Bakı, 22 dekabr, AZƏRTAC

Dekabrın 21- də xalqımız, eləcə də dünya ictimaiyyəti daha bir tarixi hadisənin şahidi oldu. Prezident İlham Əliyev və Birinci vitse-prezident Mehriban xanım Əliyeva Xocavənd, Xocalı rayonlarına və Şuşaya səfərlərindən sonra Xankəndidə keçirilən “Qarabağ” və MOİK komandaları arasında Azərbaycan Kubokunun 1/8 final mərhələsinin oyununu izlədilər. Prezident, Ali Baş Komandan İlham Əliyevin stadionda topa ilk toxunuşu mənə qeyri-ixtiyari olaraq dövlət başçımızın tarixi sözlərini xatırlatdı: “Nəyi, necə, nə vaxt etmək lazımdır, bunu mən bilirəm”. Prezident və Birinci xanımın birlikdə işğaldan azad edilmiş topaqlarımızı qarış-qarış gəzmələri, sürətlə davam etdirilən yenidənqurma, abadlıq və tikinti-bərpa işləri ilə şəxsən tanış olmaları, Xankəndi şəhər stadionunda Azərbaycanın futbol komandalarının yarışını azərbaycanlı azarkeşlərlə, o cümlədən şəhid övladları ilə birlikdə tam təhlükəsiz izləmələri, eyni zamanda, soydaşlarımızın ata- baba yurdlarına qayıtmaları dünyaya bir daha bəyan etdi ki, Qarabağ Azərbaycandır!

Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.

O deyib ki, bütün bunlar nə röya, nə də xəyaldır. Prezident İlham Əliyevin düşünülmüş xarici siyasətinin məntiqi nəticəsidir. Necə deyərlər, bu, dövlət başçımızın 20 il ərzində yaratdığı möcüzədir. Ə.Bədəlov söhbət zamanı bir əhvalatı da xatırlatmağı özünə borc bildi: “Həmin hadisədən dörd ildən artıq vaxt keçib. 2019-cu il mayın 10 -da Ermənistanın baş naziri Nikol Paşinyanın Şuşanın işğalının 27-ci ilini qeyd etmək üçün Şuşa şəhərinə gəlməsini xatırlatmağım təsadüfi deyil. Yəqin ki, bu “tədbiri” heç kim unutmayıb. Paşinyan həmin “tədbirə” tək gəlməmişdi. Bu işğalda xüsusi rolu olmuş və əli dinc azərbaycanlıların qanına batmış sabiq prezident Serj Sarkisyan da daxil olmaqla, bir çox erməni rəsmisi Şuşaya gəlmişdi. Paşinyan əvvəlcə işğal şərəfinə şərab içdi, sonra isə Azərbaycan şəhərində Azərbaycan xalq mahnısına oynayan ermənilərə qoşulub Yallı getdi. Bu hadisədən sonra xarici anti-Azərbaycan qüvvələrin yerlərdəki əlaltıları, sapı özümüzdən olan “balatacıqlar” dərhal hakimiyyətə hücuma keçdilər. Guya, Paşinyanın Şuşada Yallı getməsi bunların olmayan vətənpərvərlik hisslərinə toxunubmuş. Sanki 1992-ci il hadisəsini, silahlı yolla hakimiyyətə gəlməyi təkrarlamaq istəyirdilər. Guya, indiki hakimiyyət torpaqlarımızı işğaldan azad edə bilmir, əksinə, Paşinyan Şuşada Yallı gedir. Həmin vaxt Prezident İlham Əliyev böyük səbir, təmkin, siyasi iradə nümayiş etdirdi. Qaragüruhçuların hay-küyünə əhəmiyyət vermədi. Sonra baş verən hadisələr bir daha nümayiş etdirdi ki, nəyi, necə, nə vaxt etmək lazım olduğunu hamıdan yaxşı o, özü bilirmiş”.

Ə.Bədəlov 2020-ci il sentyabrın 27-də Ermənistanın başladığı genişmiqyaslı təxribatlardan, sonradan açıq şəkildə müharibəyə çevirməsindən söhbət açıb. Deyib ki, həm anti-Azərbaycan qüvvələrinin, onlara dəstək verən Ermənistanın havadarlarının, həm də yerlərdəki hakimiyyət hərislərinin arzuları ürəklərində qaldı: “Prezident, Ali Baş Komandan İlham Əliyevin rəhbərliyi ilə yenilməz ordumuzun ilk gündən düşmənə ağır zərbələr endirməsi, müharibə başlayandan bir gün sonra torpaqlarımızı hissə-hissə işğaldan azad etməsi, ermənilərin, onların himayədarlarının və yerlərdəki xainlərin ümidlərini alt-üst etdi. Hətta Vətən müharibəsi başlayanda bütün siyasi partiyalar həmrəylik nümayiş etdirib Prezidentin ətrafında sıx birləşəndə həmin xainlər bu həmrəyliyə qoşulmadılar. Bu gün də onlar öz xislətlərini ört- basdır edə bilmir, fevralın 7- də keçiriləcək növbədənkənar prezident seçkilərində iştirakdan imtina edir, hətta boykota əl atırlar”.

Siyasi şərhçi növbədənkənar prezident seçkilərini boykot etmək istəyənlərə 20 il əvvəl Azərbaycan xalqının cənab İlham Əliyevə böyük etimad göstərərək prezident seçkilərində Prezident vəzifəsinə seçdiyini xatırladıb. O vaxt Prezident İlham Əliyev andiçmə mərasimindəki çıxışı zamanı Konstitusiyaya və “Qurani-Kərim”ə əl basaraq and içmişdi ki, Azərbaycan xalqının və Azərbaycan dövlətinin milli maraqlarını müdafiə edəcək, torpaqlarımızı işğaldan azad edəcək və ölkəmizin ərazi bütövlüyünü qoruyacaq. Bu, həm də Ulu Öndər Heydər Əliyevin vəsiyyəti idi. Son 20 il ərzində verdiyi bütün vədlər, qarşıya qoyduğu bütün vəzifələr icra edildi-ata vəsiyyətini yerinə yetirdi. Üç ay bundan əvvəl birgünlük antiterror tədbirləri nəticəsində Xankəndi işğaldan azad edildi, ərazi bütövlüyümüz bərpa olundu. Azərbaycan öz dövlət suverenliyini tam təmin etdi. Bu gün bütün Qarabağ bölgəsində Azərbaycan Bayrağı dalğalanır. Bu, böyük tarixi hadisədir. Azərbaycan xalqı, dünya azərbaycanlıları bu Zəfər ilə əbədi fəxr edəcək.

“Gələn il keçiriləcək növbədənkənar prezident seçkilərində də xalq otuz ilə yaxın müddətdə işğal altında olan ərazilərimizi düşməndən azad edən, tarixi Qələbəyə imza atan, keçmiş məcburi köçkün soydaşlarımızın dədə-baba yurdlarına təhlükəsiz qayıtmlarını təmin edən, Qarabağda genişmiqyaslı yenidənqurma, tikinti-bərpa işlərinin həyata keçrilməsinə rəhbərlik edən Prezident İlham Əliyevin ətrafında sıx birləşəcək və yekdilliklə onu yenidən Prezident seçəcək”- deyə Ə.Bədəlov bildirib.