Bakı, 11 may, AZƏRTAC

Kazanda “BİRLİK: Xatırlayır, miras alır və qürur duyuruq!” maarifləndirici layihəsi çərçivəsində Leninoqorsk şəhərinin Azərbaycan Milli-Mədəni Muxtariyyətinin və Leninoqorsk rayonunun “Birlik” təşkilatının təşkilatçılığı ilə silsilə tədbirlər keçirilib. Tədbirlər İkinci Dünya müharibəsi illərində Azərbaycan əsgərlərinin göstərdiyi şücaətlərə, onların xatirəsinin yad edilməsinə və görkəmli siyasi xadim, Azərbaycan xalqının Ümummilli Lideri Heydər Əliyevin anadan olmasının 101-ci ildönümünə həsr olunub.

AZƏRTAC “Tatarıstan” İctimai Birliyinin mətbuat xidmətinə istinadla xəbər verir ki, tədbirlərdə iştirak etmək üçün Rusiyanın müxtəlif regionlarından olan Azərbaycan Milli-Mədəni muxtariyyətlərinin, eləcə də “İnkişaf” Regionlararası Azərbaycanlılar Alyansının rəhbərləri və nümayəndələri Kazanda səfərdə olublar. Onların hamısı Tatarıstanın paytaxtına Tatarıstan Respublikasının Leninoqorsk şəhəri və Leninoqorsk vilayəti Azərbaycan Milli-Mədəni Muxtariyyətinin “Birlik” təşkilatının rəhbəri, tanınmış ictimai xadim Ramiz Məmmədovun dəvəti ilə gəliblər. O, bütün təşkilati və sponsorluq məsələlərini öz üzərinə götürüb. Bu illər ərzində Leninoqorsk şəhəri və Leninoqorsk vilayətinin “Birlik” Azərbaycan Milli-Mədəni Muxtariyyətinin layihələri çərçivəsində və onun rəhbərinin şəxsən iştirakı sayəsində kitablar nəşr edilib, nümayəndə heyətlərinin səfərləri və dostluq telekonfransları təşkil olunub və böyük xeyriyyəçilik tədbirləri həyata keçirilib.

“BİRLİK: Xatırlayır, miras alır və qürur duyuruq!” layihəsinin əlaqələndiricisi “Tatarıstan” İctimai Birliyinin sədr müavini, jurnalist və ictimai xadim Emin Ramazanovdur.

Tədbirlər Qələbə parkında “Əbədi məşəl” abidəsi və İkinci Dünya müharibəsi qəhrəmanlarının xatirəsinə ucaldılmış Xatirə stelası önünə gül dəstələri və əklillərin qoyulması ilə başlayıb. Tatarıstan tərəfindən Azərbaycan nümayəndə heyəti ilə görüşə İkinci Dünya müharibəsi, neft sənayesi veteranları, görkəmli elm xadimləri, tədqiqatçılar, akademiklər, dövlət qurumlarının nümayəndələri, yerli tarixçilər, mədəniyyət xadimləri, jurnalistlər, politoloqlar, müəllimlər və ictimai xadimlər dəvət olunub. Leninoqorsk nümayəndə heyətinə Tatarıstan Respublikasının Leninoqorsk vilayəti başçısının müşaviri Pyotr Qrin başçılıq edib.

OADKYC-ın binasında (Orduya, Aviasiyaya və Hərbi Dəniz Qüvvələrinə Könüllü Yardım Cəmiyyəti – red.) forum iştirakçıları Tatarıstan Respublikası Veteranlar İttifaqının iclasında iştirak edib, həmçinin muzeydəki eksponatlarla tanış olublar. Burada Tatarıstan Veteranlar İttifaqının və veteranların fəaliyyətinə, həmçinin Sovet İttifaqının digər xalqları ilə birlikdə düşmən üzərində qələbəyə töhfə vermiş Azərbaycandan olan İkinci Dünya müharibəsi qəhrəmanlarına həsr olunmuş xatirə sərgisinin stendinin təntənəli açılışı olub. Qeyd olunub ki, Azərbaycan xalqının 640 mindən çox oğlu və qızı cəbhəyə yollanıb, onlardan 340 mini həlak olub. Eyni zamanda, Azərbaycandan cəbhəyə gedən və döyüş meydanlarında qəhrəmanlıq göstərən 130 nəfər ən yüksək ada - Sovet İttifaqı Qəhrəmanı adına layiq görülüb. Sərgi onların şücaətini nümayiş etdirib və qəhrəmanlara hörmətin təzahürü olub.

