SİYASƏT
Binəqədi rayonunda akademik Zərifə Əliyevanın anadan olmasının 91-ci ildönümü münasibətilə tədbir keçirilmişdir
Bakı, 28 aprel (AZƏRTAC). Aprelin 28-də Binəqədi rayonunda görkəmli oftolmoloq alim, Azərbaycan tibb elminə misilsiz töhfələr vermiş akademik Zərifə xanım Əliyevanın anadan olmasının 91-ci ildönümü münasibətilə tədbir keçirilmişdir.
AZƏRTAC xəbər verir ki, tədbir iştirakçıları əvvəlcə əsl Azərbaycan qadını üçün örnək sayılan Zərifə xanımın onun adını daşıyan parkda görkəmli alimin abidəsi önünə tər çiçəklər düzmüş, əziz xatirəsinə dərin ehtiramlarını bildirmişlər.
Binəqədi Rayon İcra Hakimiyyəti başçısının birinci müavini İlqar Süleymanov çıxışında insanlara nur bəxş etmək missiyası, qayğıkeşliyi, nəcibliyi ilə könüllərdə özünə əbədi yer qazanmış Zərifə xanım Əliyevanın mənalı və şərəfli ömür yolundan danışmış, onu istər elmi fəaliyyətində qazandığı uğurlar, istər şəxsiyyət kimi öz fərdi keyfiyyətləri ilə ailəsinin və Vətəninin adını ucaldan şəxsiyyət kimi səciyyələndirmişdir. Natiq XX əsrin Azərbaycan elminin böyük simalarından olan Z.Əliyevanın həm də öz vəzifəsini şərəflə yerinə yetirən ana olduğunu bildirərək, ölkəmizə müstəqil Azərbaycanın tərəqqi zirvələrini fəth etməsində qazandığı uğurların təminatçısı olan Prezident İlham Əliyev kimi lider bəxş etdiyini vurğulamışdır.
Milli Məclisin deputatı Məlahət İbrahimqızı çıxışında Z.Əliyevanı peşəkar həkim olmaqla yanaşı, həm də fəal ictimai xadim kimi xarakterizə etmişdir. O, həkim peşəsini vicdanla yerinə yetirən oftolmoloq alimin insanların sağlamlığının qorunmasında, xəstəliklərin qarşısının alınmasında göstərdiyi səylərə toxunaraq onun öz həmvətənlərinin qayğısına qalan humanist insan olduğunu diqqətə çatdırmışdır. Zərifə xanımın bütün insani keyfiyyətləri ilə əsl Azərbaycan qadınının ideal obrazını yaratdığını qeyd etmişdir.
YAP Qadınlar Şurasının sədri Nurlanə Əliyeva çıxışında Zərifə xanımı ictimai fəallığı ilə həkim peşəkarlığını özündə birləşdirən və bu xüsusiyyətləri xalqına xidmət göstərən ictimai xadim kimi səciyyələndirmişdir.
Daha sonra Binəqədi Rayon İcra Hakimiyyəti başçısının müavini Aygün Əliyeva çıxışında tanınmış həkim, novator alim, eyni zamanda, qayğıkeş ana, sədaqətli ömür-gün yoldaşı olan Zərifə xanımın əziz xatirəsinin daim qəlblərdə yaşadığını və nəcib keyfiyyətlərinin könüllərdə ona əbədiyaşarlıq qazandırdığını qeyd etmişdir.
Tədbirdə Xalq Artisti Samir Cəfərovun ifasında səslənən musiqi parçaları tədbiri daha təsirli və yaddaqalan etmişdir.
Sonda qonaqlar Zərifə Əliyeva adına parkda təşkil edilən fotosərgi ilə tanış olmuşlar.