MƏDƏNİYYƏT
Kukla Teatrında “Turp” tamaşası hazırlanır
Bakı, 10 fevral, AZƏRTAC
Daim repertuarında yeniliklər edən Azərbaycan Dövlət Kukla Teatrının 2017-ci il üçün nəzərdə tutduğu yaradıcılıq planı da zəngindir. Əsas etibarilə milli və dünya klassik nağıl nümunələrinə yer ayıran teatrda tamaşaçılar bu dəfə də fərqli və dinamik səhnə yozumunu görə biləcəklər.
Teatrın mətbuat xidmətindən AZƏRTAC-a bildirilib ki, yaradıcı heyət bu dəfə məşhur rus xalq nağılı “Turp”a müraciət edib. Artıq tamaşanın məşqlərinə başlanılıb.
Klassik xətti qorunub saxlanılan tamaşa yeni obrazlar artırılmaqla dramaturji baxımdan daha da zənginləşdirilib. Belə ki, bu tamaşada nağılda qeyd olunan qəhrəmanlarla yanaşı, üç yeni obrazı – Müqəvva, Qarğa və Siçanın “atası”nı görmək mümkün olacaq.
“Güc birlikdədir” ideyasını əsas götürən tamaşaya teatrın baş rejissoru Qurban Məsimov quruluş verir. Vizual elementlər və rəngarəng musiqilərlə zəngin səhnə işinin rəssamı Rəvanə Yaqubova, bəstəkarı Vüqar Camalzadədir.
Teatrın aparıcı aktyoru, Əməkdar Artist Rəhman Rəhmanovun 60 illik yubileyi münasibətilə hazırlanan birhissəli uşaq tamaşasında qolçaq kuklalardan istifadə olunur.
Martın əvvəllərində premyerası baş tutacaq tamaşada rolları Cəmilə Allahverdiyeva, Cavid Telman, Aygül Ağayeva, Nərmin Əhmədova, Samirə Nəcəfova, Vüsal Hüseynov, Elnur Əliyev və Firuzə Nəsibli ifa edirlər.