RƏSMİ XRONİKA
QƏBƏLƏ MÜALİCƏ-DİAQNOSTİKA MƏRKƏZİNİN AÇILIŞINDA AZƏRBAYCAN PREZİDENTİ İLHAM ƏLİYEVİN ÇIXIŞI
-Əziz qəbələlilər,
Əziz dostlar.
Bu gün Qəbələ rayonunun həyatında çox əlamətdar bir gündür, gözəl bir gündür. Bu gün Qəbələdə yeni, gözəl Müalicə-Diaqnostika Mərkəzi açılır. Bu gözəl hadisə münasibətilə sizin hamınızı ürəkdən təbrik edirəm. Qəbələ Müalicə-Diaqnostika Mərkəzinin tikintisi Azərbaycanda aparılan sosial siyasətin nəticəsidir. Bu kompleksdə ən qabaqcıl texnologiyalar tətbiq olunur. Ən müasir avadanlıqlar və müayinədən keçmək, müalicə almaq üçün bütün şərait var. Mən çox şadam ki, Azərbaycanda belə gözəl komplekslərin, mərkəzlərin sayı getdikcə artır. Ölkəmizin müxtəlif bölgələrində ən müasir tibb ocaqları yaradılır. Bunlar həm Səhiyyə Nazirliyinin xətti ilə, həm də Dövlət Neft Şirkətinin vəsaiti hesabına tikilir. Beləliklə, qısa müddət ərzində Azərbaycanda səhiyyə problemlərinin həlli üçün yeni müasir infrastruktur yaradılır. Deyə bilərəm ki, belə mərkəzlərin işə düşməsi təsadüfi deyildir. Çünki Azərbaycanda son illər ərzində sosial siyasət, insanların həyat səviyyəsinin yaxşılaşdırılması, sağlamlığının möhkəmləndirilməsi işində məqsədyönlü tədbirlər görülür, dövlət proqramları icra olunur. Bu məqsədlərə dövlət xərcləri ildən-ilə artır.
Əlbəttə, sosial siyasətin güclü olması hər bir ölkənin iqtisadi imkanlarından asılıdır. Bizim bu gün imkanlarımız var. Azərbaycan zəngin dövlətə çevrilir. Azərbaycanda büdcə xərcləri artır, son 5 il ərzində bizim büdcəmiz 10 dəfədən çox artıbdır. Bunun hesabına gözəl binalar, tibb mərkəzləri, olimpiya kompleksləri, müəssisələr tikilir, yollar abadlaşır. Azərbaycanın bütün bölgələrində bunu görürük.
Bir daha demək istəyirəm ki, bu kompleksdə, bu mərkəzdə gözəl tibbi xidmət almaq üçün bütün imkanlar var, həkimlər də artıq hazırlanır. Əlbəttə, müasir avadanlıqlarla işləmək böyük peşəkarlıq tələb edir. Yəni biz bu məsələyə kompleks şəkildə yanaşırıq. Həm gözəl avadanlıq alınır, şərait yaradılır, həm də ki, həkimlərin səviyyəsinin qaldırılması üçün lazımi tədbirlər görülür. Bir müddət bundan əvvəl başlanan bu ənənə bu gün də davam edir. Azərbaycanın bütün bölgələrində belə mərkəzlər tikilir, gələcək illərdə isə əminəm ki, hər bir rayonda müasir tibb müəssisələri yaradılmalıdır. Köhnə xəstəxanalar təmir olunur, yeniləri tikilir. Beləliklə, Azərbaycanda səhiyyə sahəsində yaranmış problemlər tezliklə həll olunacaqdır. Bütün başqa sahələrdə də.
Siz Qəbələ rayonunun sakinləri çox yaxşı görürsünüz ki, Qəbələ son illər ərzində necə inkişaf edir. Burada sənaye potensialı, yeni müəssisələr yaradılır. Bunlar həm daxili tələbatı ödəyür, həm də ki, onların ixrac qabiliyyəti çox yüksəkdir.
