SİYASƏT


Pakistan mətbuatı: Azərbaycanda prezident seçkiləri demokratik və şəffaf keçib

İslamabad, 17 aprel, AZƏRTAC

Pakistanın nüfuzlu Associated Press of Pakistan (APP) agentliyində və “Daily Times” qəzetində “Azərbaycanda seçkilər: Prezident İlham Əliyev rəsmi şəkildə qalib elan olundu” və “İlham Əliyev səslərin 86,03 faizini toplayaraq növbəti müddətə Prezident seçildi” sərlövhəli məqalələr dərc olunub.

Yazılarda aprelin 11-də Azərbaycanda keçirilmiş prezident seçkiləri barədə ətraflı məlumat verilir. Mərkəzi Seçki Komissiyasının seçkilərin nəticələri ilə bağlı rəsmi protokolu və digər sənədləri ölkənin Konstitusiya Məhkəməsinə göndərdiyi diqqətə çatdırılır.

Associated Press of Pakistan agentliyinin Bakıya ezam olunmuş müxbirinin müxtəlif seçki məntəqələrində vətəndaşların sıraya düzülərək səs vermək üçün öz növbələrini gözlədiyinin şahidi olduğu vurğulanır. Bildirilir ki, səs verməyə gələn seçicilər APP-nin müxbirinə hazırkı dövlət başçısının apardığı siyasətdən razı olduqlarını və ölkənin onun rəhbərliyi altında davamlı şəkildə inkişaf etdiyini bildiriblər. Azərbaycanlıların əksəriyyəti İlham Əliyevin siyasətindən razıdır, çünki o, ölkəni inkişaf etdirir, Azərbaycana külli miqdarda xarici sərmayə cəlb etməyi bacarıb.

Məqalələrdə Azərbaycanda seçkilərə hazırlıqla bağlı görülən işlər barədə ətraflı məlumat verilir. Seçkilərin demokratik, şəffaf və ölkənin seçki qanunvericiliyinə uyğun şəkildə keçirildiyi diqqətə çatdırılır.

Qulu Kəngərli

AZƏRTAC-ın xüsusi müxbiri

İslamabad

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.