DÜNYA
GİROV GÖTÜRÜLƏNLƏR AZAD EDİLƏRSƏ, TERRORÇULARIN HƏYATINA ZƏMANƏT VERİLƏCƏKDİR
Girov götürülənlərin azad edilməsi üzrə operativ qərargahdan İTAR-TASS-a bildirmişlər ki, girov götürülmüş 8 uşaq oktyabrın 25-də günortaya yaxın azad edilmişdir. Elə həmin gün 7 nəfər yaşlı adam da buraxılmışdır. Terrorçuların girov saxladıqları adamların ümumi sayı təxminən 700 nəfərdir.
Girovların azad edilməsi üzrə operativ qərargahın yüksək vəzifəli nümayəndəsinin dediyinə görə, qərargahın üzvlərində artıq heç bir şübhə yoxdur ki, insanların girov götürülməsi əməliyyatı şəxsən Aslan Məshədov tərəfindən hazırlanmışdır. Səlahiyyətli orqanların əlində bunu sübut edən fakta yeni-yeni dəlillər əlavə olunur. Məsələn, Məshədov televiziya ilə sonuncu müraciətində demişdir ki, “tezliklə baş verəcək olaylar Çeçenistanda hadisələrin gedişini tamamilə dəyişəcəkdir”.
Operativ qərargah insanların həyatını xilas etmək üçün terrorçu qrupun rəhbərləri, o cümlədən Məshədovla əlaqə saxlamağa cəhd göstərmişdir. Bu barədə jurnalistlərə RF daxili işlər nazirinin müavini Vladimir Vasilyev məlumat vermişdir. O demişdir: “Biz hələlik buna nail ola bilməsək də, əlimizdən gələni edirik ki, Məshədovla, yaxud onun nümayəndələrindən biri ilə danışıqlar baş tutsun”.
FTX-nin direktoru Nikolay Patruşev Rusiya Prezidenti Vladimir Putinlə görüşdən sonra bəyan etmişdir ki, girovlar azad edilərsə, terrorçuların həyatına zəmanət veriləcəkdir. O demişdir: ”Biz danışıqlar aparırıq, əgər bu bir nəticə versə, yəni girovlar azad edilsə, danışıqları davam etdirəcəyik”.
Rusiya Prezidenti Vladimir Putin Moskvada terrorçuluq aktından sonra çeçenlərin ünvanına təhdidlərin artmasını pisləmişdir. Dövlət başçısı bu barədə Kremldə daxili işlər naziri Boris Qrızlovla və FTX-nin direktoru Nikolay Patruşevlə görüşdə demişdir. Rusiya Prezidenti “ələlxüsus əhalinin yığcam yaşadığı yerlərdə çeçenlərin ünvanına təhdidlərin artması” barədə daxili işlər nazirinə məlumat vermişdir.
Dövlət başçısı hesab edir ki,” terrorçuların əsas məqsədlərindən biri millətlər arasına nifaq salmaqdır”. Vadimir Putin vurğulamışdır ki, “Rusiyanın digər xalqlarının nümayəndələri kimi, çeçenlər, o cümlədən Çeçenistan Respublikasında yaşayan çeçenlər də Rusiyanın mənafelərini qoruyurlar və bir çox hallarda silah götürüb öz həyatları bahasına respublikalarının gələcəyi uğrunda mübarizə aparırlar. Biz hadisələrin belə mənfi istiqamətdə inkişafına heç cür yol verə bilmərik. Biz fitnələrə uymamalıyıq, heç bir qeyri qanuni hərəkət etməyə haqqımız yoxdur”.