Xüsusilə Azərbaycanın müxtəlif yerlərində kənd təsərrüfatı məhsullarının emalı müəssisələri yaradılır. Bunları sahibkarlar edirlər, bir hissəsi isə Azərbaycan dövlətinin sahibkarlara etdiyi yardımlar hesabına yaradılır. Azərbaycan dövləti hər il yerli sahibkarlara 100 milyon dollar səviyyəsində güzəştli kreditlər verir. Bu kreditlər hesabına çox böyük işlər görülür, o cümlədən Qəbələ rayonunda və bütün başqa yerlərdə. Nəzərə alsaq ki, artıq bu proqram 4-5 ildir icra olunur və hər il böyük məbləğdə kreditlər ayrılır, əlbəttə ki, biz bunun nəticələrini görürük və gələcək illərdə də görəcəyik. Yəni həm sənaye müəssisələrinin tikilməsi, həm də səhiyyə ocaqlarının, idman qurğularının, məktəblərin tikilməsi - bütün bu vacib məsələlər hər bir rayonun inkişafını müəyyən edir. Azərbaycan iqtisadiyyatı çox sürətlə artır, bizim iqtisadi imkanlarımız genişlənir. Maliyyə imkanlarımız da genişlənir və ilk növbədə, biz səylərimizi, insanları narahat edən problemlərə yönəldirik. Əsas infrastruktur layihələrimiz, demək olar ki, başa çatmaq üzrədir. Azərbaycanda çox güclü infrastruktur layihələri icra olunur və insanların normal həyatını, yaxşı həyatını təmin etmək üçün bütün proqramlar yerinə yetirilir: kənd təsərrüfatı, sənaye, sosial məsələlərin həlli. Mən əminəm ki, 2009-cu ildə Azərbaycanın dövlət büdcəsinin həcmi daha da böyük olacaqdır. İndi artıq biz investisiya məsələlərinə ildə 5 milyard dollar xərcləyirik və bu vəsait bütün ölkədə gedən proseslərə müsbət təsir göstərir. Həm dövlət xərcləri, həm gözəl investisiya mühiti, sahibkarların dəstəklənməsi - bütün bu amillər bir-birini tamamlayır. Azərbaycanda çox gözəl ictimai-siyasi vəziyyətin olması, sabitliyin möhkəm olması həm yerli sahibkarlara əlavə ruh verir, həm də xarici iş adamlarını Azərbaycana cəlb edir. Ölkəmizin bütün bölgələrində gedən inkişaf bizim uğurumuzun ən başlıca təzahürüdür. Əgər belə olmasaydı, ölkə hərtərəfli inkişaf edə bilməzdi.
Bildiyiniz kimi, 2004-cü ilin əvvəlində qəbul edilmiş regionların sosial-iqtisadi inkişafı Dövlət proqramının uğurlu icrası nəticəsində biz bu inkişafa nail ola bilmişik. Onu da demək istəyirəm ki, 2004-ci ildə qəbul edilmiş proqrama, sonrakı illərdə, 2005-ci ildə, 2006-cı ildə, 2007-ci ildə əlavələr olunmuşdur. O proqramın xaricində çoxlu işlər görülübdür. Hesab edirəm ki, növbəti 5 illik proqram bütün qalan, həll olunmamış məsələləri əhatə etməlidir. Hər bir rayonun xüsusi proqramları var və növbəti 5 il üçün hazırlanır. O proqramlarda hər bir rayonun, rayondakı hər bir kəndin problemləri öz həllini tapacaqdır.
Biz gələcəyə çox nikbinliklə baxırıq. Azərbaycan həm siyasi baxımdan çox möhkəm ölkədir və bu bölgədə sabitləşdirici funksiyanı icra edir, həm də iqtisadi inkişaf baxımından ölkəmiz son dörd il ərzində nəinki bölgədə, dünyada birinci yerdədir. Sosial məsələlər öz həllini tapır. Çünki bazar iqtisadiyyatı şəratində yaşayan ölkələrdə bəzi hallarda sosial ədalətsizlik də artır.
Biz bazar iqtisadiyyatının mənfi cəhətlərinin qarşısının alınması üçün çox güclü sosial siyasət aparırıq. Bunu biz bax bu Müalicə-Diaqnostika Mərkəzinin timsalında görürük. Biz bunu insanların əmək haqlarının, pensiyaların artırılmasında görürük. Çünki insanlar sosial cəhətdən müdafiə olunmalıdır. Azərbaycanda 500 mindən çox insan, ən kasıb şəraitdə yaşayan insanlar hər ay dövlətdən sosial müavinət alır. Azərbaycanda kasıblığın, yəni yoxsulluğun səviyyəsi kəskin şəkildə aşağı düşübdür. Əminəm ki, 2008-ci ilin yekunlarına görə yoxsulluğun səviyyəsi daha da aşağı düşəcəkdir. Qarşıya məqsəd qoyulmuşdur ki, Azərbaycanda bir nəfər də yoxsul adam olmamalıdır. Azərbaycanda işləmək istəyən hər bir insan işlə təmin olunmalıdır. Bu məsələlər həll olunduqda, demək olar ki, bizim əsas sosial problemlər həll edilmiş olur və növbəti illərdə, sadəcə, biz daha sürətlə inkişaf edəcəyik.
