Gəncə, 30 mart (AZƏRTAC). Gəncə Şəhər İcra Hakimiyyəti Gəncə Dövlət Universiteti ilə birgə 31 mart - Azərbaycanlıların soyqırımı gününə həsr olunmuş dəyirmi masa keçirmişdir.

Şəhər ziyalılarının iştirakı ilə keçirilən tədbirdə ermənilər tərəfindən müxtəlif dövrlərdə soyqırımına məruz qalmış azərbaycanlıların xatirəsi bir dəqiqəlik sükutla yad edilmişdir.

Gəncə Şəhər İcra Hakimiyyətinin başçısı Eldar Əzizov azərbaycanlılara qarşı XIX əsrin əvvəllərindən başlayan və bu gün də davam etdirilən soyqırımı dəhşətlərini tutarlı faktlarla dəyirmi masa iştirakçılarının diqqətinə çatdırmışdır.

Qeyd edilmişdir ki, bu məkrli siyasət nəticəsində 1905-1907, 1918-1920, 1948-1953 və 1988-1993-cü illərdə erməni millətçiləri Azərbaycan torpaqlarında xalqımıza qarşı kütləvi qırğınlar törədərək yaşayış məntəqələrini, tarixi və mədəniyyət abidələrini, məscidləri, məktəbləri, səhiyyə ocaqlarını dağıtmışlar. Xüsusilə 1918-ci ilin martında erməni daşnakları Bakıda, Gəncədə, Şamaxıda, Qubada və ölkənin digər guşələrində misli görünməmiş qanlı qırğınlar törətmişlər. Bu vəhşilik və deportasiya siyasəti sovet hakimiyyəti dövründə də davam etdirilmiş, bir çox tarixi torpaqlarımız, o cümlədən Zəngəzur heç bir əsas olmadan Ermənistana verilmişdir. Ötən əsrin 80-ci illərində SSRİ-nin rəhbər dairələrinin təhriki və yardımı ilə 200 minə yaxın azərbaycanlı Ermənistandan amansızcasına qovulmuşdur. Dağlıq Qarabağ və onun ətrafındakı 7 rayon erməni hərbi birləşmələri tərəfindən işğal olunmuşdur. Yalnız ümummilli liderimiz Heydər Əliyev ikinci dəfə hakimiyyətə gəldikdən sonra bu vəhşiliklərin qarşısının alındığı qeyd edilmiş və ulu öndərin bu sahədə apardığı siyasət yüksək qiymətləndirilmişdir.

Dəyirmi masa çərçivəsində 31 mart - Azərbaycanlıların soyqırımı günü ərəfəsində Gəncə Şəhər İcra Hakimiyyətinin başçısı Eldar Əzizovun Azərbaycan və rus dillərində nəfis şəkildə çap olunmuş “Difai” və Gəncə Dövlət Universitetinin müəllimləri Asif Cavadov və Mübariz Əliyevin “Azərbaycan XVI-XVIII əsrlərdə” kitablarının təqdimat mərasimi də keçirilmişdir.

Gəncə Dövlət Universitetinin rektoru, professor Elman Məmmədov, akademik Siddiqə Məmmədova, AMEA-nın müxbir üzvü Fuad Əliyev, universitetin professoru Mübariz Yusifov, baş müəllim Mübariz Əliyev, prorektor Asif Cavadov, müəllimlərdən Eldar Mehdiyev, Cavid Tağıyev, YAP Gəncə şəhər təşkilatının sədri İsrafil İsmayılov, şəhər təhsil idarəsinin rəisi Mahal Əliyev və başqaları hər iki kitabın, xüsusilə tariximizin bir çox qaranlıq səhifələrinə işıq salan “Difai” kitabının əhəmiyyətindən danışmış, gənc nəslin Azərbaycan tarixinin XX əsr dövrünün öyrənilməsində onun qiymətli dərs vəsaiti olduğunu diqqətə çatdırmışlar.

Sonda dəyirmi masa iştirakçıları adından 31 mart - Azərbaycanlıların soyqırımı günü ilə əlaqədar bəyanat qəbul edilmişdir.