Avqustun 1-3-də Varşavada qadınlar arasında sərbəst güləş üzrə mötəbər beynəlxalq turnir keçirilmişdir. Yarışlarda həmyerlimiz Mətanət Süleymanova 55 kiloqramadək çəki dərəcəsində çıxış edərək, Azərbaycanda idmanın bu növünün tarixində ilk medal – gümüş mükafat qazanmışdır.

Gənclər, İdman və Turizm Nazirliyinin mətbuat xidmətindən AZƏRTAC-ın müxbirinə bildirmişlər ki, yarışlarda 30 ölkənin 100-dən çox güləşçisi çıxış etmişdir. İdmançımızın uğurunun böyük əhəmiyyəti var, çünki qadın güləşinin bu növü Olimpiya oyunlarının proqramına daxil edilmişdir.