İyulun 24-də Dövlət Gömrük Komitəsinin (DGK) sədri, gömrük xidməti general-polkovniki Kəmaləddin Heydərov dünya çempionu Ağası Məmmədov, “Gömrükçü”nün və Azərbaycanın boks üzrə yığma komandasının baş məşqçisi Məmməd Eyvazov, şəxsi məşqçi Vaqif Kazımovla görüşmüşdür.

Qazanılan parlaq qələbə münasibətilə xoş arzularını dilə gətirən Kəmaləddin Heydərov Ağası Məmmədovun Tailandda keçirilən boks üzrə yarışlarda əsl tarix yazdığını məmnunluq hissi ilə söyləmiş, həm də bu qələbəni Azərbaycan idmanının dünya idmanı səviyyəsində olduğunun bariz nümunəsi kimi səciyyələndirmişdir. O qeyd etmişdir ki, Azərbaycan Prezidenti Heydər Əliyevin müəyyənləşdirdiyi tədbirlərin Milli Olimpiya Komitəsinin rəhbərliyi, şəxsən MOK-un prezidenti İlham Əliyev tərəfindən müvəffəqiyyətlə həyata keçirilməsi Azərbaycanın idman tarixinə yeni-yeni uğurların yazılmasına səbəb olmuşdur. Bütün bu qələbələrdə Milli Olimpiya Komitəsinin prezidenti İlham Əliyevin qayğı və himayəsi əsaslı rol oynayır.

Azərbaycanın boks tarixinə öz imzasını yazan Ağası Məmmədov qazandığı bu qələbəni Milli Olimpiya Komitəsinin, Dövlət Gömrük Komitəsi rəhbərliyinin göstərdiyi qayğıya cavab kimi səciyyələndirmiş və Tailandda keçirilən dünya çempionatının gedişi haqqında ətraflı məlumat vermişdir. Avropa və dünya çempionatlarında qızıl medallarının olduğunu söyləyən Ağası Məmmədov, əsas sözünü Afina Olimpiadasında deyəcəyini inamla ifadə etmişdir.

“Gömrükçü”nün və Azərbaycanın boks üzrə yığma komandasının baş məşqçisi Məmməd Eyvazov, şəxsi məşqçi Vaqif Kazımov DGK sədrini əmin etmişlər ki, hazırladıqları idmançılar qarşıdan gələn bütün beynəlxalq yarışlarda Azərbaycanın üçrəngli bayrağını yüksəklərə qaldıracaq, nəyə qadir olduqlarını əməli işləri ilə sübut edəcəklər.

Görüşün sonunda Dövlət Gömrük Komitəsinin sədri K.Heydərov Azərbaycanın boks üzrə ilk dünya çempionu Ağası Məmmədova gömrük xidməti baş leytenantı rütbəsini təqdim etmiş, onun idmanda olduğu kimi, ölkəmizin iqtisadi təhlükəsizliyinin keşiyində dayanan gömrük xidmətinin zabiti kimi də uğurlar qazanacağına əminliyini ifadə etmişdir.

X x x

Elə həmin gün Dövlət Gömrük Komitəsinin sədri Kəmaləddin Heydərov “Gömrükçü” idman-sağlamlıq mərkəzinin (İSM) idmançıları – boks üzrə yeniyetmələr arasında dünya birinciliyinin qalibi Samir Məmmədovu, Avropa birinciliyinin bürünc mükafatçıları – gənclər arasında beşqat Avropa çempionu Bəxtiyar Hacıyevi, gənclər arasında ikiqat dünya çempionu Vüqar Məmmədovu və dünya kubokunun sahibi, beynəlxalq dərəcəli idman ustası Sehriman Ağayevi qəbul etmişdir.

Kəmaləddin Heydərov Milli Olimpiya Komitəsi rəhbərliyinin qayğısına qələbələrlə cavab verən idmançılara gələcək yarışlarda daha böyük uğurlar arzulamışdır.

İdmançılar çıxış edərək onlara göstərilən etimadı daim doğruldacaqlarını dilə gətirmişlər.

Qazanılan bütün nailiyyətlərin kökündə dövlət səviyyəsində qayğının dayandığını söyləyən “Gömrükçü” İSM-nin baş direktoru Xəzər İsayev DGK rəhbərliyinə öz təşəkkürünü bildirərək, bu sahədəki uğurların davamlı olacağını vurğulamışdır.

Görüşdə qalib idmançılara komitə sədrinin müvafiq əmri ilə gömrük xidməti leytenantı rütbəsi verilmişdir.