Xəbər verdiyimiz kimi, iyunun 3-də Şahbuz rayonunda hərbçilər üçün tikilmiş bina istifadəyə verilmişdir.

Prezident İlham Əliyev bu münasibətlə keçirilən mərasimdə iştirak etmişdir.

Bina ilə tanış olan dövlətimizin başçısı, Ali baş komandan İLHAM ƏLİYEV yaradılmış şəraiti yüksək qiymətləndirdi, mənzillərin orderlərini hərbçilərə təqdim etdi və onlara xoş arzularını çatdıraraq dedi:

-Sizi ürəkdən təbrik edirəm. Siz Vətənə xidmət göstərirsiniz. Orduda xidmət etmək çox böyük şərəfdir, böyük məsuliyyətdir. Azərbaycan ordusu günü-gündən güclənir, möhkəmlənir və bu gün qarşıda duran bütün vəzifələri həll etməyə qadirdir. Bildiyiniz kimi, ordu quruculuğu bizim üçün prioritet məsələdir. Azərbaycanın siyasətində bu sahəyə diqqət həmişə yüksək olubdur. Bu gün də belədir və bildiyiniz kimi, büdcə xərclərində orduya ayrılan xərclər birinci yerdədir. Bu da təbiidir. Çünki biz müharibə şəraitində yaşayırıq, müharibə hələ bitməyibdir. Müharibənin birinci mərhələsi bitibdir və biz güclü olmalıyıq. Güclü ordumuz bizim qarşımızda duran bütün vəzifələri həll etməyimizə imkan verəcəkdir.

Ermənistan-Azərbaycan, Dağlıq Qarabağ münaqişəsi də yalnız Azərbaycanın ərazi bütövlüyü çərçivəsində həll ediləcəkdir. Buna heç kimin şübhəsi olmasın. Biz nə qədər güclü olsaq, o günü bir o qədər yaxınlaşdıracağıq. Mən inanıram və əminəm ki, Azərbaycan öz ərazi bütövlüyünü və suverenliyini bərpa edəcək, bütün soydaşlarımız - qaçqınlar, köçkünlər öz doğma torpaqlarına qayıdacaqlar. Bunu etmək üçün biz, əlbəttə ki, siyasi addımlar atırıq, öz diplomatiyamızı gücləndiririk və beynəlxalq təşkilatlarda Azərbaycanın mövqeyi böyük üstünlük təşkil edir. Son müddətdə BMT Baş Məclisində işğal olunmuş torpaqlarda yaranmış vəziyyətlə bağlı qətnamənin qəbul edilməsi Azərbaycanın gücünü göstərir. Dünya birliyi bizim haqlı olduğumuzu bir daha təsdiq edir. Ancaq diplomatik və siyasi addımlarla yanaşı, biz torpaqlarımızı hərbi yolla azad etməyə hər an hazır olmalıyıq və bunu etmək üçün bütün imkanlar var. Bir daha demək istəyirəm ki, bizim ordumuz bölgədə ən güclü ordudur. Orduda xidmət edən insanların peşəkarlıq səviyyəsi də günü-gündən artır.

Əlbəttə ki, orduda xidmət edən zabitlərin məişət şəraiti də yaxşı olmalıdır. Bu məqsədlə böyük işlər görülür. Həm zabitlərin sosial məsələləri həll edilir, həm də vaxtaşırı maaşlar artırılır. Bu gün bu gözəl binanın açılışı rəmzi xarakter daşıyır. Bu, Azərbaycan dövlətinin öz ordusuna olan münasibətinin əlamətidir. Burada yaxşı yaşamaq üçün, uşaqları tərbiyə etmək, istirahət etmək üçün bütün, gözəl şərait var. Mən əminəm ki, siz bu gözəl binada yaxşı yaşayacaqsınız, daha da yaxşı xidmət edəcəksiniz. Çünki mənə verilən məlumata görə, əvvəllər zabitlər kirayədə yaşayırdılar və hətta bəziləri hər gün Naxçıvandan buraya gəlirdilər. Bu, xərc idi və əlavə əziyyət idi. Burada isə bütün şərait var. Ona görə sizdən yalnız və yalnız bir şey tələb olunur - Vətənə sədaqətlə xidmət etmək.

Naxçıvan Azərbaycanın qədim torpağıdır, onun Azərbaycan tarixində və müasir həyatında xüsusi yeri vardır. Siz burada düşmənlə üz-üzəsiniz. Sizin üzərinizə çox böyük və şərəfli missiya, məsuliyyət düşür. Mən çox şadam ki, siz bütün işlərin öhdəsindən şərəflə gəlirsiniz.

Mən sizi bu gözəl binanın, istifadəyə verilməsi münasibətilə ürəkdən təbrik edirəm. Sizə cansağlığı, bütün işlərinizdə uğurlar arzulayıram. Sağ olun.

Hərbçi ailələri adından təşəkkürünü bildirən SAMİRƏ ORUCOVA dedi: - Cənab Ali baş komandan, biz zabit və gizir ailələrinə göstərdiyiniz bu diqqət və qayğıya görə Sizə dərin minnətdarlığımızı bildiririk. Bundan sonra da çalışacağıq ki, Sizin bizə göstərdiyiniz bu etimadın, dövlətimizin bizə göstərdiyi bu qayğının müqabilində Vətən qarşısında borcumuzu layiqincə, daha yüksək səviyyədə xidmətimizlə doğruldaq. Çox sağ olun.

######