ORDU
Cəmşid Naxçıvanski adına Hərbi Liseyin 51-ci buraxılış mərasimi keçirilib
Bakı, 15 iyun, AZƏRTAC
İyunun 15-də Milli Müdafiə Universitetinin Cəmşid Naxçıvanski adına Hərbi Liseyinin kursantlarının 2023-cü il üzrə buraxılışına həsr olunan təntənəli mərasim keçirilib.
AZƏRTAC xəbər verir ki, Hərbi Liseyin 51-ci buraxılış mərasimində Milli Müdafiə Universitetinin rəhbərliyi, liseyin şəxsi heyəti və rəhbərliyi, müəllimlər, məzunlar, valideynlər və media nümayəndələri iştirak ediblər.
Əvvəlcə Ümummilli Lider Heydər Əliyevin və Cəmşid Naxçıvanskinin Hərbi Liseydə ucaldılan büstləri ziyarət olunub.
Ümummilli Lider Heydər Əliyevin və Azərbaycanın müstəqilliyi, ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla anılıb.
Hərbi orkestrin müşayiəti ilə Azərbaycan Respublikasının Dövlət Himni ifa edilib.
Sonra liseyin Döyüş bayrağı təntənəli surətdə meydana gətirilib.
Milli Müdafiə Universitetinin rektoru professor, general-leytenant Heydər Piriyev çıxış edərək, əlamətdar gün münasibətilə məzunları Azərbaycan Respublikasının müdafiə nazirinin adından və öz adından təbrik edib, onlara gələcək xidmətlərində uğurlar arzulayıb.
Qeyd edilib ki, buraxılış mərasiminin təsadüf etdiyi 15 iyun tarixi həm də Azərbaycan xalqının Milli Qurtuluşu, dövlətçiliyin və mənəvi dəyərlərin xilası günüdür. Böyük xilaskar, Ulu Öndər Heydər Əliyevin atdığı mühüm addımlardan biri də C.Naxçıvanski adına Hərbi Liseyin yaradılması olub. Milli zabit kadrlarının hazırlanmasında xüsusi rolu olan C.Naxçıvanski adına Hərbi Liseyin bu gün də Ümummilli Lider Heydər Əliyevin layiqli davamçısı, Prezident, Müzəffər Ali Baş Komandan İlham Əliyevin diqqət və qayğısı ilə əhatə olunduğu vurğulanıb.
"Ulu Öndər bu təhsil ocağının yaradılması üçün böyük sınaqlar və təzyiqlərlə qarşılaşmışdı və həyatı boyu da doğma liseyə öz övladı kimi böyük qayğı göstərmişdi. Ümummilli Lider özü də bu təhsil ocağının yaradılmasını yüksək qiymətləndirirdi. O bildirirdi ki, liseyin əsasını qoyanda Azərbaycan xalqının öz milli azadlığını əldə edəcəyinə və müstəqil Azərbaycan dövlətinin yaranacağına əmin idi. Uzaqgörən siyasətçi sizi müstəqil Azərbaycan Ordusuna xidmət edəcək zabitlər kimi görürdü. Bu gün Azərbaycan müstəqildir, dünyanın sayılıb-seçilən dövlətlərindən biridir. Sizin xidmət edəcəyiniz Azərbaycan Ordusu da hazırda dünyanın ən güclü ordularından biridir. Siz Ulu Öndər Heydər Əliyev tərəfindən yenidən qurulan və Müzəffər Ali Baş Komandan İlham Əliyevin prezidentliyi dövründə inkişafının ən yüksək nöqtəsində olan Azərbaycan Ordusunda xidmət edəcəksiniz.
Son illər Prezident İlham Əliyevin qayğısı və göstərişləri əsasında Hərbi Liseydə əsaslı təmir və yenidənqurma işləri aparılıb, hərbi lisey yenidən qurulub. Burada Azərbaycan Ordusunun ən təcrübəli zabitləri komandirləriniz olduğu kimi, respublikanın ən hazırlıqlı müəllimləri də müxtəlif fənlər üzrə biliklər öyrədiblər. Həmin zabitlər və müəllimlərin zəhməti nəticəsində hərbi liseydə təhsilin səviyyəsi respublika üzrə çox yüksək göstəricilərə malikdir. Şübhə etmirik ki, bu gün buraxılışına toplaşdığımız kursantlar əldə etdikləri yüksək göstəricini gələcək fəaliyyətləri dövründə də göstərəcək və bilikli zabitlər kimi Azərbaycan Ordusunda xidmətlərini davam etdirəcəklər. Hərbi Liseyin məzunları arasında xeyli sayda zabit hazırda Azərbaycan Ordusunda çox məsuliyyətli vəzifələri tutur. İstər Birinci, istərsə də İkinci Qarabağ müharibələrində Hərbi Liseyin məzunları yüksək vətənpərvərlik nümunəsi nümayiş etdiriblər. Bunun nəticəsidir ki, hərbi liseyin məzunları arasından 10 nəfər Azərbaycanın Milli Qəhrəmanı, 19 nəfər isə Vətən Müharibəsi Qəhrəmanı adına layiq görülüb", - deyə H.Piriyev bildirib.
