REGİONLAR
NDU-da smart tələbə kartlarının təqdimatı olub
Naxçıvan, 28 dekabr, AZƏRTAC
Naxçıvan Dövlət Universitetində smart tələbə kartlarının təqdimatı olub.
Universitetin Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, bu münasibətlə keçirilən tədbirdə çıxış edən universitetin rektoru Elbrus İsayev smart tələbə kartlarının hazırlanmasının “2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nda nəzərdə tutulan tədbirlərin icrası çərçivəsində həyata keçirildiyini vurğulayıb. Qeyd olunub ki, smart tələbə kartları ali təhsil ocağının elektronlaşma mərhələsində ən böyük uğurlarından sayılır. Gələcəkdə bütün universitet əməkdaşlarına smart kartlar veriləcək və bu, yüksək innovasiyaların, yeni texnologiyaların sürətlə tətbiq olunduğu ali təhsil ocağında elektron universitet modelinin möhkəmlənməsində və inkişafında mühüm hadisə olacaq. Rektor diqqətə çatdırıb ki, gələcəkdə Texnologiyalar Parkının imkanlarından istifadə üçün həmin kartlardan istifadə ediləcək.
Sonra universitetin Mühasibat uçotu şöbəsinin müdiri Ülvi Baxışlı smart kartların mahiyyəti və xüsusiyyətlərindən danışıb. Qeyd olunub ki, smart tələbə kartları layihəsi Azərbaycan Respublikası Təhsil Nazirliyinin, Mərkəzi Bankın və Naxçıvan Dövlət Universitetinin təşəbbüsü, “Naxçıvanbank” ASC-nin və “Mastercard”ın dəstəyi ilə 2020-ci ildən həyata keçirilir. Bu gün buraxılış kursları istisna olmaqla, bakalavriat və magistratura təhsil pillələrinin əyani şöbəsində təhsil alan, ümumilikdə, 3000-ə yaxın, bu tədris ilində isə universitetin I kursunda təhsil alan 1200-ə yaxın tələbəyə smart kartlar təhvil verilib.
Diqqətə çatdırılıb ki, kartlar unikal olmaqla yanaşı, bir çox mühüm xüsusiyyətlərə və üstünlüklərə malikdir. Belə ki, kartlar tələbələr üçün yeni vahid beynəlxalq standartlarla hazırlanmış tələbə biletidir. Kartın mühüm xüsusiyyətlərindən biri də debet bank kartı olmasıdır. Tələbələrə istər dövlət, istərsə də tədris müəssisəsi tərəfindən ödənilən təqaüdlər həmin kartlar vasitəsilə veriləcək, tələbələr ölkə daxilində və xaricdə bu kartlarla istənilən ödənişləri rahatlıqla həyata keçirə biləcəklər. Eyni zamanda, bütün regionlardan rahatlıqla bu kartlara maliyyə vəsaiti göndərmək mümkün olacaq.
Ülvi Baxışlı qeyd edib ki, tələbələr smart kartdan universitet, kitabxana, oxu zallarına, digər ictimai və sosial məkanlara giriş üçün də istifadə edə biləcəklər. Gələcəkdə smart tələbə kartının əhatə imkanlarının daha da genişləndirilməsi, ictimai nəqliyyatda, tələbələr üçün xüsusi endirim kampaniyalarında və digər xidmət sahələrində istifadəsi də nəzərdə tutulur. Sözügedən kartların hazırlanması tələbə biletlərinin və sifariş olunan təqaüd kartlarının xərclərinin də optimallaşdırılmasında mühüm rol oynayacaq. Bu kartlardan istifadənin genişləndirilməsi ölkədə nağdsız ödənişlərin təşviqində müasir ödəniş mədəniyyətinin formalaşdırılmasında, maliyyə savadlılığının artırılmasında mühüm addım olacaq.
Daha sonra Dilşünaslıq ixtisası üzrə I kurs magistrant Aytac Ələkbərovanın və Hüquqşünaslıq ixtisası üzrə I kurs tələbəsi İnfil Zeynalovun çıxışları dinlənilib. Qeyd olunub ki, bu cür layihələrin hazırlanması tələbələrə göstərilən diqqət və qayğının bariz nümunəsidir.
Sonda yüksək nəticə ilə ali təhsil ocağına qəbul olan tələbələrə smart kartlar təqdim edilib.