Bakı, 5 sentyabr, AZƏRTAC

SOCAR-ın Marketinq və İqtisadi Əməliyyatlar İdarəsi bu ilin avqust ayında 15 min 332 ton dizel yanacağı, 118 ton soba mazutu, 2 min 73 ton yüksək təzyiqli polietilen, 1811 ton mütləqləşdirilmiş izopropil spirti, 9 min 595 ton maye piroliz qətranı, 3 min 990 ton propilen və 4 min 639 ton butilen butadien fraksiyası ixrac edib.

Şirkətin mətbuat xidmətindən AZƏRTAC-a bildirilib ki, ümumilikdə cari ilin yanvar-avqust ayları ərzində 363 min 512 ton dizel yanacağı, 26 min 54 ton təyyarə yanacağı, 236 ton soba mazutu, 56 min 244 ton yüksək təzyiqli polietilen, 8 min 217 ton mütləqləşdirilmiş izopropil spirti, 46 min 873 ton maye piroliz qətranı, 28 min 653 ton propilen və 21 min 17 ton butilen butadien fraksiyası ixrac olunub.

Bu ilin avqust ayında dünya bazarında etilləşdirilmiş benzinin qiyməti (1 ton üçün) - 548,55 ABŞ dolları, təyyarə yanacağının - 505,99 dollar, dizel yanacağının - 460,64 dollar, 1 faizli kükürdlü mazutun - 296,72 dollar, yüksək təzyiqli polietilenin 1190 dollar, butilen butadien fraksiyasının 557,73 dollar, maye piroliz qətranının - 548,55 dollar, propilenin 790 avro, mütləqləşdirilmiş izopropil spirtinin isə 1390 avro təşkil edib.