Liseyin müəllimi Rəna Seyidrzayeva və kursant Elxan Səfərlinin anası Təranə Səfərova məzunlara uğurlar diləyərək, onlara Vətənə layiqli zabit olmağı arzulayıblar.
Dövlət İmtahan Mərkəzi tərəfindən keçirilən XI siniflərin buraxılış imtahanında yüksək nəticə (274 bal) toplayaraq kurs birincisi olan kursant Emil Bayramlı kursantlar adından çıxış edib. Onlara göstərilən etimadı doğruldacaqlarını, növbəti ali hərbi təhsilləri dövründə daha da inamla çalışaraq gələcəkdə peşəkar zabit olacaqlarını, Vətən, dövlət və xalq qarşısında vəzifələrini layiqincə yerinə yetirəcəklərini, hərbçi şərəfini hər zaman uca tutacaqlarını bildirib.
Çıxışlardan sonra tədrisdə və intizamda fərqlənən liseyin kursantlarına attestat və liseyin döş nişanı təqdim olunub, kurs birincisi tərəfindən yaş kötüyünə məzun rəmzi vurulub.
Daha sonra Cəmşid Naxçıvanski adına Hərbi Liseyin Döyüş bayrağının təhvili və qəbulu mərasimi keçirilib. Döyüş bayrağı növbəti buraxılışın kursantlarına təhvil verilib.
Sonda hərbi orkestrin müşayiəti ilə kursantlar lisey marşını ifa edib və təntənəli marşla tribunanın önündən keçib.
Bu günün onun üçün çox əlamətdar olduğunu bildirən kursant Yusif Hacızadə deyib: "İki il ərzində lisey bizə ikinci ev oldu, zabitlərdən və müəllimlərdən həm bilik, həm də həyat dərsi aldıq. Bizə sevgi və dəstəyini əsirgəməyən zabitlərə və müəllimlərə minnətdarlığımı bildirirəm. Ən böyük arzum Heydər Əliyev adına Hərbi İnstitutu bitirib azad edilmiş ərazilərdə Vətənə xidmət etməkdir. Biz qəhrəman şəhid və qazilərimizin şərəfli həyat yolunu özümüzə örnək götürərək, daim Vətənin keşiyində ayıq-sayıq dayanacağıq".
Kursant Rəvan Əsədov çətin, bir o qədər də şərəfli yola ilk addımlarını bu təhsil ocağında atdığını, Hərbi Liseyin məzunu olmağın onun üçün çox böyük fəxarət olduğunu diqqətə çatdırıb: "Buradan həm sevinc, həm də kədərlə ayrılırıq. Hərbi lisey bizi gələcəyin hərbçiləri kimi hazırlamaqla yanaşı, dostluğu, sədaqəti öyrətdi. Burada özümə sadiq və etibarlı dostlar qazandım. Üzərimizdə əziyyəti olan bütün müəllim və zabitlərimizə minnətdaram".
Kursant Anar Əliyev kiçik yaşlarından hərbçi olmaq istədiyini, arzusuna çatmaq üçün ilk addımlarını Cəmşid Naxçıvanski adına hərbi liseydə təhsil almaqla atdığını bildirib: "İki il ərzində müəyyən biliklərə yiyələndim. Hərbi liseyin şəhid və qazi olan məzunlarının həyat və döyüş yolu bizim üçün mayak oldu. Onların davamçıları kimi Vətənə, xalqa layiqli xidmət edəcək, Hərbi Liseyimizin adını hər zaman uca tutacağıq".
Qardaşı - kursant Ayxan Hüseynovla fəxr etdiyini deyən Ayşə Hüseynova deyib: "Atam hərbçi, eyni zamanda, Birinci Qarabağ müharibəsi qazisi idi. Qardaşımın da hərbçi olmasını çox istəyirdi. Təəssüf ki, bu günü görmək ona nəsib olmadı. Lakin sevinirəm ki, qardaşım Ayxan atamızın bu arzusunu gerçəkləşdirmək üçün atdığı addımla onun ruhunu şad etdi".