REGİONLAR
Naxçıvanın 2015-2020-ci illərdə keçdiyi inkişaf yolunu əks etdirən “Əsrə bərabər illər” kitabının təqdimatı keçirilib
Naxçıvan, 1 oktyabr, AZƏRTAC
AMEA-nın Naxçıvan Bölməsində Naxçıvan Muxtar Respublikası Televiziya və Radio Şurasının sədri, AZƏRTAC-ın Naxçıvan bürosunun rəhbəri Rauf Əliyevin (Kəngərlinin) “Əsrə bərabər illər” kitabının təqdimatı keçirilib.
AZƏRTAC-ın Naxçıvan bürosu xəbər verir ki, tədbirdə çıxış edən AMEA Naxçıvan Bölməsinin sədri, akademik İsmayıl Hacıyev yeni nəşrin əhəmiyyətindən söz açıb. Qeyd olunub ki, kitabda istedadlı jurnalist Rauf Əliyevin AZƏRTAC-da və “Şərq qapısı” qəzetində dərc olunmuş analitik məqalələri toplanıb. Müəllif əsərdə muxtar respublikada ordu quruculuğu, enerji təhlükəsizliyi, elm, təhsil, səhiyyə və başqa sahələrdə həyata keçirilən inkişaf strategiyasını yüksək analitik bacarıqla təhlil edib. Kitabın diqqətçəkən xüsusiyyətlərindən biri də faktların peşəkarcasına təhlil edilməsi, eyni zamanda, ötən dövrlərlə müqayisələr aparılmasıdır. Bütün üstün cəhətlərini nəzərə alaraq deyə bilərik ki, “Əsrə bərabər illər” kitabı Naxçıvan Muxtar Respublikasının 2015-2020-ci illər üzrə hərtərəfli inkişafını əks etdirən ensiklopediyadır. Akademik əsərin Naxçıvanı tanımaq, burada həyata keçirilən inkişafla tanış olmaq istəyən hər kəs üçün faydalı məlumat bazası rolunu oynayacağını vurğulayıb.
“Şərq qapısı” qəzetinin baş redaktoru Mehriban Sultanova “Əsrə bərabər illər” kitabını təcrübəli jurnalist Rauf Əliyevin altı illik məhsuldar fəaliyyətinin uğurlu nəticəsi kimi qiymətləndirib. Diqqətə çatdırılıb ki, icmal janrı analitik janr kimi inkişaf və tərəqqi, eləcə də fəal ictimai-siyasi proseslər getdiyi halda aktuallıq kəsb edir. Bu mənada yeni nəşrdə toplanan materiallar da muxtar respublikada aparılan quruculuq və inkişaf siyasəti ilə həmahəng səslənir. Buradakı icmallar həm də müəllifin jurnalist peşəkarlığı ilə diqqət çəkir. Kitabda yer alan fəsillər hər il muxtar respublika üçün ictimai-siyasi əhəmiyyətinə uyğun adlandırılıb. Yeni nəşrin nəfis tərtibata malik olması müəllifin muxtar respublikada qazanılan çoxşaxəli uğurlara fəal jurnalist mövqeyindən irəli gəlir. “Əcəmi” Nəşriyyat-Poliqrafiya Birliyində nəşr olunan kitab muxtar respublikanın inkişafı ilə maraqlanan mütəxəssis və tədqiqatçılar, jurnalistika fəaliyyəti ilə məşğul olan hər kəs üçün etibarlı mənbədir.
Naxçıvan Mətbuat Şurasının sədri Rövşən Hüseynov kitabın bir sıra mühüm keyfiyyətlərindən söz açaraq bildirib ki, müəllif 2015-ci ildən başlayaraq altı il ərzində muxtar respublikada baş verən mühüm hadisələrə xüsusi prizmadan yanaşıb, əsl vətəndaş mövqeyi nümayiş etdirib. Burada çoxsaylı faktlar vahid dövlətçilik ideologiyası əsasında təhlil olunub, bir amal ətrafında birləşdirilib ki, bu da müəllifin vətənpərvərliyindən irəli gəlir.
Tədbirə onlayn qatılan AZƏRTAC-ın Regional inkişaf və bölgə xəbərləri redaksiyasının müdiri Ceyhun Rüstəmov Naxçıvanın sürətli inkişafının agentliyin səhifələrində geniş işıqlandırıldığını deyib. Vurğulanıb ki, muxtar respublikanın son 20 ildə iqtisadi artım templərinə görə rekordsmen bölgə olması Naxçıvan Muxtar Respublikası Ali Məclisinin Sədrinin uğurla həyata keçirdiyi Heydər Əliyev siyasətinin bəhrəsidir. Bütün bu uğurları ölkə ictimaiyyətinə, dünyaya çatdırmaq qarşıda duran əsas vəzifələrdən biridir və Naxçıvan bürosu bu vəzifənin öhdəsindən bacarıqla gəlir.
Diqqətə çatdırılıb ki, Prezident İlham Əliyevin KİV-ə diqqət və qayğısı nəticəsində dünya informasiya məkanında layiqli yer tutan AZƏRTAC ötən illər ərzində muxtar respublikada əldə edilən nailiyyətləri daim böyük auditoriyalara çatdırıb. 2014-cü ildə muxtar respublikada agentliyin ilk bürosu yaradılıb. Büroya rəhbərlik edən təcrübəli jurnalist Rauf Əliyevin uğurlu fəaliyyəti nəticəsində ötən illərdə AZƏRTAC muxtar respublika həyatını, burada aparılan quruculuq işlərini, qazanılan uğurları geniş və hərtərəfli işıqlandırıb. Statistikaya nəzər salsaq görərik ki, Naxçıvan bürosu ötən 6 ildə 200-ə yaxını icmal-analitika olmaqla, 10 minədək xəbər yayımlayıb. Həmin materialların bir qismi müxtəlif dillərə tərcümə edilərək beynəlxalq ictimaiyyətə çatdırılıb. Naxçıvan bürosunun fəaliyyətində diqqəti cəlb edən digər məqam Rauf Əliyev tərəfindən hər ay icmalların hazırlanmasıdır. Bu materiallarda ay ərzində muxtar respublikanın ictimai-siyasi, iqtisadi, mədəniyyət, quruculuq sahələrində görülən genişmiqyaslı işlərlə tanış olmaq mümkündür. Həmin materialları bir araya topladıqda muxtar respublikanın inkişaf və quruculuq salnaməsi yaranır. Bu da tarix üçün çox əhəmiyyətli mənbə rolunu oynayır.
“Şərq qapısı” qəzetinin məsul katibi, nəşrin redaktoru Muxtar Məmmədov çıxışında “Əsrə bərabər illər” kitabını Naxçıvan mətbuatına yeni töhfə kimi qiymətləndirib. O, müəllifin səmərəli fəaliyyətini vurğulayaraq kitabın diqqət çəkən məqamlarına toxunub, bu uğurların davamlı olacağına əminliyini ifadə edib.
Sonda Rauf Əliyev çıxış edərək göstərilən diqqətə görə muxtar respublika rəhbərinə minnətdarlığını bildirib. “Hər bir jurnalist öz Vətəninin informasiya cəbhəsində döyüşən əsgəridir. Jurnalistin silahı isə onun qələmidir. O qələm ilk növbədə Vətənə, xalqa xidmət etməlidir”, - deyən müəllif qeyd edib ki, muxtar respublikada media nümayəndələrinə göstərilən diqqət və qayğı hər bir jurnalisti daha şövqlə çalışmağa vadar edir.