Qeyd edək ki, Ramiz Məmmədovun atası, II Dünya müharibəsi veteranı Mustafa Yusub oğlu Məmmədov nasist Almaniyasının SSRİ-yə müharibə elan etməsindən sonra könüllü olaraq cəbhəyə yollanıb. O, “Kiçik torpaq”da Tatarıstandan olan əsgər yoldaşları ilə çiyin-çiyinə döyüşüb, “Qəhrəman şəhərlər” adını almış Kerç və Novorossiysk şəhərlərini faşist işğalçılarından müdafiə edib, üç dəfə yaralanıb, mürəkkəb cərrahiyyə əməliyyatı keçirib, amma ruhən möhkəm qalıb. Mustafa Məmmədov sağaldıqdan sonra 18-ci Ordunun əfsanəvi 77-ci Azərbaycan diviziyasının tərkibində Berlinin alınması ilə müharibəni başa vurub. O, göstərdiyi igidliyə və şücaətə görə üçüncü və ikinci dərəcəli “Şöhrət” ordeni, “Vətən müharibəsi” ordeni və bir çox medallarla təltif edilib. Mükafatlardan biri də “Qafqazın müdafiəsinə görə” medalı olub.

“Tatarıstan Respublikası Veteranlar İttifaqı” Respublika veteranların (əlillərin) İctimai Təşkilatı komitəsinin sədri, general-mayor Aleksandr Borodin çıxışında tədbirin iştirakçılarına və təşkilatçılarına qəhrəmanların və veteranların tarixi yaddaşının qorunmasına görə minnətdarlığını bildirib.

Aleksandr Borodin deyib: “Bu gün təşkilatımız üçün böyük, əsl bayramdır. Biz Azərbaycandan və Rusiyanın regionlarından olan dostlarla, yoldaşlarla görüşdük. Onların fəaliyyəti və aktiv işləri ilə tanış olduq, özümüz gördüyümüz işləri paylaşdıq. 9 May - Qələbə Gününün 79-cu ildönümü ərəfəsində hər kəsə sülh və firavanlıq, dostluq və hamının birlikdə həll etməli olduğu bütün vəzifələrin yerinə yetirilməsini arzulayıram”.

Patris Lumumba adına Rusiya Xalqlar Dostluğu Universitetinin Kütləvi kommunikasiyalar kafedrasının dosenti, jurnalist, politoloq, “Heydər Əliyev: Qəlbimin bir hissəsi Rusiyadadır” sənədli filminin müəllifi Anar Həsənov çıxışında qeyd edib: “Leninoqorsk vilayətinin “Birlik” qeyri-hökumət təşkilatının təşkil etdiyi tədbir böyük ictimai əhəmiyyət kəsb edir. İkinci Dünya müharibəsinin tarixi heç də bütün ölkələrdə obyektiv təqdim olunmur. Bu gün biz “Əbədi məşəl” önünə əklillərin qoyulmasında iştirak etdik, bu, bizim Kazana səfərimizin mühüm hissəsidir. Daha sonra Veteranlar Şurasında keçirilən görüşdə bir çox ləyaqətli insanlar iştirak edib. Tədbirlərin proqramını belə incə, siyasi cəhətdən düzgün və gözəl tərtib etdiyinə görə Ramiz Məmmədova minnətdaram. Gördüklərimiz təəccüb doğurdu. Tatarıstan veteranları ilə ünsiyyətdə olarkən, biz yeni şeylər öyrəndik”.

Forum Tatarıstan Respublikası Ticarət-Sənaye Palatasının tarixi binasının Konqres zalında işini davam etdirib. Burada görkəmli siyasi xadim Heydər Əliyevin anadan olmasının 101-ci ildönümünə və onun SSRİ, Rusiya və Azərbaycanın inkişafında roluna həsr olunmuş dəyirmi masa keçirilib, habelə “Heydər Əliyev: Qəlbimin bir hissəsi Rusiyadadır” sənədli filmi nümayiş etdirilib. Tədbir çərçivəsində Ticarət Palatasının zalında Heydər Əliyevin Azərbaycan xalqının tarixinə və gələcəyinə mühüm töhfələr vermiş siyasətçi, lider və şəxsiyyət kimi fəaliyyətinə həsr olunmuş fotosərgi təşkil olunub. Həmçinin Heydər Əliyev Fondunun Rusiyadakı nümayəndəliyinin təqdim etdiyi Ümummilli Lider haqqında kitabların sərgisi təşkil edilib.

“Tatarıstan Respublikası Ticarət və Sənaye Palatası” İttifaqı sədrinin birinci müavini Artur Nikolayev təşkilatın rəhbərliyi adından dəyirmi masa iştirakçılarını salamlayıb və Ticarət və Sənaye Palatasının binasında belə bir əlamətdar tədbirin keçirilməsinə görə minnətdarlığını bildirib. O vurğulayıb: “Bugünkü qarşılıqlı münasibətlərin möhkəmləndirilməsinin əsasında Heydər Əliyev şəxsiyyəti dayanır. O, Baykal-Amur magistralının açılışında iştirak edib. Heydər Əliyev infrastruktur yaradır, insanların rahat və əmin-amanlıq şəraitində yaşaması üçün çalışırdı. Bu gün “Texnopolis Ximqrad” Azərbaycanın sənaye müəssisələri ilə fəal işləyir. Birbaşa aviareyslərin olması iqtisadi-ticari əməkdaşlığa da töhfə verir. Bu, beynəlxalq əməkdaşlıqdır”.