MƏDƏNİYYƏT
Turizm bazarının liderləri Azərbaycana böyük ümidlər bəsləyirlər
Bakı, 17 fevral, Emil Eyyubov, AZƏRTAC
Fevralın 16-da “JW Marriott Absheron Baku” otelində “B2B Luxury & MICE Workshop” çərçivəsində dünya turizm bazarının aparıcı iştirakçılarının azərbaycanlı həmkarlarla görüşü keçirilib. Böyük Britaniyanın “TMI Consultancy” konsaltinq şirkətinin Azərbaycandakı tərəfdaşlarla birlikdə təşkil etdiyi seminar ölkəmizdə dəbdəbəli turizmin inkişafına yönəlmiş sayca 6-cı tədbirdir.
AZƏRTAC-ın müxbiri səyyar turizminin hazırda aktual olan istiqamətlərini öyrənmək üçün seminarda iştirak edib.
Almaniyada işgüzar turizm və Sinqapurda ailəvi istirahət
Seminarda Azərbaycanın lüks turizm seqmentinin 50-dən çox turizm şirkətinin əməkdaşları, xarici beşulduzlu otellərin, turizm operatorlarının, müxtəlif ölkə və regionların turizm ofislərinin nümayəndələri iştirak ediblər.
Layihənin rəhbəri Mariya Qorbaçovanın sözlərinə görə, bu tədbir bir növ biznes-platformadır. Səyyar turizmlə məşğul olan Azərbaycan şirkətləri bu platforma sayəsində xarici ölkələrdən olan tərəfdaşlarla birbaşa ünsiyyət saxlaya, əlaqələri genişləndirə, dünya bazarının ən müasir meyilləri ilə tanış ola bilərlər. Xarici qonaqlara isə azərbaycanlı turistlərin tələblərini mənbənin özündən öyrənmək imkanı verilir. M.Qorbaçova deyib: “Təsadüfü deyildir ki, indiki seminar Azərbaycanın səyyar turizm bazarının təqdimatından başlayıb. Azərbaycanın turizm agentliklərinin və “Qatar Airways” aviaşirkətinin nümayəndələrindən ibarət ekspert qrupu əcnəbi iştirakçıları yerli bazarın xüsusiyyətləri ilə tanış edib və onları maraqlandıran bütün suallara cavab verib”.
Xarici qonaqlar arasında çoxlu debütant olub. “B2B Luxury & MICE Workshop”da “Belmond“, “Grecotel” (Yunanıstan), “Kilit Hospitality Group” (Türkiyə), “Vichy Célestins Spa Hôtel” (Fransa) и “Intercontinental Hotel Vienna” (Avstriya) kimi məşhur otellər və otel şəbəkələri tədbirə ilk dəfə qatılıblar. Sinqapurdan “Travel Central” və Almaniyadan “T.I.M.E Europe” turizm operatorları da ilk dəfə iştirak ediblər.
“T.I.M.E Europe” şirkətinin baş direktoru Kirill Morunov deyib: “Biz əlaqədar auditoriyanın toplandığı bu tədbirin iştirakçılarından biri olduğumuza görə şadıq. Bu da çox vacibdir. Azərbaycanlı həmkarlarla söhbətlərimiz zamanı Almaniyanın turizm bazarının xidmətlərinə böyük tələbatın olduğuna bir daha əmin olduq. Yeganə çatışmayan cəhət bu idi ki, onların Almaniya bazarında azərbaycanlı turistlərin ehtiyaclarını və tələblərini başa düşən etibarlı tərəfdaşları yox idi. Şirkətimizdə əslən keçmiş Sovet İttifaqı ölkələrindən olan və Almaniyada yaşayan insanların işləməsi sayəsində biz Azərbaycandan olan həmkarlarımızla asanlıqla ümumi dil tapdıq və onların ümidlərini doğrultmağa hazırıq”.
K.Morunovun sözlərinə görə, son meyillərə gəldikdə isə Almaniyada işgüzar turizm - konqreslər, sərgilər, danışıqlar, müxtəlif tədbirlərdə iştirak etmək üçün səfərlər, biznesmenlər, o cümlədən Azərbaycanın iş adamları üçün maraq doğuran digər aktiv həyat tərzi növləri getdikcə daha aktual olur.
Sinqapur, əksinə, ailəvi turizmə üstünlük verir. “Travel Central” şirkətinin icraçı direktoru Natali Tay-Li deyib: “Ölkəmiz ailəliklə istirahət edənlərə geniş çeşiddə əyləncələr, o cümlədən “Universal Studios” kimi müxtəlif növ attraksionlardan ibarət nəhəng parklar, akvarium, zoopark, Sentoza tropik adasında müxtəlif əyləncələr və bir çox digər istirahət imkanları təklif edir. Bakirə təbiətlə əhatə olunmuş futuristik arxitekturanı da əlavə etsək, turizm istiqaməti kimi Sinqapurun populyarlığının səbəbləri aydın olar. Azərbaycanda bizim keyfiyyətli istirahətin dəyərini bilən auditoriyamız var”.
