İQTİSADİYYAT
MOSKVADAKI AZƏRBAYCAN BEYNƏLXALQ BANKI RUSİYANIN 200 İRİ BANKI SIRASINA DAXİL OLDU
Moskvadakı Azərbaycan Beynəlxalq Bankı (ABB) öz kapitalına görə (10 milyon avro) Rusiyanın 200 iri bankı sırasına daxil olmuşdur. Sonuncu reytinq məlumatlarına görə, ABB Rusiyanın aparıcı bankları arasında 177-ci yeri tutur. Bunu AZƏRTAC-ın müxbirinə ABB-nin Moskva ofisi idarə heyətinin sədri Fuad Abdullayev bildirmişdir. Onun sözlərinə görə, cəmi 6 ay bundan əvvəl yaradılmış bank üçün bu, çox yaxşı göstəricidir, çünki Rusiyada 1300-dən artıq bank qeydə alınmışdır.
Bundan əlavə, ABB-nin Moskva ofisi ikinci rüb ərzində Rusiya Bankları Assosiasiyasının tam hüquqlu üzvü olmuş, Moskva Bank Şurasına daxil olmuş, Rusiya Ticarət-Sənaye Palatasına qəbul edilmiş, habelə Rusiyadakı Amerika Tiçarət Palatasının üzvü olmuşdur. Bununla yanaşı, ABB hazırda Rusiya Ticarət-Sənaye Palatasının MDB ölkələri üzrə xüsusi komitəsinin də üzvüdür və bu komitə çərcivəsində əməkdaşlığın səmərəliliyini artırmaq və inteqrasiya proseslərini sürətləndirmək üçün həmin struktura daxil olan banklarla fəal iş aparacaqdır.
F.Abdullayev ikinci rübün yekunlarını şərh edərək bildirmişdir ki, bu müddət ərzində ABB-nin Rusiya bazarında mövqelərinin möhkəmlənməsində müsbət dəyişikliklər baş vermişdir. Bankın müştəri bazası xeyli genişlənmiş və artıq ikinci rübün əvvəli üçün bankda hüquqi şəxslərin 65-dən çox hesabı açılmışdır. Bu hesabların qalıqları isə təxminən 10 milyon rubl təşkil edir. Kredit portfelinin həcmi artaraq, rübün əvvəli üçün təxminən 180 min ABŞ dolları təşkil etmişdir ki, bu da, öz növbəsində, gələcəkdə Rusiya iqtisadiyyatına investisiya ayırmağa, habelə ayrı-ayrı kredit proqramlarını həyata keçirməyə imkan verəcəkdir.
F.Abdullayev bildirmişdir ki, ikinci rübdə bankın ümumi gəliri 31 milyon 400 min rubl (təxminən 1 milyon ABŞ dolları) təşkil etmişdir.
F.Abdullayev ötən rüb ərzində pul köçürmələri üzrə işi bankın ən uğurlu fəaliyyət sahəsi adlandırmışdır. Belə ki, bütövlükdə, Azərbaycana 695 min dollar, Azərbaycandan Rusiyaya isə 285 min dollar köçürülmüş, yəni ümumi məbləğ 980 min ABŞ dollarına çatmışdır. Beləliklə, köçürmələrin sayı 62 faiz, məbləği isə 80 faiz artmışdır. Azərbaycanla Rusiya arasında ödəmələrin 80 faizi Moskvadakı ABB tərəfindən həyata keçirilir və bu istiqamətdə iş davam edir. İki dövlətin bank sistemləri arasında əməkdaşlığın daha geniş miqyas alması üçün ABB öz fəaliyyətinə həm Azərbaycan, həm də Rusiya banklarını cəlb etmək niyyətindədir.
Asya Hacızadə
AZƏRTAC-ın xüsusi müxbiri
Moskva