SİYASƏT
Beynəlxalq konfransda Azərbaycanda miqrasiya siyasəti və insan hüquqları ilə bağlı məsələlər müzakirə edilmişdir
Bakı, 10 aprel (AZƏRTAC, Kifayət Əliyeva). Aprelin 10-da Bakıda Azərbaycan Milli Elmlər Akademiyasının (AMEA) İnsan Hüquqları və Konfliktologiya İnstitutunun (İHKİ), Azərbaycan Respublikasının Dövlət Miqrasiya Xidməti və Beynəlxalq Miqrasiya Təşkilatının birgə əməkdaşlığı çərçivəsində “Azərbaycan Respublikasında miqrasiya siyasəti və insan hüquqları” mövzusunda Beynəlxalq konfrans keçirilmişdir.
AZƏRTAC xəbər verir ki, konfransda dövlət və hökumət qurumlarının nümayəndələri, Milli Məclisin deputatları, beynəlxalq təşkilatların, səfirliklərin əməkdaşları, KİV-lərin təmsilçiləri iştirak etmişlər.
Tədbirdə AMEA İnsan Hüquqları və Konfliktologiya İnstitutunun direktoru, Milli Məclisin deputatı Aytən Mustafayeva xarici ölkələrdə azərbaycanlı emiqrantların hüquqlarının qorunması problemindən, həmvətənlərimizin Azərbaycanın xaricdəki nümayəndəlikləri ilə əlaqələrinin, ölkəyə qayıtdıqdan sonra sosial təminat məsələlərinin həllinin, dövlətlər arasında müvafiq sazişlərin olmasının vacibliyindən danışmışdır. İnstitutun direktoru bu sahədə beynəlxalq təcrübənin öyrənilməsində belə görüşlərin əhəmiyyətini qeyd etmişdir.
A.Mustafayeva Prezident İlham Əliyevin ölkədə miqrasiya siyasəti problemlərinin həllinə, eləcə də insan hüquqlarının inkişafına böyük diqqət və qayğısını xüsusi vurğulamışdır.
Konfransda Beynəlxalq Miqrasiya Təşkilatının Azərbaycandakı nümayəndəliyinin rəhbərini əvəz edən Serhan Aktoprak respublikamıza gələn əcnəbilərin, eləcə də xaricdə yaşayan azərbaycanlıların hüquqlarının qorunmasının Prezident İlham Əliyevin daim diqqət mərkəzində olduğunu, təmsil etdiyi qurumun Azərbaycan dövlətinin bu sahədəki fəaliyyətini yüksək qiymətləndirdiyini bildirmişdir. Ölkənin sosial-iqtisadi inkişafı səbəbindən son illər Azərbaycana gələn əcnəbilərin sayının xeyli artdığını qeyd edən S.Aktoprak, Azərbaycanın miqrasiya proseslərində fəal iştirakını diqqətə çatdırmışdır.
Respublikamızın çox böyük potensiala malik olduğunu qeyd edən S.Aktoprak bildirmişdir ki, xaricdə Azərbaycan mexanizmini öyrənməyə maraqlı ölkələr vardır. Beynəlxalq Miqrasiya Təşkilatının Azərbaycandakı bir sıra dövlət qurumları ilə sıx əməkdaşlıq etdiyi, insan alveri ilə mübarizə sahəsində birgə mühüm tədbirlərin nəzərdə tutulduğu vurğulanmışdır.
S.Aktoprak miqrasiya siyasətinin aktual vəzifələrindən, miqrasiya prosesinin təhlükəsizlik təminatının yaradılmasından, miqrasiya və etnik diasporun formalaşmasından, emiqrantların hüquqlarının müdafiəsindən, miqrasiya prosesində beynəlxalq təcrübə və əməkdaşlığın bu sahəyə verə biləcəyi töhfələrdən də söz açmışdır.
Azərbaycan Respublikasının Dövlət Miqrasiya Xidməti rəisinin müavini Pərviz Musayev bildirmişdir ki, miqrasiya məsələləri nəinki ölkəmizdə, eləcə də bütün dünyada aktual məsələdir. Ölkəmizdə dövlət müstəqilliyinin bərpasından sonra bu sahədə yaranmış problemlər ulu öndər Heydər Əliyevin və Azərbaycan Prezidenti İlham Əliyevin məqsədyönlü siyasətləri sayəsində həllini tapmışdır.