Sloveniyada müalicə və İsveçrədə əyləncə
Sloveniya tədbirdə yenə də geniş təqdim olunub: seminarda Sloveniya Milli Turizm Ofisi ilə birlikdə “Grand Hotel Sava Rogaška”, “Lifeclass Hotels & SPA”, “Sava Hotels & Resorts” otelləri və termal kurortları, “Rogaška” tibb mərkəzi, “Kompas” и “Renee Tours” şirkətləri təmsil olunub.
Sloveniya Milli Turizm Ofisinin satış üzrə meneceri Anya Bezqovşek əmindir: “Azərbaycanlı səyyahların Sloveniyaya azalmaq bilməyən marağının əsas səbəbi müalicəvi turizmdir. Sloveniyanın “Roqaşka-Slatina” balneoloji kurortunun xüsusi təqdimata ehtiyacı yoxdur. Bu, Avropada ən qocaman və məşhur spa-kurortlardan biridir. Sloveniyada müxtəlif təyinatlı 20 kurort var. Bu kurortlarda sağlamlığını bərpa etmək, yaxşı istirahət etmək, müalicəni yerli mədəniyyət, təbiət və mətbəxlə uyğunlaşdırmaq olar. Turizm şirkətləri nümayəndələrinin sözlərinə görə, Sloveniyada ilk dəfə olan səyyahların çoxu bura mütləq yenidən qayıdırlar.
Azərbaycandan olan keyfiyyətli istirahət həvəskarları üçün İsveçrə, xüsusən Cenevrə gölü regionu böyük maraq kəsb edir. Cenevrə gölü regionunun Turizm Ofisinin nümayəndəsi Yelena Bondarenkonun sözlərinə görə, Cenevrəyə gələn azərbaycanlı turistlər çox vaxt İsveçrənin qərbində yerləşən bu regionun incilərini görməyə can atırlar. Məsələn, fransızdilli Vo kantonunun paytaxtı olan Lozannada istirahət çox populyardır. Lozanna Cenevrə gölünün sahilində özünün tarixi və mədəniyyəti ilə böyük maraq doğuran son dərəcə mənzərəli yerdir. Onu dünyanın “Olimpiya paytaxtı” adlandırırlar. Beynəlxalq Olimpiya Komitəsinin və çoxsaylı beynəlxalq idman federasiyalarının qərargahları burada yerləşir. 1896-cı ildən keçirilən müasir Olimpiya Oyunlarının təşəbbüskarı baron Pyer de Kuberten əslən bu yerlərdəndir. 2015-ci ildə yenidən qurulmuş interaktiv Olimpiya Muzeyi də Lozannada yerləşir. 2016-cı ildə burada Çarli Çaplinin həyat və yaradıcılığına həsr olunmuş unikal “Chaplin's World” muzeyi açılıb. Ç.Çaplin Korse-syur-Vevedəki malikanəsində 20 ildən çox yaşayıb. “Chaplin's World” yeni tipli unikal müasir əyləncə kompleksidir. Müsafirlər ssenoqrafiya, kinematoqrafiya və multimedia elementlərinin birləşdirilməsi sayəsində keçmişə inanılmaz səyahət edirlər.
Y.Bondarenko deyib: “Bundan əlavə, Cenevrə gölü regionuna Alp dağlarındakı Villar, Qriyon və Diabler kurortlarında xizək sürmək üçün gəlirlər. Burada xizəksürmə mövsümü aprel ayınadək açıq olur və güzəştli qiymətlər təklif edilir. Yayda isə istirahət edənləri gözəl çimərliklər, akvaparklar və mənalı ailəvi istirahət üçün başqa imkanlar gözləyir”.
Seminarda İspaniyanın Kosta Blanka regionunun Turizm Ofisi və turistləri qəbul edən “Viajes Ancodes” şirkəti də təmsil olunub. “B2B Luxury & MICE Workshop” seminarına hər il qatılan Avropa “McArthurGlen” dizayner autletlərinin, İtaliyanın beşulduzlu “Duetorrihotels group” şəbəkəsinin, Xorvatiyanın “Losinj Hotels & Villas” eksklüziv lüks otellərinin nümayəndələri də Bakıda öz yeniliklərini təqdim ediblər.
Qonaqpərvərlik mühitində keçən seminar Azərbaycanın turizm bazarına böyük ümidlər bəsləyən iştirakçıların xoş ovqatı ilə yadda qalıb.