Azərbaycan Respublikası Hərbi Prokurorluğunun mətbuat xidmətindən
AZƏRTAC-a bildirmişlər ki, prokurorluğun Ağır cinayətlərə dair işlər üzrə İstintaq İdarəsində 1992-ci il avqustun 20-də Xocavənd rayonunun Əmralılar kəndində yerləşən “N” saylı hərbi hissəsinin əsgəri Adil Kamran oğlu Quliyevin qəsdən öldürülməsi faktı üzrə aparılan cinayət işinin istintaqı zamanı müəyyən edilmişdir ki, Çingiz Bürzu oğlu İsmayılov həmin hərbi hissədə bölük komandirinin müavini vəzifəsində xidmətdə olarkən digər bölüyün komandir müavini Eynulla Fərhad oğlu Əliyev, əsgərlər - Adil Kamran oğlu Quliyev, Azər Qurban oğlu Hüseynov, habelə bölükdə qeyri-qanuni saxlanılan iki qadınla birlikdə gecə saat 23 radələrində sərxoş vəziyyətdə ətraf postları yoxlamağa getmişdir. Çingiz İsmayılov postları yoxlayıb qayıdarkən bölük qərargahının yaxınlığında xuliqanlıq edərək özünün yanındakılardan üstün olmasını göstərmək üçün yolun sağ tərəfindəki həyətdən səs eşitməsini bəhanə etməklə xidməti istifadəsində olmuş avtomat silahdan ardıcıl atəşlər açmışdır. Onun açdığı atəşlər nəticəsində ondan 2-3 metr məsafədə olan Adil Quliyev bel nahiyəsindən və Azər Hüseynov sağ ayağının pəncəsinin alt hissəsindən yaralanmışlar. Sonra Çingiz İsmayılov yanında olan şəxsləri aldadıb atəşin guya ermənilər tərəfindən atılmasını bəhanə gətirərək onları inandırmaq və törətdiyi cinayəti gizlətmək məqsədi ilə Adil Quliyevin xidməti istifadəsində olmuş pulemyot silahı götürüb həmin istiqamətdə geri qayıtmış və yenə ondan arxada olan Eynulla Əliyevi, Azər Hüseynovu və digərlərini qəsdən öldürmək üçün onların olduğu yerə atəş açmışdır. Lakin göstərilən şəxslər özlərini qorumaq məqsədi ilə yerə uzandıqlarından Çingiz İsmayılov öz iradəsindən asılı olmayan səbəblərə görə niyyətinə nail ola bilməmişdir. Nəticədə Adil Quliyev aldığı ağır xəsarətdən ölmüş, Azər Hüseynov isə səhhətinin qısa müddətə pozulmasına səbəb olan yüngül xəsarət almışdır.
İstintaqla, həmçinin müəyyən edilmişdir ki, Çingiz İsmayılov bu ağır cinayət əməlini törətdikdən sonra xidmət yerini özbaşına tərk etmiş və uzun müddət hərbi hissəyə qayıtmamışdır.
Çingiz İsmayılovun törətdiyi cinayət əməlləri şahid ifadələri, ekspert rəyləri və digər istintaq materialları ilə sübuta yetirilmişdir.
Yuxarıda qeyd edilən cinayət əməllərini törətdiyinə görə Çingiz İsmayılova Azərbaycan Respublikasının 2000-ci il sentyabrın 1-dək qüvvədə olmuş CM-in 94-cü maddəsinin 2-ci və 6-cı (xuliqanlıq niyyəti ilə və bir çox şəxsin həyatı üçün təhlükəli olan üsulla qəsdən adamöldürmə, 15-ci, 94-cü maddələrinin 4-cü, 6-cı və 7-ci bəndləri (iki və ya bir neçə şəxsi, bir çox şəxsin həyatı üçün təhlükəli olan üsulla və başqa cinayəti gizlətmə məqsədi ilə qəsdən adamöldürmə) və qüvvədə olan CM-in 334.1-ci (fərarilik) maddəsi ilə ittiham elan edilərək, haqqında həbs qətimkan tədbiri seçilmişdir.
Hazırda iş üzrə istintaq respublika Hərbi Prokurorluğu tərəfindən başa çatdırılmış, cinayət işi baxılması üçün Ağır cinayətlərə dair işlər üzrə Azərbaycan Respublikasının Hərbi Məhkəməsinə göndərilmişdir.