Bakı, 30 avqust, AZƏRTAC

Böyük dövlətlər və beynəlxalq təşkilatların uzun müddətdir davam edən ikili standartları təəssüf hissi yaradır. Onların prinsipləri və çağırışları humanizmə, insan haqlarına, demokratiyaya əsaslanırdı. Məhz bu səbəbdən Azərbaycan müstəqilliyin ilk dövrlərində BMT-nin Təhlükəsizlik Şurasının qərarlarına, Avropa İttifaqı kimi beynəlxalq təşkilatların öz vəzifəsini layiqincə yerinə yetirəcəyinə inanırdı. Lakin biz real həyatda tamamilə bunun əksini gördük.

Bunu AZƏRTAC-a açıqlamasında “Tərxis Olunmuş Hərbçilərin Gəncləri Maarifləndirmə" İctimai Birliyinin və “Qardaşlığımız Əbədidir” QHT Koalisiyasının sədri Emin Həsənli deyib.

O qeyd edib ki, Qarabağ məsələsində BMT-nin qətnamələrinin yerinə yetirilməməsi beynəlxalq təşkilatlara olan inamı birdəfəlik sarsıdıb.

İctimai Birliyin sədri Qarabağda baş verən problemlərə böyük dünya dövlətlərinin və beynəlxalq təşkilatların biganə qaldığını vurğulayıb: “Birinci Qarabağ müharibəsi zamanı 4 minə yaxın Azərbaycan vətəndaşı itkin düşüb. Onlardan 3 min 171-i hərbçi, 719-u mülki şəxsdir. Mülki şəxslər içərisindən 71-i uşaq, 267-si qadın, 326-sı yaşlı insanlar olub. Ermənistan tərəfinin əsir götürdüyü azərbaycanlı girovlarla davranışı, onları işgəncələrə məruz qoyaraq qətlə yetirməsini heç bir təşkilat qınamayıb. Beynəlxalq Qırmızı Xaç Komitəsinin məsələyə səssiz qalmasını xüsusilə vurğulamaq istərdim. Ən ağır cinayətlər, soyqırımları törədən Serj Sarkisyan, Robert Köçəryan kimi qatillər Ermənistanda prezident oldular və BMT baş verən bu prosesləri qəbul etdi. Əli qanlı terrorçular Avropa Şurasında diplomat kimi qəbul edildilər. Beynəlxalq Qırmızı Xaç Komitəsi 4 minə yaxın əsirlikdə olan azərbaycanlının işgəncəyə məruz qalaraq öldürülməsi əmrini verənlərin prezident olmasını qınamadı. Həmin faktlar Azərbaycanın beynəlxalq təşkilatlara təqdim etdiyi video və fotolar vasitəsilə təsdiq olunub.

“Bunun əksinə olaraq, 44 günlük Vətən müharibəsində Azərbaycanın əsir götürdüyü erməni hərbçilərinə göstərdiyi humanist münasibət bütün dünya üçün nümunə olmalıdır. Hətta müharibə zamanı Azərbaycan əsgərlərinin yaşlı erməniləri öz evlərinə aparması ictimaiyyətə yayılan videogörüntülərlə sübut edilib. Beynəlxalq Qırmızı Xaç Komitəsinin (BQXK) səssizliyinə arxalanan Ermənistan isə Xocalıda dinc əhaliyə qarşı törətdiyi vandalizmi Qarabağ savaşında davam etdirdi. Gəncə, Bərdə, Tərtər kimi bölgələrdə yaşayan mülki əhaliyə divan tutdu. Təəssüflər olsun ki, bu erməni vəhşiliyinin son nümunəsi olmadı. İmzalanan üçtərəfli birgə Bəyanatdan sonra Naxçıvan tərəfdən iki hərbçimizin əsir düşməsi və onların geri qaytarılmaması prosesin davam etdiyini göstərir. Prinsiplərin humanizmə, insan haqlarına əsaslandığını bildirən BQXK əsirlərin geri qaytarılması istiqamətində heç bir addım atmadı. Xocalının Meşəli kəndində komitənin vasitəçiliyi ilə hərəkət edən Vaqif Xaçaturyanın dəstəsi bölgədə yaşayan 28 nəfəri vəhşicəsinə qətlə yetirib, 14 nəfəri yaralayıb. Buraya “humanist” BQXK barədə sözlərin bitdiyi yer demək olar. Azərbaycan işğaldan azad etdiyi ərazilərdə Birinci Qarabağ müharibəsi zamanı öldürülmüş hərbçilərinin kütləvi məzarlıqlarını aşkar edir. Onlar gətirilib öz vətənlərində layiqincə dəfn olunur. Şuşanın Daşaltı kəndində şəhid olanların qalıqları 31 il sonra Vətən torpağına tapşırılıb. Bununla belə hələ də aqibətindən xəbər olunmayan minlərlə hərbçi var. Lakin komitənin ermənipərəst mövqeyi məsələnin həllini olduqca çətinləşdirir”, - deyə Emin Həsənli söyləyib.

Onun sözlərinə görə, hazırda dünyada beynəlxalq təşkilatların nüfuzu itib. Dövlətimizin başçısı İlham Əliyev və Türkiyə Prezidenti Rəcəb Tayyib Ərdoğan beynəlxalq arenada çağırışları zamanı sözügedən təşkilatları köklü islahatlar aparmağa çağırıb. BMT, Avropa İttifaqı və digər bir çox təşkilatlarda ciddi dəyişikliklər olmalıdır. Onlar prinsiplərini dəyişməli, vəd etdikləri humanizmi tətbiq etməlidirlər. Əks təqdirdə dünya daha böhranlı vəziyyətə düçar olacaq. Prezident İlham Əliyev BMT-nin Təhlükəsizlik Şurasının qətnamələrini tam şəkildə yerinə yetirən yeganə tarixi şəxsiyyətdir. Ali Baş Komandanımız Azərbaycanın ərazi bütövlüyünü təmin edib və 2020-ci il noyabrın 10-da imzalanan üçtərəfli birgə Bəyanatın şərtlərinin icrası istiqamətində sistemli addımlar atır.