SİYASƏT
MİLLİ MƏCLİSDƏ QƏBUL
Martın 7-də Milli Məclisin sədri Murtuz Ələsgərov ATƏT-in hazırkı sədri, Portuqaliyanın dövlət naziri xarici işlər naziri Jaymi Qamanı və onu müşayiət edən şəxsləri qəbul etmişdir.
Murtuz Ələsgərov ümidvar olduğunu bildirdi ki, Jaymi Qamanın regionumuza səfəri Ermənistan-Azərbaycan, Dağlıq Qarabağ münaqişəsinin tezliklə nizama salınmasına kömək edəcəkdir.
Azərbaycan parlamentinin başçısı münaqişənin həllində ATƏT-in Minsk qrupunun fəaliyyətindən ətraflı danışdı. O dedi: Təəssüf ki, bu təşkilatın 10 illik fəaliyyəti ərzində heç bir irəliləyiş əldə edilməmişdir, bu isə ölkə ictimaiyyətində çox böyük narahatlığa səbəb olur. ATƏT Dnestryanı bölgə və gürcü-abxaz münaqişələri ilə əlaqədar Moldova və Gürcüstanın sərhədlərinin toxunulmazlığını açıq bəyan etdiyi halda, Azərbaycan barəsində ikili standartlar siyasəti yeridilir. Bu hal təəcüb doğurur, axı, ATƏT Helsinki aktı əsasında fəaliyyət göstərir. Həmin aktın əsas prinsipləri isə dövlətlərin ərazi bütövlüyü və sərhədlərin toxunulmazlığıdır.
Murtuz Ələsgərov bu faktları nəzərə çarpdıraraq dedi ki, Avropa təşkilatlarının yeritdikləri ikili standartlar siyasəti ancaq ermənilərin xeyrinədir və onlar bundan istifadə edərək, ölkəmizin işğal olunmuş ərazilərini zorakılıqla qəsb etməyə və öz terror əməllərini maneəsiz həyata keçirməyə çalışırlar. Ötən ilin 11 sentyabr hadisələrindən sonra antiterror koalisiyasına qoşulan və daim hər cür terror təzahürlərinə qarşı çıxış edən Azərbaycan keçən əsrdə erməni terrorçuları ilə mübarizədə özünün minlərlə vətəndaşını itirmişdir.
Milli Məclisin sədri həmçinin vurğuladı ki, hələ 1996-cı ildə ATƏT-in Lissabon zirvə toplantısında Azərbaycan Prezidenti Heydər Əliyev münaqişənin həllinin üç əsas prinsipini - Azərbaycanın və Ermənistanın ərazi bütövlüyünün tanınması, Dağlıq Qarabağa Azərbaycanın tərkibində yüksək muxtariyyət statusu verilməsi və əhalinin təhlükəsizliyinin təmin olunması prinsiplərini təklif etmişdi. İşğal olunmuş ərazilərin qeyd-şərtsiz azad edilməsi haqqında BMT Təhlükəsizlik Şurasının dörd qətnaməsinə indiyədək məhəl qoymayan Ermənistandan savayı, toplantıda iştirak edən bütün dövlətlər bu prinsipləri dəstəklədilər. Murtuz Ələsgərov dedi ki, münaqişənin həlli ilə bilavasitə məşğul olan təşkilat kimi, ATƏT bu prinsipləri əsas tutmalıdır.
Jaymi Qama səmimi qəbula görə Milli Məclisin sədrinə təşəkkürünü bildirərək, ATƏT-in Azərbaycanla əməkdaşlığının səviyyəsini yüksək qiymətləndirdi. O, həmçinin qeyd etdi ki, bu təşkilat demokratik islahatların dərinləşdirilməsi proqramının həyata keçirilməsi üçün ölkəmizə yardım göstərmək niyyətindədir.
ATƏT-in hazırkı sədri dedi ki, insan hüquqları konvensiyasının ratifikasiya edilməsi və kütləvi informasiya vasitələrinin hüquqlarının qorunması sahəsində islahatlar demokratikləşdirmə yolunda böyük nailiyyətlərdir.
Jaymi Qama Dağlıq Qarabağ münaqişəsinin həlli məsələsinə toxunaraq bildirdi ki, ATƏT-in Minsk qrupunun həmsədrləri regiona gələcəklər və həmin səfərdən başlıca məqsəd danışıqlar prosesinin daimiliyini təmin etməkdir. Jaymi Qama dedi ki, beynəlxalq təşkilatlar münaqişə tərəfləri arasında danışıqlar prosesinin təmin edilməsi üçün ancaq bir vasitədir, problemin həlli isə bilavasitə Azərbaycandan və Ermənistandan asılıdır.
Tərəflər münaqişənin dincliklə nizama salınmasının perspektivləri ilə əlaqədar nikbinlik bildirdilər.