MƏDƏNİYYƏT
Əbu-Dabi yeniliklərlə turistlərdə maraq oyadır
Bakı, 7 may, AZƏRTAC
“Etihad Airways” aviaşirkətinin həyata keçirdiyi Bakı-Əbu-Dabi birbaşa uçuş reysinin açılması münasibətilə Bakıda Əbu-Dabinin turizm imkanlarına həsr edilən təqdimat keçirilib. Əbu-Dabi Əmirliyinin Mədəniyyət və Turizm Departamentinin təşkil etdiyi tədbirdə paytaxtın aparıcı turizm şirkətlərinin nümayəndələri iştirak ediblər.
Xatırladaq ki, Birləşmiş Ərəb Əmirliklərinin (BƏƏ) paytaxtı ilə Bakı arasında aviareyslər 2018-ci ilin martından etibarən həftədə üç dəfə - çərşənbə, cümə və şənbə günləri “Airbus A320” avialayneri vasitəsilə həyata keçirilir. BƏƏ ilə Azərbaycan arasında olan reyslərə daim artan tələbat nəzərə alınaraq, uçuşların sayının həftədə beş dəfəyədək artırılması gözlənilir.
“Etihad Airways” aviaşirkəti tərəfindən sərnişinlərə göstərilən xidmətin səviyyəsi xoş təsir bağışlayır. Belə ki, təyyarənin göyərtəsində uşaqlarla dayələr məşğul olur. Əbu-Dabi hava limanına çatdıqda sərnişinlərə şəhərin mərkəzinədək pulsuz gediş xidməti göstərilir. Biznes-klassın tranzitlə uçan sərnişinləri isə uzun müddət gözlədikləri vaxt ərzində beşulduzlu otellərə pulsuz yerləşdirilə bilər.
Əbu-Dabi Mədəniyyət və Turizm Departamentinin Rusiya və MDB üzrə ofisinin direktoru Eduard Qriqoryev AZƏRTAC-ın müxbiri ilə müsahibəsində deyib: “Birbaşa reys turist axınının artması üçün daim qısa yoldur. Əminik ki, Əbu-Dabinin ailəvi dincəlmək üçün təklif etdiyi imkanlardan Azərbaycandan getmiş turistlər geniş istifadə edəcəklər. Mədəni və dini abidələr, əyləncə parkları və lacivərdi çimərliklər - bütün bunlar və digərləri şübhəsiz maraq doğuracaq”.
Əbu-Dabi Mədəniyyət və Turizm Departamentinin nümayəndəsi və turbiznes işi üzrə mütəxəssis Maksim Şandarov tədbir iştirakçılarına BƏƏ-nin və Əbu-Dabi Əmirliyinin turizm potensialı barədə ətraflı məlumat verərək deyib: “2017-ci ildə Əbu-Dabi planetdə ən təhlükəsiz şəhər adına layiq görülüb. Əbu-Dabi həm də Əmirliklərin ən yaşıl şəhəridir. Bu il Əbu-Dabidə turizm və əyləncə sahəsində bir sıra maraqlı yeniliklərin yaranması ilə yadda qalıb. Belə ki, ilin əvvəlində Səadiyyət adasında - şəhər mərkəzinin yaxınlığında, Əmirliyin 200 təbii adasından birində Fransadan kənarda ilk Luvr Əbu-Dabi muzeyi açılıb. Burada Parisin Luvr, Orse Muzeyindən və Pompidu Mərkəzinin kolleksiyasından Leonardo da Vinçi, Tisian, Pikasso və digər tanınmış sənətkarların 300-dək orijinal əsəri təqdim olunur. Fransalı arxitektor Jan Nuvelin layihəsi əsasında tikilmiş Luvr Əbu-Dabi Muzeyinin binası da diqqətəlayiqdir. Binanın pəncərəsi yoxdur, günəş işığı zallara yalnız şəbəkəşəkilli günbəzdən sıçrayır”.
Luvr Əbu-Dabi Səadiyyət adasında “muzey kvartalı”ndan yalnız birinci muzeydir. Tezliklə burada Frenk Gerinin layihəsi üzrə məşhur Amerika Müasir İncəsənət Muzeyinin filialı - Quqqenhaym Əbu-Dabi Muzeyi, həmçinin tanınmış arxitektor Norman Fosterin müəllifi olduğu Şeyx Zayed Milli Muzeyi açılacaq.
Bundan başqa, Səadiyyət adasında bu il otellərin sayı artacaq. Mart ayında adanın xoş təəssürat yaradan toxunulmamış ağ çimərliyi ərazisində “Saadiyat Rotana Resort & Villas” kurort oteli açılıb. İlin sonunda burada “Rixos Saadiyat Island” oteli və “Jumeirah” şəbəkəsinin yeni otelinin açılışı gözlənilir.
Yaxınlıqda yerləşən Yas “Əyləncə adası” da digərlərindən geridə qalmır. 2018-ci il iyulun 25-dən bu əyləncəli məkanın “Ferrari World Abu Dhabi” və “Yas Waterworld” böyük parklarına daha biri - tematik “Warner Bros World Abu Dhabi” parkı da qoşulacaq. Bu, dünyanın ən iri örtülü parklarından (150 min kvadratmetrdən artıq) biri olacaq. Burada komiks mövzusunda və “Warner Bros” filmlərinin qəhrəmanları, o cümlədən Betmen, Supermen, Skubi-Du, Tom və Cerriyə aid 29 attraksion fəaliyyət göstərəcək.
Bununla yanaşı, Yas adasında hər cür şərait yaradılmış “Yas beach” populyar çimərliyi, dünyanın ən parlaq ulduzlarının çıxış etdiyi regionda ən iri açıq “du Arena” meydançası, arzulayan hər kəsin Formula 1 Əbu-Dabi Qran-Prisinin keçirildiyi trasda əsl bolidlərdə yürüş edə biləcəyi Yas Marina və digər əyləncələr turistlərin ixtiyarına verilib.
Tədbir iştirakçıları və qonaqlar Əbu-Dabi və Bakı arasında birbaşa hava reysinin iki ölkə arasında turist axınının daha da artmasına şərait yaradacağına əminliklərini bildiriblər. Əbu-Dabinin görməli yerləri barədə viktorina ilə başa çatan tədbirdə qaliblərə qiymətli hədiyyələr təqdim edilib.
Emil Eyyubov