REGİONLAR
MÜSABİQƏLİ QRANTLAR PROQRAMI ÜZRƏ SEMİNAR KEÇİRİLMİŞDİR
Təsərrüfatında Özəl Bölmənin İnkişafına Yardım Agentliyi və Respublika Kənd Təsərrüfatı Nazirliyi Bərdə və Tərtər rayonlarının kəndli fermer təsərrüfatlarında Müsabiqəli Qrantlar Proqramı üzrə birgə seminar keçirmişlər.
Kənd Təsərrüfatı Tədqiqatları Şurası Katibliyinin rəhbəri Məmmədzadə Nəbiyev seminarı açaraq dedi ki, dünya şöhrətli alim, akademik Cəlal Əliyevin taxılçılıq sahəsində əldə etdiyi uğurlu nəticələr Azərbaycanın kənd təsərrüfatı elminə böyük şöhrət gətirmiş, neçə-neçə elmi proqramların və layihələrin həyata vəsiqə almasında mühüm rol oynamışdır.
2000-ci ilin ortalarından Azərbaycanda həyata keçirilən Müsabiqəli Qrantlar Proqramı /MQP/ da akademik Cəlal Əliyevin gərgin zəhməti, xarici həmkarları ilə çoxsaylı görüşləri, bu sahədə əvəzsiz xidmətləri sayəsində Kənd Təsərrüfatının İnkişafı və Kreditləşdirilməsi Layihəsinin tərkibinə daxil edilmişdir və ilk dəfədir ki, bu proqram vasitəsilə Azərbaycanın aqrar elminə sərmayə qoyulur.
M.Nəbiyev Müsabiqəli Qrantlar Proqramının kənd təsərrüfatı tədqiqatlarının və texnologiyalarının ötürülməsi sisteminin bazar iqtisadiyyatının tələblərinə uyğunlaşdırılmasında və inkişaf etdirilməsində ilkin mərhələ olduğunu vurğulayaraq bildirdi ki, bu Proqram aqrar bölmənin və elmi araşdırmaların əsas istiqamətlərinin müəyyən edilməsi və ən səmərəli tətbiqi tədqiqatların seçilərək maliyyələşdirilməsini nəzərdə tutur, elmi tədqiqatların strateji dəyərini, keyfiyyətini və davamlılığını təmin etməklə yanaşı, tədqiqat müəssisələrinin maddi-texniki bazasının və kadr potensialının gücləndirilməsinə, yeni texnologiyalardan istifadədə fermerlərin bilik və vərdişlərinin təkmilləşdirilməsinə, iqtisadi səmərənin artırılmasına xidmət edir.
Natiq dedi ki, hazırda akademik Cəlal Əliyevin əvəzsiz xidmətləri sayəsində taxılçılıqda fundamental, strateji və tətbiqi tədqiqatların qaynaqlarından süzülüb gələn elə yeni məhsuldar sortlar, texnologiyalar hazırlanmış, onların tətbiqi və yayılması ilə bağlı elə mexanizm yaranmışdır ki, onun yaxın illərdə respublikamızın bütün fermer təsərrüfatlarını tam əhatə edəcəyi şübhəsizdir.
Seminarda qeyd olundu ki, MQP vasitəsilə maliyyələşdirilməsi nəzərdə tutulan elmi tədqiqat layihələri bilavasitə fermer sahələrində həyata keçirilir. Bu da ilk növbədə onlarin yeni bilik və vərdişlər qazanmalarına yaxşı şərait yaradır. Bu prosesdə fermer, bir növ, “tədqiqatçı”ya çevrilir. Layihədə iştirak edən çoxsaylı fermer təsərrüfatları həm yeni təcrübə qazanır, həm də milli tədqiqat sisteminin ayrı-ayrı bölgələrdəki özəkləri və təcrübə-sınaq mərkəzləri kimi fəaliyyət göstərməyə başlayır, texnologiyanın yayılmasında və ötürülməsində mühüm rol oynayırlar.
MQP üzrə Azərbaycan Aqroelm Mərkəzinin baş direktoru, “Buğda istehsalının artırılmasının səmərəli texnologiyası” layihəsinin rəhbəri Əsəd Musayev, “Buğda sortlarının fermerlərin iştirakı ilə seçilib yayılması” layhəsinin rəhbəri Cavanşir Təlayi, “Buğdanın davamlı toxumçuluq sisteminin yaradılması” layihəsinin aparıcı mütəxəssisi Rəsid Namazov seminarda çıxış edərək, iştirakçıları həmin sənədlərlə tanış etdilər.
Bərdə rayonunun Yeni Daşkənd kəndində fermer Səttar İsmayılovun 4 hektar sahədə əkilmiş “Qiymətli”, “Bərəkətli”, “Əkinçi”, “Nurlu”, “Tərtər” buğda sortları və onların becərilməsinin səmərəli texnologiyası seminar iştirakçıları qarşısında nümayiş etdirildi. Həmin sahədə qazanılmış müsbət nəticələr onunla əlaqələndirildi ki, burada bütün texnologiya fermerin bilavasitə özünün iştirakı ilə həyata keçirilmişdir.
Zümürxaç kəndində fermer Kərim Abbasovun sahəsində “Buğdanın davamlı toxumçuluq sisteminin yaradılması” və “Buğda istehsalının artırılmasının səmərəli texnologiyası” layihələrinin tətbiqinin uğurlu nəticələri də maraqla qarşılandı. Fermerin “Qiymətli” və “Turan” sortlarının əkildiyi 5 hektar toxumçuluq sahəsinin hər hektarından 6,5-7,0 ton məhsul götürüləcəyi heç kəsdə şübhə doğurmadi.
Seminarda Kənd Təsərrüfatı Nazirliyinin idarə və şöbə rəisləri, aqrar sahənin alimləri, qonşu rayonların fermerləri ilə yanaşı, respublikamızda fəaliyyət göstərən Beynəlxalq təşkilatların nümayəndələri də iştirak edirdilər.