Bakı, 31 avqust, AZƏRTAC

Tarixin müəyyən dövrlərində erməni terror təşkilatları türklərə qarşı ağır cinayətlər törədiblər. Hələ XX əsrin əvvəllərində dünyanın bir sıra ölkələrində, o cümlədən Amerika, Fransa, Böyük Britaniya və digər ölkələrdə türk diplomatları erməni terrorunun qurbanı olublar. Terror və qətl Ermənistanın siyasi xəttinin əsasını təşkil edib və bu siyasət bu gün də davam etdirilir.

Bu sözləri AZƏRTAC-a müsahibəsində Türkiyənin “Ulusal” kanalının siyasi şərhçisi Yakub Aslan deyib.

Onun sözlərinə görə, ötən əsrin əvvəllərində Yaxın Şərqə cəmləşən erməni terrorçuları fəaliyyətlərini davam etdirirlər. Azərbaycanın Livandakı səfirliyinə erməni əsilli məxluqların hücumu və diplomatik nümayəndəliyin dağıdılması da terror aksiyası kimi qiymətləndirilməlidir.

“SSRİ dağıldıqdan sonra tarixi şəraitdən istifadə edib müstəqil olan Ermənistan tarixi ənənələrini də bərpa etdi ki, bu ənənənin də əsasında terror siyasəti dayanır. Azərbaycanın Qarabağ bölgəsində Xocalı soyqırımı və buna bənzər digər terror aksiyaları ermənilərin əsl simasını əks etdirir. Bu gün rəsmi İrəvan məhz terror təşkilatlarına güvənərək regionda sabitliyi daim gərgin vəziyyətdə saxlamağa cəhd edir. Formal olaraq müstəqil dövlət olan, əslində isə korporativ maraqlara xidmət edən Ermənistan bir tərəfdən beynəlxalq aləmdə sərt qınağa səbəb olan diplomatik nümayəndəliyə qarşı terror aksiyasını dəstəkləyir, digər tərəfdən isə dünya ictimaiyyətinə yazıq və məzlum xalq olduğunu sırımağa çalışır. Əslində erməni xalqı dövlət rəsmilərinin apardığı siyasətin nəticəsində məzlum və yazıq günə düşüb. Xankəndiyə Azərbaycanın humanitar yardımını buraxmamaqla, oradakı insanları məhrumiyyət qarşısında qoyurlar. Digər tərəfdən isə dünyaya car çəkirlər ki, Azərbaycan Qarabağın erməni əhalisini blokadada saxlayır və onların ərzağa ehtiyacı var. Əgər doğrudan da erməni əhalisinin ərzağa ehtiyacı varsa, onda hansı məntiqlə Azərbaycanın yardımı əraziyə buraxılmır.

Azərbaycanın Livandakı səfirliyinə hücum edib diplomatik nümayəndəliyin binasını dağıtmaq erməni xalqına hansı hörməti gətirəcək? Bütün bunları nəzərdən keçirərək qeyd etmək lazımdır ki, Ermənistan hakimiyyəti yalnız bir məqsədə xidmət edir. Bu məqsəd isə regionda sülhün hökm sürməsinə imkan verməməkdən ibarətdir”, - deyə siyasi şərhçi vurğulayıb.

O qeyd edib ki, regionda marağı olan dövlətlərin sifarişini yerinə yetirməklə uzun müddət siyasi aktor kimi qalmaq mümkün deyil. Geosiyasi proseslərin nəticəsində regionda marağı olan dövlətlərin tələbatı ödəndikdən sonra Ermənistan yenə təklənəcək və özünü məzlum obrazına salıb təbliğata başlayacaq. Bu gün dünya sürətlə dəyişir, dövlətlər daha çox iqtisadi inkişafa və inteqrasiya proseslərinə can ataraq inkişaf edib irəli doğru getmək istəyindədirlər. Belə bir zamanda separatçılıq, terror və diplomatik nümayəndəliklərə hücumların təşkil edilməsi heç də xoş qarşılanmır.