CƏMİYYƏT
“Prezident İlham Əliyevin din siyasəti: dialoq və əməkdaşlıq” mövzusunda konfrans keçirilib
Bakı, 21 dekabr, AZƏRTAC
Dekabrın 21-də Dini Qurumlarla İş üzrə Dövlət Komitəsinin (DQİDK) təşkilatçılığı ilə “Prezident İlham Əliyevin din siyasəti: dialoq və əməkdaşlıq” mövzusunda konfrans keçirilib.
AZƏRTAC xəbər verir ki, əvvəlcə Mənəvi Dəyərlərin Təbliği Fondunun sifarişi ilə ərsəyə gətirilmiş “Müzəffər Komandan” sənədli filmi nümayiş etdirilib.
Sonra çıxış edən Dini Qurumlarla İş üzrə Dövlət Komitəsinin sədri Mübariz Qurbanlı bildirib ki, Azərbaycandakı bütün dinlərin nümayəndələri dini ayinlərini, öz ibadətlərini sərbəst şəkildə yerinə yetirirlər. Bu gün Azərbaycan əhalisinin təxminən 96 faizi müsəlmandır.
Azərbaycanın müsəlman dünyasının bir parçası olduğunu vurğulayan komitə sədri qeyd edib ki, ölkəmiz İslam Əməkdaşlıq Təşkilatının üzvüdür, bununla yanaşı, Azərbaycanda müxtəlif dinlərin nümayəndələri var.
Mübariz Qurbanlının sözlərinə görə, hazırda Azərbaycanda qeyri-müsəlman icmaların sayı 37-dir.
"Azərbaycan müstəqilliyini bərpa edəndə cəmi 17 məscid var idisə, bu gün onların sayı 2253-dür. Yalnız son 20 ildə Azərbaycanda 435 məscid inşa edilərək istifadəyə verilib. İşğaldan azad olunmuş ərazilərdə hazırda dini abidələrin bərpası işləri gedir. Ermənilər istər İslama, istərsə də xristianlığa və digər dinlərə qarşı vəhşilik ediblər”, - deyə komitə sədri vurğulayıb.
Azərbaycanda din adından istifadə edən radikal, ekstremist qrupların aradan qaldırılması istiqamətində işlərin davam etdirildiyini deyən Mübariz Qurbanlı, həmçinin bildirib: "Heç bir din radikalizmə xidmət etmir, bütün dinlər əmin-amanlığa çağırır. Amma dindən sui-istifadə edənlər var. Bu cür halların aradan qaldırılması istiqamətində geniş maarifləndirmə işi aparılır.
Müstəqilliyimiz bərpa edildikdən sonra Ümummilli Lider Heydər Əliyevin böyük uzaqgörənliklə formalaşdırdığı dövlət-din siyasətinin daha da möhkəmləndiyini vurğulayan komitə sədri əlavə edib: “Son illərdə Azərbaycanın dünya ölkələri sırasında öz layiqli yerini tutması və milli-mənəvi dəyərlərimizin qorunmasında, xüsusilə tolerantlığın və multikultural ənənələrin inkişaf etdirilərək dünyaya çatdırılmasında Prezident İlham Əliyevin xidmətləri danılmazdır”.
Milli Məclisin İctimai birliklər və dini qurumlar komitəsinin sədr müavini Sahib Alıyev qeyd edib ki, qırx dörd günlük Vətən müharibəsi Azərbaycanda din siyasətinin hansı səviyyədə olduğunu nümayiş etdirdi: "Təxminən 12 din və məzhəb təmsilçilərinin iştirak etdiyi müharibədə Azərbaycanın bir nəfər də fərarisi olmadı. Amma Ermənistanda 12 min fərari oldu. Sentyabrın 19-20-də keçirilən antiterror tədbirlərindən sonra Fransa başda olmaqla, bəzi dövlətlər Azərbaycanı təcrid etmək istəyirdilər. Amma istəklərinə nail olmadılar".
O bildirib ki, xarici ölkələrin rəsmi nümayəndələri COP29 konfransı zamanı Azərbaycana gələrək işğaldan azad olunmuş ərazilərimizlə tanış olacaqlar: “Orada Azərbaycanın qısa müddətdə gördüyü nəhəng işləri yaxından izləyəcəklər”.
Bakı Beynəlxalq Multikulturalizm Mərkəzinin (BBMM) icraçı direktoru Rəvan Həsənov Azərbaycan ilə Türk dünyası arasında çox böyük inteqrasiya prosesinin getdiyini bildirib.
Onun sözlərinə görə, Qarabağın və Şərqi Zəngəzurun işğaldan azad olunması Türk dünyasını ruhlandırıb.
R.Həsənov qeyd edib ki, Azərbaycanın İslam irsinə, milli-mənəvi dəyərlərinə bağlılığı İlham Əliyevin prezidentliyi dövründə diqqət göstərilən məsələlərdən biri olub.
Digər çıxış edənlər - Qafqaz Müsəlmanlarını İdarəsi sədrinin müavini Fuad Nurullayev, Bakı şəhəri Dağ yəhudiləri dini icmasının sədri Milix Yevdayev, Rus Pravoslav Kilsəsinin Bakı və Azərbaycan Yeparxiyasının katibi, arximandrit Aleksi Nikonorov, Katolik Kilsəsinin Apostol Prefekturasının yepiskopu Vladimir Fekete, Alban-Udi Xristian dini icmasının sədri Robert Mobili mövzu ilə bağlı fikirlərini bölüşüblər.
Bildirilib ki, Prezident İlham Əliyev tərəfindən dinimizin, ümumilikdə dəyərlər sistemimizin qorunmasına və inkişafına xüsusi diqqət və qayğı göstərilib. Əsası Ulu Öndər Heydər Əliyev tərəfindən qoyulan dövlət-din münasibətləri Prezident İlham Əliyev tərəfindən böyük uzaqgörənlik və uğurla davam etdirilir.
Diqqətə çatdırılıb ki, bu gün ölkədə yaşayan müxtəlif dinlərin nümayəndələrinə diqqət və qayğı göstərilir. Hər il dövlət büdcəsindən dini icmalara yardımlar ayrılır, dini bayram və mərasimlər dövlət səviyyəsində qeyd edilir.
Konfrans müzakirələrlə yekunlaşıb.