmuş Azərbaycanın neft strategiyasının uğurla həyata keçirilməsinin bariz təcəssümüdür. İlk vaxtdan Xəzər regionunun ən vacib hadisəsi kimi qəbul edilən sərgi və konfrans regionun ən aktual mövzularını əhatə edən beynəlxalq foruma çevrilmişdir.

Prezident İlham Əliyev açılış mərasimində nitq söylədi.

 

Mərasimdə çıxış edən ABŞ Prezidentinin Avrasiya enerji məsələləri üzrə xüsusi nümayəndəsi Boyden Qrey dedi ki, iki ölkə arasında enerji sahəsində tərəfdaşlıq yeni Şərq-Qərb enerji dəhlizinin yaranması - Bakı- Tbilisi-Ceyhan neft kəməri və Cənubi Qafqaz qaz kəməri vasitəsilə həyata vəsiqə almışdır. Xəzər enerji daşıyıcılarını dünya bazarına çıxaran bu iki kəmərin işə düşməsi müstəqil Azərbaycanın enerji sahəsindəki uğurlu inkişafının bariz nümunəsidir. Hazırda Azərbaycanın Orta Asiya ölkələri ilə birlikdə Avropanın mühüm qaz təchizatçısına çevrilməsi üçün böyük potensialı var.

Boyden Qrey sərginin açılışı münasibətilə ABŞ Prezidenti Corc Buşun Azərbaycan Prezidenti İlham Əliyevə təbrikini oxudu.

Azərbaycanın regionda lider dölətə çevrildiyini vurğulayan Böyük Britaniyanın ticarət və investisiyalar naziri lord Cons Diqbi bildirdi ki, onun ölkəsi Azərbaycanla əməkdaşlığın daha da inkişafında maraqlıdır. Lord Cons Böyük Britaniyanın Baş naziri Qordon Braunun təbrik məktubunu oxudu.

Azərbaycanın neft sektorunun uğurla inkişaf etdiyini deyən İsrailin milli infrastruktur naziri Binyamin Ben-Eliezer Azərbaycanın həm regionda, həm də dünya miqyasında enerji təhlükəsizliyinin əsas təminatçılarından birinə çevrildiyini vurğuladı. Azərbaycanın öz enerji ehtiyatlarının dünya bazarına çıxarılmasındakı uğurlarını və iqtisadi inkişafını yüksək qiymətləndirən İsrail naziri dedi ki, hər il Bakıda keçirilən beynəlxalq Xəzər neft, qaz, sərgi və konfransın hasilatçı və istehlakçı ölkələr arasında əməkdaşlığın dərinləşdirilməsində xüsusi əhəmiyyəti vardır.

Gürcüstanın energetika naziri Aleksandr Xetaquri çıxışında dedi ki, Azərbaycan, Gürcüstan və Türkiyə Avropa ilə Asiya arasında enerji körpüsü rolunu oynamaq və Avropanın sabit enerji təminatına öz töfhəsini vermək imkanına malikdirlər. Artıq real faktdır ki, Azərbaycan nefti və qazı Gürcüstan və Türkiyə ərazisindən keçərək, Avropa ölkələrinə nəql olunur. Bu layihələrin reallaşması Avropa üşün enerji təchizatının alternativ mənbəyi olmaqla yanaşı, regionun təhlükəsizliyinin də təminatıdır.

“On beş ildir Azərbaycan çox mühüm bir tədbir keçirir. Bununla Azərbaycan neft və qazın hasilatı, onların müasir texnologiyalar vasitəsilə dərindən emal edilməsi sahəsində mövcud olan böyük imkanlarını nümayiş etdirir”- deyən Bolqarıstanın iqtisadiyyat və energetika naziri Petr Dimitrov vurğuladı ki, bu sərgi və konfrans yeni əlaqələrin qurulması və əməkdaşlığın inkişafı üçün əlavə imkanlar yaradır.

Türkiyənin energetika və təbii ehtiyatlar nazirinin müavini Yusif Yazar Bakıda on beşinci dəfə keçirilən beynəlxalq neft, qaz, sərgi və konfransını Xəzər hövzəsində bu sahədə təşkil edilən ən böyük tədbir kimi qiymətləndirdi. O dedi ki, 1994-cü ildən bəri 30 milyard dollardan artıq xarici investisiyanın cəlb olunduğu Azərbaycanın regiondakı rolu Bakı-Tbilisi-Ceyhan neft və Cənubi Qafqaz qaz kəmərlərinin işə düşməsi ilə daha da möhkəmləndi və Azərbaycan Avropanın enerji təhlükəsizliyi məsələsində əvəzedilməz bir yerə sahib oldu.

İranın neft və enerji nazirinin müavini İlqar Şirazi sərgi və konfransın əhəmiyyətini vurğuladı. Müstəqil Azərbaycanın enerji sahəsindəki inkişafından danışan qonaq dedi ki, bu uğurlar sübut edir ki, Xəzər neft və qaz sərgisi hələ uzun illər iştirak edəcəyimiz bir tədbir olacaqdır.

