Bakı, 14 dekabr, AZƏRTAC

AMEA-nın Nizami Gəncəvi adına Ədəbiyyat İnstitutunda “Türk Ədəbiyyatı Vəqfi və Azərbaycan” mövzusunda elmi sessiya keçirilib.

Bu barədə AZƏRTAC-a Ədəbiyyat İnstitutunun İctimaiyyətlə əlaqələr şöbəsindən məlumat verilib. Qeyd olunub ki, tədbirdə AMEA-nın vitse-prezidenti, Ədəbiyyat İnstitutunun baş direktoru akademik İsa Həbibbəyli ədəbiyyat və elm sahəsində Azərbaycan-Türkiyə əlaqələrindən danışıb. Bildirib ki, Türk Ədəbiyyatı Vəqfi Azərbaycanla əlaqə saxlayan, iş quran ilk böyük təşkilatlardan biridir. “Türk ədəbiyyatı” dərgisi 1972-ci ildən çıxır, gələn il əlli illiyidir. 1978-ci ildən bu dərginin əsasında Türk Ədəbiyyatı Vəqfi qurulub. Türkiyədə ədəbiyyatın inkişafına Türk Ədəbiyyatı Vəqfi qədər xidmət edən ikinci belə qurum görmək çətindir. Bu qurumu professor Əhməd Kabaklı təsis edib. “Türk ədəbiyyatı” dərgisinin son otuz ilinə baxsan, hər nömrəsində Azərbaycan var, son illərdə lap çoxalır.

“Minnətdarlığımı bildirmək istəyirəm ki, dərginin bir sayını da Nizami Gəncəviyə həsr etmisiniz. Türkiyədə Nizami Gəncəvi irsinə bu il çox böyük diqqət göstərdilər. Bu istiqamətdə işimizi davam etdirməliyik. Nizaminin türk oğlu türk olduğunu dünyaya çatdırmalıyıq. Sərhat Kabaklı, İmdat Avşar və Bəxtiyar Aslanın bu istiqamətdə fəaliyyətini yüksək qiymətləndiririk. Bizim institutun dörd dərgisi var, hamısında Türkiyəyə yer ayrılır”, - deyə akademik qeyd edib.

Türk Ədəbiyyatı Vəqfinin rəhbəri Sərhat Kabaklı deyib: “Biz Azərbaycanın dərdi ilə ilk uşaq şeirlərimizi yazdıq. Azərbaycana ilk gəlişimdə torpağı öpmüşdüm. Türklüyün, türk ədəbiyyatının mərkəzi Azərbaycandır”.

“Türk ədəbiyyatı” dərgisinin baş redaktoru yazıçı İmdat Avşar da çıxışında Türk Ədəbiyyatı Vəqfində çox ciddi fikir adamlarının birləşdiyini bildirib. O əlavə edib ki, “Türk ədəbiyyatı” dərgisi həm ədəbiyyat, həm də digər sahələrin adamlarının çıxış etdiyi bir kürsüdür. Dərgi türk ədəbiyyatının gündəmini müəyyən edib, türklüyün mədəniyyət tarixini, sənət dəyərlərini ortaya çıxarıb.

Sonra hər iki qonağa Ədəbiyyat İnstitutunun “Fəxri dostu” diplomu verilib. Bəxtiyar Aslanın “İlin alimi” diplomu isə vəqfin rəhbərinə təqdim olunub.

Qonaqlar da akademik İsa Həbibbəyliyə “Yaşayan Dədə Qorqud” mükafatını təqdim ediblər. Eyni zamanda, “Türk ədəbiyyatı” dərgisinin Nizami Gəncəviyə həsr olunmuş sayı və digər nəşrlər institut rəhbərliyinə hədiyyə olunub.

Sessiyada filologiya elmləri doktoru Almaz Ülvi “Sərhat Kabaklı və Azərbaycan”, institutun icraçı direktoru filologiya üzrə fəlsəfə doktoru, dosent Mehman Həsənli “Türk ədəbiyyatı” dərgisində Azərbaycan ədəbiyyatı”, institutun elmi katibi filologiya üzrə fəlsəfə doktoru, dosent Aygün Bağırlı “Türk ədəbiyyatı” dərgisində Nizami Gəncəvi”, filologiya üzrə fəlsəfə doktoru Xuraman Hümmətova “İmdat Avşar və Azərbaycan”, filologiya üzrə fəlsəfə doktoru Eşqanə Babayeva “Azərbaycandan baxarkən modern türk yazıçısı Bəxtiyar Aslan” mövzularında məruzə ilə çıxış ediblər.