Bakı, 15 mart (AZƏRTAC). Niderlandın Reysveyk şəhərində 8 Mart - Beynəlxalq Qadınlar Günü münasibətilə “Reysveyk şəhərinin 40 illik ictimai-siyasi həyatındakı fəal qadınlar” adlı yubiley almanaxının təqdimatı keçirilmişdir.

Şəhər bələdiyyəsinin başçısı xanım İnneke van der Velin və digər rəsmi qonaqların da iştirak etdikləri bu tədbiri Reysveyk şəhərinin “8 Mart” üzrə komissiyası təşkil etmişdir. Tədbirin əsas mövzusu qadınların 40 illik nailiyyətləri olmuşdur.

Toplantıda çıxış edən İnneke van der Vel qadınların 40 illik nailiyyətlərinə həsr edilmiş almanax barədə məlumat vermiş və bildirmişdir ki, burada mühüm uğurlar əldə etmiş xanımların həyat yolu və fəaliyyəti haqqında bilgilər yer almışdır. Bələdiyyə başçısı adı almanaxa daxil olunmuş qadınları təbrik etmiş və onlara hədiyyələr vermişdir. O demişdir ki, uğurları ilə fərqlənən 20 xanımın arasında iki azərbaycanlı qadının - jurnalist xanım Elnaz Sanginin və Niderlanddakı Azərbaycanlı Qadınlar Birliyinin sədri, yazıçı Gülşən Lətifxanın da adları vardır.

G.Lətifxan çıxışında bildirmişdir ki, Azərbaycan qadını ilk dəfə yalnız Şərqdə deyil, hətta bir çox Avropa ölkəsindən də əvvəl seçki hüququ əldə etmişdir. O demişdir: “Bizim qadınlar ana olmaqla bərabər, oxumağa, daim inkişaf etməyə də üstünlük verirlər, çünki qadının təhsilli olması onun uşaqlarının savadlı və parlaq gələcəyi deməkdir”. Niderland Azərbaycanlı Qadınlar Birliyinin sədri əlavə etmişdir ki, vaxtilə Azərbaycana qonaq gəlmiş Makedoniyalı İsgəndər və Aleksandr Düma Qarabağ şairi Natəvanla, cəsur şahzadə Tomrislə, qəhrəman hökmdar Nüşabə ilə tanışlıqdan məmnun olmuşlar. Bu tanışlıqlar haqqında bədii əsərlər yazılmış, əfsanələr eldən-elə, dildən-dilə dolaşmışdır. G.Lətifxan demişdir ki, Şərqin ilk diplomat qadını Sara Xatun da azərbaycanlıdır. Azərbaycanın müdrik və ulu anaları hər zaman ictimai işlərdə fəal olmuşlar və biz bu ənənələri daha da inkişaf etdirməyə çalışırıq.

######