Bakı, 1 sentyabr, AZƏRTAC

Mikrobiznes subyektləri üçün Vergi Məcəlləsinin təmin etdiyi güzəştlərdən biri də mikrosahibkarlıq subyekti olan hüquqi və fiziki şəxslərin sahibkarlıq fəaliyyətindən əldə etdikləri mənfəətin 75 faizinin mənfəət (gəlir) vergisindən azad edilməsidir. Bəs vergi ödəyicisinin mikrobiznes qrupuna aid olub-olmaması necə müəyyən edilir?

AZƏRTAC Dövlət Vergi Xidmətinə istinadla xəbər verir ki, mövzunu şərh edən maliyyə mütəxəssisi Vüqar Mirheydərov mikrosahibkarlıq subyektləri üçün güzəştlərin Vergi Məcəlləsində nəzərdə tutulduğunu bildirib.

O qeyd edib ki, biznes subyektlərinin qruplara bölünməsi Nazirlər Kabinetinin 2018-ci il 21 dekabr tarixli Qərarı ilə tənzimlənir. Burada iki meyar - işçilərin sayı və vergiödəyicisinin illik gəlirinin miqdarı nəzərə alınır. Həmin qərara əsasən, biznes subyektlərinin sərhədləri belə müəyyən edilib:

Mikrosahibkar: 1-10 işçi, illik gəliri 200 min manata qədər;

Kiçik sahibkar: 11-50 işçi, 200 min - 3 milyon manat arası illik gəlir;

Orta sahibkar: 51-250 işçi, 3 milyon - 30 milyon manat illik gəlir;

İri sahibkar: 250 nəfərdən çox işçi, 30 milyon manatdan çox illik gəlir.

Ümumilikdə, vergiödəyicisinin müəyyən bir qrupa aid olub-olmadığını müəyyən edərkən qeyd olunan iki meyardan daha böyük olan nəzərə alınır.

Məsələn, şirkətin illik gəliri 150 min manat, işçilərinin sayı 12-dir. Bu şirkət heç bir halda mikrobiznes qrupuna aid ola bilməz. Həmin sahibkarlıq subyekti kiçik biznesə aiddir. Bu isə həmin şirkətin mikrobiznes subyektləri üçün nəzərdə tutulmuş güzəştlərdən istifadə edə bilməyəcəyi mənasını verir.

V.Mirheydərovun sözlərinə görə, bu çox vacib məqamdır. Ona görə də hər hesabatda 75 faiz gəlir vergisinə güzəşt nəzərdə tutmaq sahibkarlar üçün mənfi hallar gətirə bilər. Əslində, hər bir güzəştdən istifadə etməzdən əvvəl həmin güzəştin həqiqətən biznes subyektinə aid olub-olmadığı ciddi şəkildə təhlil olunmalıdır. Əks halda, vergiödəyicisi maliyyə sanksiyaları ilə üzləşə bilər.