SİYASƏT
Tanınmış Azərbaycan alimi və ictimai xadimi Tofiq Məliklinin 70 illiyi Moskvada təntənəli şəkildə qeyd olunmuşdur
Moskva, 1 oktyabr (AZƏRTAC). Moskvada, Mərkəzi Ədiblər Evində tanınmış Azərbaycan türkoloqu və ictimai xadimi Tofiq Məliklinin 70 illik yubileyi münasibətilə təntənəli tədbir keçirilmişdir. T.Məlikli görkəmli şərqşünas kimi təkcə Rusiyada və Azərbaycanda deyil, elmi əsərlərini ədəbiyyatına həsr etdiyi Türkiyədə də geniş tanınır. Tofiq Məlikli Azərbaycan diasporu və Rusiyanın elmi ictimaiyyəti arasında böyük nüfuz sahibi olan yaradıcı ziyalıların parlaq nümayəndələrindən biridir. O, Azərbaycanın Əməkdar Elm Xadimi, fəlsəfə elmləri doktoru, Ümumrusiya Azərbaycan Konqresinin vitse-prezidenti, “Ocaq” Azərbaycan Mədəniyyəti Cəmiyyətinin prezidenti, Azərbaycan Yazıçılar Birliyinin Moskva bölməsinin sədri, Beynəlxalq Türkologiya və Mədəniyyət Fondunun vitse-prezidenti, habelə Rusiya Dövlət Dilçilik Universitetinin professorudur. T.Məlikli ədəbiyyatşünaslığın aktual problemlərinə həsr olunmuş sanballı, elmi əsərlərin müəllifidir. “60-cı illərin əvvəlləri - 70-ci illərin axırları türk poeziyası”, “Nazim Hikmət və Türkiyənin yeni poeziyası” kitabları, habelə müasir türk ədəbiyyatının tarixinə həsr olunmuş 10-dan çox monoqrafiya onun qələminin məhsuludur.
Yubiley gecəsi “İnterAz” teleşirkətinin Tofiq Məlikli haqqında sənədli filmindən parçalar, habelə professorun həyat və fəaliyyətindən söz açan sənədli bioqrafik xronikadan foto və videomaterialların nümayişi ilə açılmışdır.
T.Məliklini yubiley münasibətilə təbrik edən Azərbaycanın Rusiyadakı səfiri Polad Bülbüloğlu çıxışında vurğulamışdır ki, Tofiq Məlikli kimi insanların Rusiyada yaşayıb-yaratması və Azərbaycanı təmsil etməsi çox sevindirici haldır. Səfir professor T.Məlikli haqqında filmi yüksək qiymətləndirərək demişdir ki, bizim Tofiq Məliklinin məsləhətinə və dəstəyinə həmişə ehtiyacımız vardır, çünki o, əsl ziyalı, Azərbaycan xalqının həqiqi nümayəndəsi, təkcə ailəsi üçün deyil, bütün xalqı üçün yanan böyük ürək sahibidir.
T.Məliklinin 1990-cı ilin Qanlı Yanvar hadisələrində barışmaz vətəndaşlıq mövqeyi nümayiş etdirdiyini xatırladan P.Bülbüloğlu onu böyük vətənpərvər kimi xarakterizə etmişdir.
Yubilyarı təbrik edən Azərbaycan Yazıçılar Birliyinin katibi, Xalq Yazıçısı Çingiz Abdullayev şəxsən öz adından və Azərbaycanın qalan səkkiz xalq yazıçısı adından ona arzu və istəklərini çatdırmış və xatirə hədiyyələri təqdim etmişdir.
Professorun Azərbaycan-Rusiya mədəniyyətlərarası münasibətlərinin inkişafına böyük töhfəsini vurğulayan Rusiya Yazıçılar İttifaqı İdarə Heyəti Şurasının katibi, “Moskovski literator” qəzetinin redaktoru İvan Qolubniçinin sözlərinə görə, Azərbaycan və Rusiya xalqları Böyük Vətən müharibəsinin döyüş meydanlarında qəhrəmanlıq yolu keçmişlər. Ölkələrimizin müasir münasibətləri də yüksək səviyyədədir. Rusiyada bunu çox qiymətləndirir və birgə uğurlara böyük dəyər verirlər. O, T.Məliklinin Rusiya və Azərbaycan xalqlarının mədəniyyətlərinin bir-birinə qarşılıqlı təsir göstərməsinə yönəlmiş geniş ictimai fəaliyyətinə, yazıçılıq və tərcüməçilik fəaliyyətinə görə yubilyara minnətdarlığını bildirmişdir.
Sonra Diasporla İş üzrə Dövlət Komitəsinin sədri Nazim İbrahimov, Yazıçılar Birliyinin sədri Anar, RF Dövlət Dumasının deputatı Lyudmila Şvetsova və Moskvadakı müxtəlif ictimai təşkilatların adından təbrik teleqramları oxunmuşdur.
Ümumrusiya Azərbaycan Konqresinin baş katibi Mikayıl Hüseynov təbrik nitqi ilə çıxış edərək Rusiyada Azərbaycan diasporunun mütəşəkkil olması işində, onun fəaliyyətinin təşkilində Tofiq Məliklinin böyük xidmətlərini vurğulamışdır. M.Hüseynov dahi Nizami Gəncəvinin yubileyi və əslən gəncəli olan Tofiq Məliklinin yubileyi arasında rəmzi paralel apararaq, yubilyarın Rusiyanın Əməkdar Rəssamı Əsgər Məmmədov tərəfindən məharətlə yerinə yetirilmiş möhtəşəm portretini ona hədiyyə etmişdir.
Mərkəzi Ədiblər Evinin Böyük salonunun səhnəsindən Tofiq Məliklini onun dostları və həmkarları, yazıçılar, ədəbiyyatşünaslar, ictimai xadimlər təbrik etmiş, Moskvanın qazax diaspor təşkilatının nümayəndəsi T.Məlikliyə milli qazax xalatı və papağı hədiyyə etmişdir.
Tədbir iştirakçılarına Azərbaycanın Əməkdar Artisti Mərdan Feyzullayevin quruluşunda tamaşa təqdim olunmuşdur. Rəsmi çıxışlar musiqi nömrələri və teatr kompozisiyaları ilə müşayiət olunmuşdur.
Gecədə vokalçıların respublika müsabiqəsinin qalibi, gənc müğənni Xəyalə Qafarzadə, Azərbaycanın Əməkdar Artisti Lalə Məmmədova çıxış etmiş, Moskva Dövlət Dilçilik Universitetinin Azərbaycan dilini öyrənən rusiyalı tələbələrinin və Azərbaycanın Əməkdar Artisti Qorxmaz Axundovun rəhbərliyi ilə Moskvadakı 157 nömrəli Azərbaycan etnomədəni ünsürlü orta məktəbin bədii kollektivinin ifasında Azərbaycan mahnıları səslənmişdir.
Gecənin iştirakçıları bir neçə mahnı, o cümlədən əfsanəvi Müslüm Maqomayevin repertuarından mahnıları məharətlə ifa etmiş gözəl səs sahibi Fuad Dadaşovu gurultulu alqışlarla mükafatlandırmışlar.
Asya Hacızadə
AZƏRTAC-ın xüsusi müxbiri
Moskva