AZƏRTAC-ın müxbiri xəbər verir ki, Naxçıvan Muxtar Respublikası Mərkəzi Seçki Komissiyasında Azərbaycan Beynəlxalq Mətbuat Klubu və ABŞ Beynəlxalq İnkişaf Agentliyinin yardımı ilə Azərbaycan Respublikasında seçki praktikasının təkmilləşdirilməsinə dair seminar-müşavirə keçirilmişdir.

Naxçıvan Muxtar Respublikası icra strukturlarının, hüquq mühafizə orqanlarının, məntəqə və dairə seçki komissiyaları sədrlərinin, kütləvi informasiya vasitələri nümayəndələrinin iştirak etdiyi seminar-müşavirədə bildirilmişdir ki, tədbirdən əsas məqsəd Azərbaycan Prezidentinin seçki praktikasının təkmilləşdirilməsinə dair Sərəncamından irəli gələn vəzifələri parlament seçkilərinin keçirilməsinə cəlb olunan məsul şəxslərə bir daha izah etməkdən və bununla da parlament seçkilərinin demokratik və beynəlxalq standartlara uyğun keçirilməsinə nail olmaqdan ibarətdir.

Hazırda muxtar respublikada seçicilərin 95 faizi seçici vəsiqəsilə təmin edilmiş, 275 seçki məntəqəsinin hamısı rabitə xətti ilə təchiz olunmuşdur.

Azərbaycan Respublikası Prezidentinin İcra Aparatının ictimai-siyasi şöbəsinin sektor müdiri Tahir Süleymanov Azərbaycanda demokratik seçkilər keçirilməsi üçün hər cür şərait yaradıldığını vurğulamışdır.

ABŞ Beynəlxalq İnkişaf Agentliyinin nümayəndəsi Kristofer Şilds təmsil etdiyi təşkilatın müxtəlif ölkələrdə keçirilən seçkilərin təkmilləşdirilməsinə yardım göstərdiyini diqqətə çatdırmış, bu tədbirin təşkilinə köməyinə görə Naxçıvan Muxtar Respublikasının hakimiyyət orqanlarına təşəkkürünü bildirmişdir.

Azərbaycan Respublilkası Mərkəzi Seçki Komissiyasının, Daxili İşlər Nazirliyinin və Ədliyyə Nazirliyinin nümayəndələri tədbir iştirakçılarının suallarına cavab vermişlər.