AZƏRTAC-ın xüsusi müxbiri xəbər verir ki, Bakı-Tbilisi-Ceyhan (BTC) neft kəmərinin Gürcüstan sahəsinin rəsmi açılışından sonra yerli politoloqlar Böyük neft kəməri layihəsinin işə düşməsi ilə ölkənin rus hərbçilərindən qısa müddətdə və problemsiz azad olunacağını, Qafqazda coğrafi-siyasi vəziyyətin yaxşılığa doğru əsaslı surətdə dəyişəcəyini ehtimal edirlər.

Ekspert Georgi Xuxaşvili demişdir: “Bu layihənin əhəmiyyəti ondan ibarətdir ki, biz qlobal təhlükəsizlik sisteminə qoşuluruq. Enerji daşıyıçılarının hasilatı və nəqli müasir dünyamızın üstün sahələrindəndir və Gürcüstan bu layihə vasitəsilə təhlükəsizliyi üçün təminat alır. BTC layihəsi, ölkəmiz üçün, həqiqətən, tarixi əhəmiyyət kəsb edir”. Onun fikrincə, hazırda dünyada baş verən böhran və kataklizmlər məhz enerji ehtiyatlarına nəzarət etmək məqsədilə müxtəlif tərəflər arasında gedən müharibələrdən doğur.

Ekspert vurğulamışdır ki, Qərb və transmilli şirkətlər Qafqaz bölgəsində sabitlikdə maraqlıdırlar. Münaqişə zonalarında vəziyyət tənzimlənmədiyi təqdirdə isə bölgədə sabitlik ola bilməz. Bu zonalarda vəziyyətin gərginləşməsi neft kəmərinin işinə ciddi əngəl törədər. Onun qənaətinə görə, BTC layihəsi münaqişə zonalarında problemlərin həlli üçün birbaşa stimuldur.

G.Xuxaşvili demişdir: “Qarabağ problemini nəzərə alsaq, ilk mərhələdə Gürcüstan-Azərbaycan təhlükəsizlik kontingentinin yaradılacağı istisna olunmur”.