AZƏRTAC xəbər verir ki, iyunun 30-da Azərbaycan Prezidenti İlham Əliyevin və Ukrayna Prezidenti Viktor Yuşşenkonun təkbətək görüşü başa çatdıqdan sonra dövlət başçılarının nümayəndə heyətlərinin iştirakı ilə geniş tərkibdə görüşü keçirilmişdir.

Prezident İLHAM ƏLİYEV Prezident Viktor Yuşşenkonu salamlayaraq dedi:

-Hörmətli Viktor Andreyeviç!

Hörmətli qonaqlar!

İcazə verin, Sizi Azərbaycanda bir daha salamlayım. Bizim əlaqələrimizin bu cür intensiv xarakter daşıması mənə çox xoşdur. Düz bir ay bundan əvvəl mənim rəsmi səfərim və energetika sammiti çərçivəsində Sizinlə Kiyevdə görüşdük, çox uğurlu və konstruktiv danışıqlar apardıq. Sizin Azərbaycana bugünkü səfəriniz bizim əməkdaşlığın möhkəmləndirilməsi işində daha bir mühüm addımdır.

Bu gün qarşılıqlı maraq doğuran məsələləri müzakirə etdik və mən böyük razılıq hissi ilə demək istəyirəm ki, son illərdə ölkələrimiz arasında əldə edilmiş bütün razılaşmalar bizim milli mənafelərimizə uyğundur.

Sizin bugünkü səfəriniz xüsusən onunla əlamətdardır ki, biz Bakıda Ukrayna xalqının görkəmli oğlu Taras Şevçenkonun abidəsinin açılışında iştirak edəcəyik. Bu hadisə həm Ukraynanın böyük oğlunun xatirəsinə hörmət əlaməti, həm də ölkələrimiz arasında ikitərəfli əməkdaşlığın mühüm elementidir.

Ümumiyyətlə, bizim müzakirə etdiyimiz və daim üzərində iş aparılan məsələlərin bütün spektri barədə mövqelərimiz üst-üstə düşür. Əminəm ki, bu gün fəal müzakirə edilən bütün məsələlər üzrə gələcəkdə müsbət irəliləyişlərin şahidi olacağıq.

Bir daha xoş gəlmisiniz.

Ukrayna Prezidenti VİKTOR YUŞŞENKO səmimi qəbul üçün Azərbaycan dövlətinin başçısına təşəkkür edərək dedi:

-Hörmətli İlham Heydər oğlu!

Hörmətli azərbaycanlı dostlar!

Sizin ölkənizin qonağı olmaq mənim üçün həmişə böyük şərəfdir. Biz buraya kifayət qədər böyük nümayəndə heyəti ilə gəlmişik. Həmişə sanballı, konkret mövzulara dair danışıqlarla səciyyəvi olan münasibətlərimizin genişlənməsini qeyd etmək istərdim. Biz gündəlikdəki bütün məsələləri müntəzəm müzakirə edirik. Deyə bilərəm ki, bu məsələlərdə çox uğurlu tərəqqi müşahidə olunur. Energetika sahəsində əməkdaşlıq məsələsinə gəldikdə demək istərdim ki, enerji layihələrinin həyata keçirilməsinin gedişindən, bu layihələrin əməli reallaşmasının sürətlənməsindən razıyam.

Əlamətdar haldır ki, biz bu gün həm Azərbaycanda Ukrayna mədəniyyəti günlərini, həm də Taras Qriqoryeviç Şevçenkonun abidəsini açacağıq. Mənə belə gəlir ki, Ukraynaya ən böyük iltifat göstərmək istəyən millət Taras Qriqoryeviç Şevçenkoya abidə ucaldır. Buna görə Sizə təşəkkür edirəm.

######