SİYASƏT
RADİKAL MÜXALİFƏTİN RƏSUL QULİYEVİN BAKIYA GƏLƏCƏYİ BARƏDƏ ÜMİDLƏRİ PUÇA ÇIXDI
“Azərbaycan Hava Yolları” Dövlət Konserninin baş direktoru Cahangir Əsgərovun bu məsələ ilə bağlı jurnalistlərə müsahibəsini oxuculara təqdim edirik. C.Əsgərov demişdir:
- Bu gün yerli vaxtla saat 14.56-da Heydər Əliyev adına beynəlxalq hava limanına “London Executive Aviation” şirkətindən Farnboro-Simferopol-Bakı marşrutu ilə xüsusi reysin uçuşuna icazə verilməsi barədə müraciət daxil olmuşdur. Həmin müraciətdə şirkətin “Celendcer-C560” tipli təyyarəsinin Bakıya saat 19.45-də enəcəyi barədə bizə rəsmi məlumat verilmişdir. Beynəlxalq normalara uyğun olaraq, müraciətə rəsmi cavab 72 saat ərzində verilməli idi. Lakin biz 1 saat 52 dəqiqədən sonra bu müraciətə rəsmi müsbət cavab vermişik. Cavab saat 16.48-də rəsmi beynəlxalq poçtla həm “London Executive Aviation” şirkətinin ünvanına, həm də Simferopolda olan bütün dispetçer xidmətlərinə göndərilibdir. Biz cavabımızda bildirmişdik ki, Bakının Heydər Əliyev adına beynəlxalq hava limanı bu təyyarəni sizə uyğun saatlarda qəbul edə bilər. Onlar bizdən yanacaq doldurulmasını və 5 nəfər sərnişinin qəbul olunmasını xahiş edirdilər. Cavab verdik ki, yanacaq verə bilərik və 5 nəfər sərnişini qəbul etməyə hazırıq.
Bu cavabı göndərəndən 5 dəqiqə sonra, saat 16.53-də biz “London Executive Aviation” şirkətindən cavab almışıq ki, təyyarəni sifariş edən şəxs bu reysdən imtina edir. Təyyarədə adları çəkilən 5 sərnişin arasında Rəsul Quliyevin də adı var. Məncə, təyyarəni sifariş edən Rəsul Quliyev idi. Ona görə biz belə güman edə bilirik ki, Rəsul Quliyev özü bu reysdən imtina etmişdir. Biz şirkətin dispetçerinə rəsmi zəng etdik. Dispetçer cavab verdi ki, baş sərnişin bu reysdən imtina etdi və təyyarə Simferopoldan bizim Farnboro şəhərinə qayıdıbdır. Farnboro şəhəri Londonun yaxınlığındadır.
Bir daha deyirəm ki, biz müraciətdən 1 saat 52 dəqiqə sonra dərhal cavab vermişik ki, biz təyyarəni və sərnişinləri Azərbaycanda, Bakıda Heydər Əliyev adına beynəlxalq hava limanında qəbul edə bilərik, amma özləri gəlmədilər. Bu, rəsmi məlumatdır. Mən bütün qəzetlərə rəsmi məlumat, eyni zamanda, sənədlərin surətini göndərəcəyəm.
Dediyim kimi, “London Executive Aviation” şirkəti bizə sərnişinlərin adını, soyadını, doğum tarixinı və pasport nömrəsini təqdim edibdir. Cəmi 5 nəfərdir:
1. Robert Aleksandr Stüart - 7 iyul 1949-cu il təvəllüdlü, İngiltərə vətəndaşıdır.
2. Famil Quliyev – 30 iyun 1980-ci il təvəllüdlü, İngiltərə vətəndaşıdır.
3. Endryu Hobson – 17 may 1979-cu il təvəllüdlü, İngiltərə vətəndaşıdır.
4. İlqar Quliyev - 28 noyabr 1957-ci il təvəllüdlü, İngiltərə vətəndaşıdır.
5. Rəsul Quliyev – 10 dekabr 1947-ci il təvəllüdlü, Azərbaycan vətəndaşıdır.