Bildirilmişdir ki, bu istiqamətdə ilk mühüm addımlarından biri kimi dövlətimizin başçısı 2006-cı il iyulun 25-də “Azərbaycan Respublikasının Dövlət Miqrasiya Proqramı”nın təsdiq edilməsi haqqında” Sərəncam imzalamışdır. Kompleks tədbirlər sistemini əks etdirən Dövlət Proqramında miqrasiya idarəetmə sisteminin inkişafı, miqrasiya proseslərinin tənzimlənməsi və proqnozlaşdırılması, bu sahədə qanunvericiliyin beynəlxalq normalara və müasir dövrün tələblərinə uyğun təkmilləşdirilməsi, qanunların tətbiqinin səmərəliliyinin təmin edilməsi, miqrantlarla bağlı sosial müdafiə tədbirlərinin həyata keçirilməsi və digər mühüm məsələlər yer almışdır.
Dövlət Proqramı əsasında miqrasiya sahəsində vahid dövlət siyasətini həyata keçirən xüsusi dövlət orqanının yaradılmasının obyektiv zərurət kimi meydana çıxdığını vurğulayan Pərviz Musayev bildirmişdir ki, bu zərurəti nəzərə alan Prezident İlham Əliyev 2007-ci il martın 19-da Dövlət Miqrasiya Xidmətinin yaradılması haqqında Fərman imzalamışdır. Dövlət Miqrasiya Xidmətinə qısa müddətdə hüquq mühafizə orqanı statusu verilmişdir. Xidmət fəaliyyətə başladığı andan qanunvericiliyin beynəlxalq normalara və müasir dövrün tələblərinə uyğun təkmilləşdirilməsinə, qanunların tətbiqində yol verilə biləcək nöqsan və sui-istifadə hallarının, tənzimlənməyən miqrasiya proseslərinin mənfi təsirinin aradan qaldırılmasına, sabit demoqrafik inkişafa, qeyri-qanuni miqrasiyaya qarşı səmərəli mübarizə tədbirlərinin gücləndirilməsinə çalışır.
Tədbirdə Dövlət Miqrasiya Xidmətinin təşkilat idarəsinin rəisi Siyasət Alıyevin “Azərbaycan Respublikasında Miqrasiya Məcəlləsi və əcnəbi və vətəndaşlığı olmayan şəxslərin hüquq və azadlıqların müdafiəsi”, AMEA İHKİ-nin Gənc Alim və Mütəxəssislər Şurasının sədri Aqil Əhmədovun “Əmək miqrantlarının hüquqları və beynəlxalq təşkilatlar”, Daxili İşlər Nazirliyi Polis Akademiyasının baş inspektoru, polis polkovnik-leytenantı Vasif Nəcəfovun “Miqrasiya siyasəti, Cənubi Qafqazda təhlükəsizliyin təminatı”, Rusiya Miqrasiya Siyasəti İnstitutunun direktoru Olqa Qulinanın “Avropada immiqrasiya hüququ və onun tətbiqi: konsepsiya, trend və bələdçi”, Gürcüstan Qafqaz Beynəlxalq Universitetinin professoru Anzor Todadzenin “Cənubi Qafqazın miqrasiya prosesləri”, Mərakeş Krallığının Azərbaycandakı səfiri Həsən Haminin “Humanizm və məsuliyyətlilik: Mərakeşin miqrasiya siyasətinin iki əsas prinsipi” mövzularında məruzələri dinlənilmiş, müzakirələr aparılmışdır.
Müzakirələrdə siyasət, iqtisadiyyat, sosial və humanitar elmlər üzrə mütəxəssislər və elmi tədqiqatçılar, dövlət və qeyri-hökumət strukturlarının mövzu ilə əlaqəli məsul şəxsləri iştirak etmişlər.
Konfransda Azərbaycan Prezidentinin ölkədə miqrasiya sahəsində dövlət siyasətinin, miqrasiya proseslərinin idarə edilməsinin güclənməsi və tənzimlənməsində yaranmış problemlərin hüquqi çərçivədə həllinə istiqamətlənən göstərişlərini nəzərə alaraq, bu işdə birgə səylərin birləşdirilməsinin vacibliyi vurğulanmışdır. Miqrasiya siyasəti sahəsində konstruktiv fəaliyyətin istiqamətləndirilməsinin məqsədəuyğunluğu qeyd olunmuşdur.