Bizim inkişafımız üçün bütün imkanlar var. İlk növbədə, hər bir sahə üzrə çox ciddi dövlət proqramları var. Digər tərəfdən, xalqla iqtidar arasında vəhdət var və bizim bütün təşəbbüslərimiz xalq tərəfindən dəstəklənir. Azərbaycan təbii ehtiyatlarla çox zəngin olan ölkədir və biz bu ehtiyatlardan çox səmərəli şəkildə istifadə edirik. Bunu həm Azərbaycan əhalisi bilir, həm də dünyada olan ən qabaqcıl beynəlxalq maliyyə qurumları, beynəlxalq təşkilatlar Azərbaycanın bu istiqamətdəki fəaliyyətini böyük təqdirlə qarşılayırlar. Azərbaycanda çox istedadlı insanlar yaşayır. Azərbaycanın çox gözəl coğrafi mövqeyi vardır və biz bundan uğurla istifadə edirik. Bölgədəki bütün qonşularımızla çox yaxşı, qarşılıqlı hörmət əsasında yaranmış münasibətlərimiz vardır. Azərbaycanın dünya miqyasında önəmi də, hörməti də artır. Hamı bilir ki, bizim sözümüzlə əməlimiz arasında heç bir fərq yoxdur. Bunu Azərbaycan xalqı da bilir, bütün dünya ictimaiyyəti də bilir. Azərbaycan dünya miqyasında özünə layiq olan yerini tutub və bu yeri möhkəmləndirir.
O ki, qaldı bölgə məsələlərinə, bizim iştirakımız olmadan heç bir təşəbbüs həll edilə bilməz, heç bir iqtisadi, yaxud da ki, siyasi layihə icra oluna bilməz. Biz nəinki bölgədə icra olunan bütün layihələrin iştirakçısıyıq, onların bəzilərinin, bir çoxunun təşəbbüskarıyıq. Bizimlə əməkdaşlıq etmək istəyən, bizimlə daha yaxşı münasibətlər qurmaq istəyən ölkələrin sayı artmaqdadır.
Beləliklə, çox güclü sosial siyasət, daxili vəziyyətin sabit olması, güclü iqtisadiyyat, liberal islahatlar, - istər siyasi, istərsə də iqtisadi islahatlar, - çevik xarici siyasət və bölgələrin inkişafı hesabına biz ölkəmizi inkişaf etdiririk və növbəti illərdə bu inkişaf davam edəcəkdir.
Qəbələ rayonunun timsalında biz son illər ərzində bütün Azərbaycanda əldə edilmiş müsbət nəticələri görürük. Burada həm quruculuq işləri gedir, abadlıq işləri, yeni müəssisələr tikilir, şəhər gözəlləşir, həm də Qəbələnin çox gözəl təbiəti var. Bu təbiətdən çox səmərəli istifadə olunur. Mən bu gün yeni yaradılmış mehmanxana-turizm kompleksinə də baş çəkəcəyəm. Bilirəm ki, bunlar da yüksək səviyyədə yaradılır. Xəbərim var ki, Bakıdan, ölkəmizin digər bölgələrindən istirahət etmək üçün Qəbələyə gələn insanların sayı artır. Əminəm ki, qarşıdakı illərdə xaricdən də gələcəklər. Bütün infrastruktur var. Bakı-Qəbələ avtomobil yolu yeniləşib, genişləndirilibdir. Zaqatala aeroportu artıq hazırdır. Digər vasitələrdən də istifadə edib, Qəbələ Azərbaycanın ən gözəl turizm mərkəzlərindən birinə çevriləcəkdir.
Mən bu gözəl gündə bütün qəbələlilərə öz hörmət-məhəbbətimi ifadə etmək istəyirəm. Arzu edirəm ki, rayonda gedən proseslər bundan sonra da belə templərlə davam etsin və burada insanlar yaxşı yaşasınlar, rahat yaşasınlar. Qəbələ rayonu Azərbaycanın bütün digər rayonları ilə bərabər inkişafa doğru getsin. Bu gözəl mərkəzin açılışı münasibətilə bir daha sizi təbrik edirəm, sizə uğurlar arzulayıram.
Sağ olun!
######