Hörmətli xanım Əliyeva!

Hörmətli dostlar!

Prezidentlərə verilmiş səlahiyyətlərə görə biz - rəsmi, işgüzar səfərlər, dövlət səfərləri edirik. Bu səfərlərin hamısının öz trafaretləri, təşkili və keçirilməsinin sxemləri var. İlk baxışda hər şey məlumdur, aydındır və artıq mənimsənilmişdir. Lakin elə ölkələr, elə xalqlar var ki, onların yanına xüsusi ovqatla getmək, onları görmək, onlarla ünsiyyətdə olmaq istəyirsən. Azərbaycan ilə Moldova arasında tarixən çox gözəl münasibətlər yaranmışdır. Tarixə nəzər salsaq, biz istər sovet hakimiyyətindən əvvəl, istərsə də sovet dövründə çox sahələr üzrə əməkdaşlıq edir, çox məsələləri həll edirdik. İndi, bizim müstəqil suveren dövlətlər qurmaq kimi tarixi şansımız olduğu bir vaxtda bu əlaqələr xüsusilə güclənmişdir.

Mənə Heydər Əlirza oğlunu 1974-cü ildən tanımaq səadəti nəsib olmuşdur. Onunla ilk dəfə 1974-cü ildə görüşmüşəm, sonra isə müxtəlif mərhələlərdə onun çıxışlarını dinləmişəm. Mən İctimai Elmlər Akademiyasında oxuyanda, o, SSRİ Nazirlər Soveti sədrinin birinci müavini olduğu vaxt onun mühazirələrini dinləmişəm. Heydər Əliyev bu vəzifəyə təyin ediləndən cəmi ay yarım sonra bizə Sovet İttifaqında nəqliyyatın vəziyyəti barədə mühazirələr oxuyurdu. Onun erudisiyası, bu ay yarım müddətində məsələni nəinki bu qədər dərindən öyrənməsi, həm də Sovet İttifaqında nəqliyyat sahəsində vəziyyətin mahiyyətini və onun gərgin olmasını bu qədər dərindən başa düşməsi məni valeh etmişdi. İndi də mən Azərbaycan Prezidenti İlham Əliyevlə aramızda yaranan münasibətlərdən, ölkələrimizin ikitərəfli münasibətlərinin inkişafından çox razıyam.

Bu gün ikitərəfli sənədlər paketi genişlənmişdir, ikitərəfli münasibətlərimiz üçün çox yaxşı normativ baza var. Ən başlıcası isə, şəxsiyyətlərarası səviyyədə, təkcə biz prezidentlər arasında deyil, həm də hökumətlər arasında, iqtisadi strukturlar, Moldovanın vətəndaşları ilə ölkəmizdə Azərbaycan diasporunu təşkil edən Azərbaycan vətəndaşları arasında qarşılıqlı anlaşma var. Biz bu münasibətlər əsasında inkişaf edə, irəliləyə bilərik və bunu etməliyik.

Bu gün mən sizin ölkənizdə, sözün hərfi mənasında, cəmi bir neçə ildə, 2004-cü ildən bəri baş vermiş dəyişikliklərə ürəkdən heyran olduğumu bildirmişəm. Bəlkə də, mən hər şeyi görməmişəm. Əlbəttə, hər şeyi görmək mümkün deyil, xüsusən də avtomobilin pəncərəsindən. Lakin gördüklərim məni, sadəcə, valeh etmişdir. Sizə deyirəm: Bakıda gördüyünüz işlər və İlham Heydər oğlundan eşitdiklərim ağlasığmazdır. Sizə, sadəcə, afərin deyirəm ki, bu cür işlər bütün ölkədə görülür. Mən hətta zarafatyana soruşdum: “İlham Heydər oğlunun mənə danışdığı bütün işləri bir neçə ildə görəndən, bütün problemləri həll edəndən, bütün planları həyata keçirəndən sonra nə edəcəksiniz?”. Zənnimcə, Azərbaycanın çox yaxşı perspektivləri var. Azərbaycanın dünya birliyində perspektivləri çox maraqlı və əhəmiyyətli olacaqdır. Mən istəyirəm ki, separatizmə tezliklə son qoyulsun. Bizim dostluğumuz kiminsə əleyhinə yönəlməyibdir. Bizim tarixi əlaqələrimiz qədimdir - bu əlaqələr sovet illərində, Heydər Əliyeviçin rəhbərlik etdiyi dövrdə, hələ heç kəsin heç bir separatçı niyyətə düşmədiyi vaxtlarda da mövcud olmuşdur. Ona görə də biz istəyirik ki, bu separatçılıq dövrü başa çatsın, axı biz də separatizmdən əziyyət çəkirik. Biz sizin ağrılarınızı hiss edirik, çünki bu, həm də bizim ağrımızdır. Səhər yuxudan oyanandan ta gecə yatana qədər bu ağrı bizimlədir, keçib getmir. Çünki biz problemi həll etməyincə, ona çarə qılmayınca, ölkəmizin bütövlüyünü bərpa etməyincə bu ağrı keçib gedə bilməz. Mən Sizə də bunları arzulayıram.

Kosovo sxeminə oxşar müxtəlif variantlar heç vaxt heç kimə yaramaz. Dövlət quruculuğu məsələlərini bu cür prinsiplər üzrə həll etmək olmaz. İlham Heydər oğlu, biz sizin səmimi dostlarınızıq. Biz sizin hamınıza səmimi qəlbdən uğurlar, yeni, müasir Azərbaycanın qurulmasında səmərəli nəticələr arzulayırıq.

Mən Sizin sağlığınıza, Sizin xanımınızın sağlığına, Sizin bütün yoldaşlarınızın sağlığına, bütün Azərbaycan xalqının sağlığına badə qaldırıram.

######