MƏDƏNİYYƏT
Göydəniz Qəhrəmanov: Bu il qarşımızda duran əsas hədəflərdən biri Azərbaycana gələn turistlərin sayını 20 faiz artırmaqdır
Bakı, 25 yanvar, AZƏRTAC
Pandemiya dövründə ən çox ziyan çəkən sahələrdən biri turizm sektoru oldu. Demək olar ki, həmin dövrdə bizim sahənin fəaliyyəti tamamilə dayandı. Postpandemiya dövründə ən uğurlu il 2023-cü il kimi qeydə alınıb. Ötən il Azərbaycana iki milyon turist gəlib. Düşünürəm ki, bu çox uğurlu bir rəqəmdir. Çünki, yaxşı dinamika var. Həmçinin bizim yerli vətəndaşların da regionlara səfərlərində artım müşahidə olunur. Bu il qarşımızda duran əsas hədəflərdən biri Azərbaycana gələn turistlərin sayını 20 faiz artırmaqdır.
Bu fikirləri AZƏRTAC-a müsahibəsində Azərbaycan Turizm Agentlikləri Assosiasiyasının (ATAA) İdarə Heyətinin sədri Göydəniz Qəhrəmanov deyib.
Onun sözlərinə görə, bu uğurun əsasında düzgün təbliğat dayanır. “Azərbaycan beynəlxalq arenada siyasi baxımdan bir nömrədir. Çünki dövlətdə stabillik, təhlükəsizlik məsələləri yoxdursa, deməli, həmin ölkələrə turist getməyəcək. Əgər turistlər bizim ölkəyə üz tuturlarsa deməli bizə inanırlar. Burada təhlükəsizlik məsələsi çox vacib amildir. Yeri gəlmişkən deməliyəm ki, son illər Azərbaycanda keçirilən beynəlxalq tədbirlər sayəsində xarici ölkələrdə böyük təbliğatımız gedib”, - deyə ATAA-nın İdarə Heyətinin sədri vurğulayıb.