SİYASƏT
Naxçıvan Muxtar Respublikasının Bakı şəhərində Daimi Nümayəndəliyində Milli Qurtuluş Günü münasibətilə tədbir keçirilmişdir
Bakı, 13 iyun (AZƏRTAC). İyunun 13-də Naxçıvan Muxtar Respublikasının Bakı şəhərində Daimi Nümayəndəliyində 15 İyun - Milli Qurtuluş Günü münasibətilə tədbir keçirilmişdir.
AZƏRTAC xəbər verir ki, tədbir iştirakçıları əvvəlcə Milli Qurtuluş Günündən bəhs edən kitab, qəzet və jurnallardan ibarət sərgi ilə tanış olmuşlar. Daha sonra nümayəndəlikdə yeni yaradılmış Kitab Fondunun açılışı olmuşdur. Fondda ümummilli lider Heydər Əliyevin, Prezident İlham Əliyevin həyat və fəaliyyəti, eləcə də Naxçıvan Muxtar Respublikası haqqında çoxsaylı kitablar toplanmışdır.
Tədbirdə çıxış edən Naxçıvan Muxtar Respublikasının Bakı şəhərində daimi nümayəndəsi Bəxtiyar Əsgərov ulu öndər Heydər Əliyevin 1990-cı ilin iyulunda Moskvadan Vətənə qayıtmasından başlamış, 1993-cü ilin iyununda xilaskar missiyası ilə Naxçıvandan Bakıya gəlməsinədək olan dövrlər haqqında ətraflı məlumat vermişdir.
Milli Qurtuluş Gününün tarixi əhəmiyyətindən, müasir müstəqil dövlətimizin qurulmasında və möhkəmlənməsində ümummilli lider Heydər Əliyevin misilsiz xidmətlərindən bəhs edən B.Əsgərov xatırlatmışdır ki, ötən əsrin 90-cı illərinin əvvəllərində Azərbaycana rəhbərlik etmiş qüvvələrin səriştəsizliyi və bacarıqsızlığı müstəqilliyini yeni bərpa etmiş ölkəmizi uçuruma doğru aparırdı. 1993-cü ilin iyununda böhran son həddə çatmış, ölkə parçalanmaq və məhv olmaq təhlükəsi ilə üz-üzə qalmışdı. Belə bir ağır, taleyüklü məqamda xalqımız birləşərək öz iradəsini ortaya qoymuş, təkidlə Ümummilli Liderin hakimiyyətə qayıdışını tələb etmişdi. Azərbaycan xalqının səsinə səs verən Ulu Öndər iyunun 15-də hakimiyyətə qayıdışı ilə ölkəmizin həyatında yeni bir mərhələnin əsasını qoydu. Öz uzaqgörən və müdrik siyasəti ilə xalqı düşdüyü ağır vəziyyətdən, Azərbaycanı isə dünya xəritəsindən silinmək təhlükəsindən xilas edərək böyük tarixi missiyanı şərəflə yerinə yetirdi.
B.Əsgərov qeyd etmişdir ki, Azərbaycanın mürəkkəb kataklizmlərlə müşayiət edilən dərin siyasi böhrandan qurtulması məhz Ulu Öndərin hakimiyyətə qayıdışı sayəsində mümkün olmuşdur. Ümummilli lider Heydər Əliyev zəngin dövlətçilik təcrübəsinə əsaslanaraq istinad etdiyi rasional seçim strategiyası və bunun fonunda atdığı mühüm strateji addımlar hesabına ölkədə hökm sürən dağıdıcı proseslərin mərhələli şəkildə neytrallaşdıra bildi. Çox keçmədən respublikamızda ictimai-siyasi sabitlik bərpa olundu, vətəndaş müharibəsinin qarşısı alındı, separatçı qüvvələr zərərsizləşdirildi, demokratik dövlət quruculuğu prosesinə başlanıldı. Ölkəmizin sosial-iqtisadi, elmi-mədəni həyatında, beynəlxalq əlaqələrində dönüş yarandı. Müstəqillik, azərbaycançılıq, ədalət, demokratiya, milli tərəqqi, dünyəvilik kimi ümumbəşəri dəyərlərə söykənən qabaqcıl ideologiya dövlət quruculuğu prosesinin aparıcı siyasi xəttinə çevrildi. Dahi şəxsiyyətin xarici siyasətdə atdığı qətiyyətli addımlar sayəsində diplomatiyamızın fəal mövqeyi formalaşdı, ən mühüm problemimiz olan Ermənistan-Azərbaycan, Dağlıq Qarabağ münaqişəsinə dünya ictimaiyyətinin münasibəti dəyişdi, ölkəmizin suverenliyi, ərazi bütövlüyü və sərhədlərinin toxunulmazlığı bütün beynəlxalq hüquqi-normativ sənədlərdə öz əksini tapdı. Azərbaycan dünya birliyinin layiqli üzvünə çevrildi.
Vurğulanmışdır ki, Ulu Öndər hakimiyyətinin hər iki dövründə ümumxalq mənafeyindən çıxış etmiş və bu amal uğrunda əlindən gələni əsirgəməmişdir. Məhz buna görə də Heydər Əliyev hələ sağlığında Azərbaycan xalqının qəlbində özünə möhtəşəm bir abidə ucaldaraq canlı əfsanəyə çevrilmişdir.
1993-cü il 15 iyun gününün müstəqillik salnaməsinə şanlı və parlaq səhifə kimi yazıldığını vurğulayan B.Əsgərov bu tarixi, eyni zamanda, müasir Azərbaycan dövlətçiliyinin xilası günü kimi səciyyələndirmişdir. O qeyd etmişdir ki, Heydər Əliyev irsinə müasir dövrümüzdə böyük maraq və məhəbbətin yaranması, Ulu Öndərin siyasi fəaliyyətinin daha dərindən araşdırılması məhz bu amillərdən qaynaqlanır.
Naxçıvan Muxtar Respublikasının Bakı şəhərində daimi nümayəndəsi diqqətə çatdırmışdır ki, ümummilli lider Heydər Əliyevin əsasını qoyduğu inkişaf strategiyasının Prezident İlham Əliyev tərəfindən uğurla davam etdirilməsi nəticəsində ölkəmiz Cənubi Qafqaz regionunun lider dövlətinə çevrilmişdir.
B.Əsgərov, həmçinin Naxçıvan Muxtar Respublikasının inkişafının hər zaman ümummilli lider Heydər Əliyevin və Prezident İlham Əliyevin diqqət mərkəzində olduğunu vurğulamışdır. O, son vaxtlar muxtar respublikanın sürətlə inkişafının təmin edilməsi istiqamətində Ali Məclisin Sədri Vasif Talıbovun rəhbərliyi ilə həyata keçirilən tədbirlər, irimiqyaslı quruculuq işləri barədə də ətraflı məlumat vermişdir.