SİYASƏT
Ulu Öndər Heydər Əliyev Azərbaycanın gələcək inkişafının təməlini qoymuşdur
Bakı, 27 may (AZƏRTAC). Mayın 27-də Suraxanı rayonundakı Heydər Əliyev Mərkəzi və rayon icra hakimiyyətinin birgə təşkilatçılığı ilə 28 May - Respublika Günü münasibətilə “Heydər Əliyev və Azərbaycanın müstəqillik tarixi” mövzusunda tədbir keçirilmişdir.
AZƏRTAC xəbər verir ki, tədbir iştirakçıları əvvəlcə Heydər Əliyev parkında Ümummilli Liderin abidəsini ziyarət etmiş, Ulu Öndərin adını daşıyan Mərkəz ilə tanış olmuşlar.
Mərasimdə məruzə ilə çıxış edən rayon icra hakimiyyəti başçısının müavini Sevinc Hüseynova bildirmişdir ki, Azərbaycan Xalq Cümhuriyyətinin süqutundan sonra xalqımız 1991-ci ildə yenidən müstəqilliyini əldə etmişdir. Lakin həmin dövrdə ölkəmizə rəhbərlik edənlərin səriştəsizliyi, idarəçilik qabiliyyətlərinin yoxluğu, öz şəxsi ambisiyalarını dövlətin maraqlarından üstün tutmaları ölkəni ağır durumla üz-üzə qoymuşdur. Belə dözülməz vəziyyətdə xalqın təkidli tələbi ilə siyasi hakimiyyətə qayıdan ümummilli lider Heydər Əliyevin Azərbaycanın gələcək inkişafının təməlini qoymuşdur.
Vurğulamışdır ki, Ulu Öndərin şah əsəri olan müasir Azərbaycanımızdan tarixə nəzər salanda uğurlu daxili və xarici siyasət yürüdən ölkəmizin qazandığı möhtəşəm nailiyyətlər və beynəlxalq aləmdəki mövqeyi aydın görünür. Az vaxt ərzində ictimai, siyasi və iqtisadi həyatın bütün sahələrində əldə olunan müvəffəqiyyətlər beynəlxalq ictimaiyyəti heyran qoymuşdur.
Hazırda Azərbaycanın hər yerində gedən möhtəşəm quruculuq işləri, mədəniyyət, idman və digər sahələrdəki tərəqqi hər birimizdə qürur hissi doğurur. Bütün bunlar Heydər Əliyevin layiqli davamçısı Prezident İlham Əliyevin həm daxili, həm də xarici siyasətdəki səriştəsi, yüksək idarəetmə bacarığı, geniş biliyə sahib olması və analitik düşüncə tərzinin nəticəsində mümkün olmuşdur.
Vurğulanmışdır ki, Azərbaycanın birinci xanımı, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevanın rəhbərlik etdiyi Heydər Əliyev Fondunun həyata keçirdiyi mədəni-ictimai tədbirlər xalqımızın, dövlətimizin inkişafına, dövlətçiliyimizin möhkəmləndirilməsinə, Azərbaycanın dünya birliyində öz layiqli yerini tutmasına doğru istiqamətlənmişdir.
Bildirilmişdir ki, ümummilli lider Heydər Əliyev Azərbaycanın dövlət müstəqilliyinin dönməzliyini təmin etməklə yanaşı, millətimizin və dövlətimizin ideoloji xəttini, söykənəcəyi təməl prinsiplərini irs olaraq müəyyənləşdirmişdir. Ulu Öndər Azərbaycan xalqının inkişafı, gələcək tərəqqisi naminə Vətənimizin ən ağır və faciəli günlərində ona rəhbərliyi öz üzərinə götürərək misilsiz xidmətlər göstərməklə ölkəni parçalanaraq məhv olmaqdan xilas etmişdir.
Sonda Heydər Əliyev Mərkəzinin sifarişi ilə hazırlanmış “Tarixi yaradan şəxsiyyət” filmi nümayiş olunmuşdur.