Bakı, 30 aprel, AZƏRTAC

Bakı Dövlət Universitetində (BDU) Dövlət Məşğulluq Agentliyinin təşkilati dəstəyilə BDU-nun 105 illik yubileyinə həsr olunmuş Karyera Festivalının açılış mərasimi keçirilib.

Festivalda ölkəmizin nüfuzlu 105 şirkəti tərəfindən 1245 vakansiya, 98 təcrübə, 9 təqaüd proqramı təqdim olunur.

AZƏRTAC xəbər verir ki, tədbirdə çıxış edən BDU-nun rektoru Elçin Babayev bu təhsil ocağının 105 illik yubileyi münasibətilə ölkənin nüfuzlu 105 şirkətinin Karyera Festivalında təmsil olunduğunu bildirib: “Bu tədbir tələbələrin həyatında bir dönüş nöqtəsi, onlar üçün karyera quruculuğunda önəmli fürsətdir. Belə festivallar formal xarakter daşımır, çünki burada hər iki tərəf – həm sabahın məzunları, həm də işəgötürənlər qazanır. Hər bir ali təhsil müəssisəsinin fəxri onun məzunlarıdır. Festivalın tələbə və məzunlarımızın gələcək karyeralarında mühüm rol oynayacağına inanıram”.

Rektor quruculuq və yaradıcılıq işləri ilə məşğul olan qalib Azərbaycana lazım olan kadr potensialının formalaşdırılmasına birlikdə töhfə verməyin vacib olduğunu vurğulayıb.

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin İdarə Heyətinin sədri Mustafa Abbasbəyli Bakı Dövlət Universitetinin ölkənin ən böyük və nüfuzlu təhsil ocağı olduğunu deyib. O bildirib ki, Karyera Festivalı məzunların məşğulluğu, işlə təmin olunması baxımından önəmli tədbirlərdən biridir. Bu zaman işaxtaranlar ilə işəgötürənlər canlı ünsiyyət qururlar. Tələbələr və universitetlərlə olan işbirliyi güclənir, işəgötürənlər yeni kadr potensialı əldə edirlər.

M.Abbasbəyli Agentlik tərəfindən ötən ilin noyabrında “Məzunların məşğulluq reytinqi” platformasının tətbiq edildiyini, bununla ali təhsil müəssisələrinin məşğulluq imkanları haqqında məlumatlılığın təmin olunduğunu söyləyib.

Sonra iştirakçı şirkətlərin stendləri ilə tanışlıq olub. Sərgini izləyənlərə həmin şirkətlər haqqında ətraflı məlumat verilir.

İki gün davam edəcək festivalda müxtəlif mövzularda vörkşop və panel müzakirələr təşkil ediləcək.