Bakı, 9 fevral, Aytac Haqverdiyeva, AZƏRTAC

Rəssamları digər sənət adamlarından fərqləndirən bir çox xüsusiyyətlər var. Sərt və yumşaq kətana rənglərin çəkilməsi, rəqəm və xüsusi texnologiyalarla real predmetə və canlıya oxşar vizual təsvirin yaradılması... Ən əsası isə onlar gözlə görünməyən obrazları belə, təsvir edə bilirlər. Sonda təsvir olunan rəsm əsəri duyğuların cilalanmış portreti, mənzərəsi, füsunkarlığıdır. Rəssamlıq məişətdən cəmiyyətə keçərək insanların xarakterini, təbiətin füsunkarlığını əks etdirir. Hazırda ölkəmizdə bu sahədə uğur qazanan istedadlı rəssamlarımız kifayət qədərdir.

AZƏRTAC-ın əməkdaşları istedadlı gənc rəssam, Azərbaycan Rəssamlar İttifaqının, Azərbaycan Zərgərlik Assosiasiyasının üzvü Cahid Cavadovla onun “Gizli Dünyam” adlı fərdi sərgisinin açılışında həmsöhbət olub. Kiçik yaşlarından etibarən rəssamlığa böyük marağı olan Cahid 12 yaşında bu sənətlə məşğul olmağa başlayıb.

Belə bir mif var ki, rəssam olmaq üçün anadangəlmə xüsusi bacarığa sahib olmaq lazımdır. Ancaq Cahidin sözlərinə görə, 12 yaşına qədər sadə karikaturalar çəkmək belə, onun üçün böyük xəyal idi. Təhsilsiz, həvəskar rəssamların çəkdiyi kor-koranə rəsmlər müəyyən müddət sonra həmin şəxslərin özlərinə də xoş gəlmir. Çünki təhsil olmadıqda, müəyyən mənada inkişaf edə bilmirsən. Rəssamlıq isə daim inkişaf, təhsil, ideya tələb edən bir sənətdir: “Artıq 20 ilə yaxındır peşəkar rəssamlıqla məşğul olsam da, hələ də rəssamlıq sənətinin gizli sirlərini öyrənməyə davam edirəm. Bəzən gənclər rəssamlığı peşə kimi yox, sadəcə hobbi olaraq görürlər. Ancaq rəssamlıqda yüksək nailiyyətlər əldə etmək istəyənlər bu sənətə daha ürəklə yanaşmalıdır. Davamlı olaraq rəssamlıq üzərində çalışmaq, yeni bilgilər öyrənmək onlarda bu sənətə qarşı daha böyük həvəs yaradacaq. Elə sizin bu sərgidə gördüyünüz sənət əsərləri bir-iki ayın məhsulu deyil. Hər bir əsərin üzərində mənim illərim var”.

Təhsilin gətirdiyi uğurla gənc rəssamların daha möhtəşəm və təsirli sənət əsərlərinin ərsəyə gələcəyini bildirən Cahid Cavadov "Gizli Dünyam" adlı fərdi sərgisində nümayiş olunan əsərləri ilə bağlı danışıb: “Ümumiyyətlə rəsm əsərləri hər bir insanda fərqli duyğular yarada bilər. Bu rəssamlığın ən gözəl hissəsidir. Budəfəki sərgimin mövzusu mənim gizli dünyamdan bəhs edir. Xüsusi konsept isə insanlarda gülüş və pozitiv enerji yaradan kloun personajıdır. Ancaq bu səfər əsərlərimdə klounlar sadəcə gülüş üçün deyil, eyni zamanda insanlara düşündürücü bir personaj kimi təqdim olunub. Mən inanıram ki, əsərlərdə bu hissi və emosiyanı onlara ötürə bilmişəm”.

Gənc rəssam dövlətin bu sahəyə dəstəyindən tam razıdır. Onun sözlərinə görə, azərbaycanlı rəssamlar tez-tez beynəlxalq tədbirlərə göndərilir, öz əsərlərini nümayiş etdirmək üçün sərgilər təşkil olunur.