ELM VƏ TƏHSİL
BDU “Erasmus+ DIRNA” layihəsinin növbəti təlimində təmsil olunub
Bakı, 19 mart, AZƏRTAC
Bakı Dövlət Universiteti (BDU) tərəfdaş olduğu Azərbaycanda İnstitusional Repozitoriyalar Şəbəkəsi vasitəsilə Tədqiqat Potensialının İnkişaf etdirilməsi (DIRNA) adlı “Erasmus+” layihəsi çərçivəsində İtaliyanın Akvila şəhərində keçirilən təlim proqramında təmsil olunub. Avropanın 3, ölkəmizin 8 ali təhsil müəssisəsinin nümayəndələrinin qatıldığı təlimdə BDU-nun Elmi kitabxanasının direktoru, layihənin BDU üzrə rəhbəri Nigar İsmayılova və kitabxananın şöbənin müdiri, layihənin meneceri Cəmilə Yusifova iştirak ediblər.
BDU-dan AZƏRTAC-a bildirilib ki, Degli Studi Dell’Aquila Universitetinin ev sahibliyi ilə keçirilən təlimin məqsədi Azərbaycanın layihədə tərəfdaş olan ali təhsil müəssisələrində tədqiqat nəticələrinin idarə edilməsinin təkmilləşdirilməsi, keyfiyyətli elmi tədqiqatlara, tədqiqat nəticələrinə açıq çıxışın dəstəklənməsi, hamıya əlçatan institusional repozitoriyalar (elektron arxivlər) şəbəkəsinin yaradılması üzrə İtaliya təcrübəsinin öyrənilməsi olub.
Təlimin ilk günü Degli Studi Dell’Aquila Universitetinin beynəlxalq əlaqələr üzrə rektor məsləhətçisi, professor Anna Tozzi universitetin beynəlxalq əlaqələri və layihələr, xüsusilə DIRNA layihəsinin reallaşması haqqında məlumat verib. Tədbirdə universitetin tanıtım çarxı təqdim edilib.
Səfər proqramı çərçivəsində Degli Studi Dell’Aquila Universitetinin Kitabxanasının rəhbərliyi və əməkdaşları tərəfindən UnivAQ kitabxana sistemi və xidmətləri, IRIS –İnstitusional Tədqiqat İnformasiya sisteminin işləmə mexanizmi, açıq giriş və “Horizon” Avropa beynəlxalq layihələri, açıq elmi bazalar, tədqiqat məlumatlarının idarə edilməsi kimi mühüm istiqamətlərdə təqdimatlar nümayiş edilib, müzakirələr və fikir mübadiləsi aparılıb. Nümayəndə heyəti, həmçinin universitetin “Humanitar” və “Mühəndislik” kitabxanalarını ziyarət edib, kitabxanaların infrastrukturu və iş prinsipi ilə yaxından tanış olublar. Təlim iştirakçıları sertifikatla təltif ediliblər.
DIRNA layihəsi çərçivəsində ötən ilin noyabr ayında İzmir Yüksək Texnologiya İnstitutunun Kitabxanasında təlim keçirilib. Həm İzmir Yüksək Texnologiya İnstitutunun Kitabxanasında, həm də Degli Studi Dell’Aquila Universitetinin Kitabxanasında keçirilən təlimlərdə iştirakla qazanılan təcrübə BDU-da institusional repozitoriyanın yaradılması işinə tətbiq ediləcək.
Layihə Avropa İttifaqı (Aİ) tərəfindən maliyyələşdirilir. Bununla belə, ifadə edilən fikirlər və mülahizələr yalnız müəllif(lər)ə aiddir, Aİ-nin və ya Avropa Təhsil və Mədəniyyət üzrə İcraçı Agentliyinin (EACEA) fikirlərini əks etdirmir. Aİ və EACEA onlara görə məsuliyyət daşımır.