REGİONLAR
Şəhidin təhsil aldığı məktəbdə xatirəsinə inşa edilən bulaq istifadəyə verilib
İmişli, 3 noyabr, Aydın Yavərzadə, AZƏRTAC
İmişli rayonunda 44 günlük Vətən müharibəsi zamanı şəhidlik zirvəsinə ucalan Nuriyev Vüqar Hafis oğlunun xatirəsinə inşa edilən bulaq kompleksinin açılışı olub.
AZƏRTAC-ın bölgə müxbiri xəbər verir ki, yeni inşa olunan bulaq Vüqar Nuriyevin təhsil aldığı məktəbdə tikilib. Bulağın açılışında İmişli Rayon İcra Hakimiyyətinin, hüquq-mühafizə orqanlarının əməkdaşları, ictimaiyyət nümayəndələri və şəhidin yaxınları iştirak ediblər. Tədbirdə öncə Dövlət Himni səsləndirilib, Vətənimizin bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad olunub.
Çıxış edənlər Ali Baş Komandan İlham Əliyevin rəhbərliyi ilə ötən ilin sentyabrın 27-də başlanan və Zəfərlə başa çatan Vətən müharibəsində qazanılan Qələbənin tarixi əhəmiyyətindən danışıb, Vüqar və onun kimi oğullarımızın xatirəsinin unudulmayacağını bildiriblər.
Həmçinin Vüqar Nuriyevin gənclərə nümunə olan qısa və şərəfli ömür yolundan söz açılıb. Qeyd olunub ki, Vüqar Vətən müharibəsi zamanı Füzulinin, Cəbrayılın, Qubadlının, Zəngilanın, Xocavəndin və Şuşanın azadlığı uğrunda gedən döyüşlərdə savaşıb. Şuşa döyüşləri zamanı qəhrəmancasına şəhid olub. Vəzifə borcunu şərəflə yerinə yetirdiyi üçün "Vətən uğrunda" və "Şuşanın azad olunmasına görə" medalları ilə təltif olunub.
Tədbirdə İmişli şəhər 3 saylı tam orta məktəbin şagirdləri şəhidlərimizə həsr olunan şeirlər səsləndiriblər.
Şəhidin təltif olunduğu medal atasına təqdim edilib.