Norveçin dövlət katibi, neft sənayesi və energetika nazirinin müavini xanım Liv Monika Stabholdt Azərbaycanın istər regional baxımdan, istərsə də iqtisadi potensialına görə çox önəmli bir ölkə olduğunu vurğuladı. Beynəlxalq Xəzər neft və qaz sərgisinin qlobal neft sənayesində kifayət qədər əhəmiyyətli bir hadisəyə çevrildiyini deyən qonaq müxtəlif sahələrin nümayəndələrinin bir araya gəlməsi üçün bu tədbirin yaxşı imkanlar yaratdığını bildirdi.

Açılış mərasimindən sonra Prezident İlham Əliyev sərginin pavilyonları ilə tanış oldu. Təməli “Əsrin müqaviləsi” ilə eyni vaxtda - 1994-cü ildə qoyulan sərgidə 15 il ərzində dünyanın 70-dən artıq ölkəsindən 5000-dən çox şirkət iştirak etmişdir. Yubiley Xəzər neft və qaz sərgisində isə dünyanın 30-dan çox ölkəsindən təxminən 400 şirkət təmsil olunmuşdur. Onların 30 faizi yerli şirkətlərdir. Bu il ekspozisiya sahəsi ötən ildəkindən 12 faiz çoxdur. Sərgidə kommersiya şirkətləri ilə yanaşı, Böyük Britaniya, Almaniya, Çin və Rusiyanın milli pavilyonları, Yaponiyanın Neft, Qaz və Metal Korporasiyasının, Gürcüstanın Neft-Qaz Korporasiyasının və Azərbaycanın müxtəlif dövlət strukturlarının ayrıca stendləri də vardır.

Sərgidə Qərbi Azəri platforması ilə birbaşa videoəlaqə yaradıldı.

Videoəlaqə zamanı Qərbi Azəri platformasının meneceri Prezident İlham Əliyevə orada işlərin gedişi barədə məlumat verdi.

Prezident İLHAM ƏLİYEV dəniz neftçilərinə müraciətlə dedi: “Sağ olun, mən sizi salamlayıram. Mən çox şadam ki, bu işlərdə Azərbaycan mütəxəssisləri fəal iştirak edirlər. Çox sevindiricidir ki, ən böyük səriştə, peşəkarlıq tələb edən işlərdə Azərbaycan mütəxəssisləri çalışırlar. Bu, bizim səviyyəmizi göstərir, peşəkarlıq səviyyəsini göstərir və gələcəkdə, əlbəttə ki, Azərbaycanın hərtərəfli inkişafında sizin kimi mütəxəssislər çox işlər görəcəklər. Mən sizə uğurlar arzulayıram. Ölkə üçün çox vacib işlər görürsünüz və sizin fəaliyyətiniz, eyni zamanda, bp ilə Azərbaycan arasında olan münasibətlərin nümunəsidir. Tərəfdaşlıq çox dəyərlidir, onun gözəl tarixi var və əminəm ki, gözəl də gələcəyi olacaqdır. Sizə uğurlar arzulayıram”.

Azərbaycan hazırda dünyada enerjidaşıyıcılarının hasilatı və nəqlinin tanınmış mərkəzlərindən biridir. Ölkə öz tələbatlarını tam həcmdə ödəməklə yanaşı, Avropanın enerji təhlükəsizliyində də mühüm rol oynayır. Şərqlə Qərbi birləşdirən enerji və nəqliyyat dəhlizində müstəsna rol oynayan Azərbaycan strateji tərəfdaşlığın, beynəlxalq inteqrasiyanın və enerji təhlükəsizliyinin həqiqi təminatçısıdır. Azərbaycan özünün əlverişli coğrafi mövqeyindən çıxış edərək, bir çox dövlətlər, dünyanın mühüm iqtisadi və maliyyə strukturları və şirkətləri ilə çox geniş istiqamətlərdə əməkdaşlıq edir. Hazırda Azərbaycanın geostrateji əhəmiyyəti təkcə zəngin neft-qaz hasilatçısı olmaqla bitmir. Azərbaycan həm də Mərkəzi Asiya regionunda hasil edilən enerji daşıyıcılarının dünya bazarlarına sabit nəqlini həyata keçirə bilən ən etibarlı tranzit ölkə sayılır. Ulu öndər Heydər Əliyevin inkişaf strategiyasını uğurla davam etdirən Prezident İlham Əliyevin həyata keçirdiyi iqtisadi siyasət dünya dövlətlərinin Azərbaycana marağını daha da artırmışdır. 15-ci ildir uğurla keçirilən beynəlxalq Xəzər neft-qaz sərgi və konfransı bunun daha bir nümunəsidir.

Prezident İlham Əliyev sərgi ilə tanışlıqdan sonra Fəxri qonaqlar kitabını imzaladı, dövlət başçısı sərgi-konfransın işinə uğurlar arzuladı.

######