CƏMİYYƏT
Bu ilin payızında respublikada 921 min meyvə tinginin yetişdirilməsi planlaşdırılır
Bakı, 18 may, AZƏRTAC
Mayın 18-də Ekologiya və Təbii Sərvətlər Nazirliyində “Magistral avtomobil yollarının kənarında salınmış yaşıllıqlar, yaşköküstə ağacların köçürülməsi və dəniz suyunun duzsuzlaşdırılması” mövzusunda mətbuat konfransı keçirilib.
AZƏRTAC xəbər verir ki, konfransda nazirliyin “Azərbaycan Yaşıllaşdırma və Landşaft Quruluşu” Açıq Səhmdar Cəmiyyətinin sədri Ramik Əşrəfov və ekologiya və təbiəti mühafizə siyasəti şöbəsinin müdiri Rasim Səttarzadə iştirak ediblər.
R.Əşrəfov sədrlik etdiyi cəmiyyətin fəaliyyəti barədə məlumat verib. O bildirib ki, bu ilin dörd ayı ərzində 35 hektarda 16500 ağac əkilib. Zeytun, badam, nar, tut ağaclarından ibarət aqrobağlar salınıb. Əkilən ağaclar nazirliyin tinglik sahələrində yetişdirilib və bitiş faizi yüksəkdir. Hazırda yaşıllıq salınan ərazilərin 95 faizi damcılı suvarma sistemi ilə təchiz olunub ki, nəticədə bitiş 98 faiz təşkil edib. Bu ilin payızında 921 min meyvə tinglərinin yetişdirilməsi planlaşdırılır: “2018-2021-ci illər ərzində 1610,5 hektar sahədə yeni aqrobağların salınması nəzərdə tutulur. Hazırda tinglik sahələrində 2 milyon 535 min 870 müxtəlifcinsli ting mövcuddur”.
Nazirlik rəsmisi 2008-ci ildən etibarən respublikanın magistral avtomobil yollarının kənarlarında 4443 hektar ərazidə 5 milyon 439 min 580 müxtəlifcinsli ağac əkildiyini deyib: “Yaşıllaşdırma tədbirləri altı istiqamətdə aparılıb. Salınan yaşıllıq sahələrinin 2000 hektarından çoxunu zeytun ağacları təşkil edir. Belə ki, həmin ərazilərdə 1 milyon 300-dən çox zeytun ağacı yetişdirilib. Artıq 2016-2017-ci illərdə ilk məhsul da əldə olunub. Məhsulun 60 tonu emal müəssisələrinə verilib, 30 tondan çoxu toxum tədarükü üçün istifadə edilib. Ümumiyyətlə, heç vaxt ağac bitməyən, arid və tullantılarla çirklənmiş ərazilərdə yaşıllıqlar salınıb”.
R.Əşrəfov mətbuat konfransında yaşköküstə ağacların köçürülməsi məsələlərinə də toxunub. O deyib ki, həmin məqsədlə cəmiyyətin balansında 7 texnika var. Həmin texnikalar vasitəsilə yaşköküstə ağacları və kol bitkilərini ilin bütün fəsillərində onların bioloji inkişafına təsir etmədən köçürmək mümkündür. Köçürüləcək ağacların diametri 30 santimetrə, boyu 15-18 metrə kimi olarsa, proses zamanı itkilərə yol verilmir. Köçürülən ağacların bitiş faizi də 90-dan aşağı deyil.
Cəmiyyətin sədri bu ilin dörd ayı ərzində müxtəlif qurumlardan daxil olmuş müraciətlər əsasında 69 ağacın digər ərazilərə köçürüldüyünü qeyd edib. O bildirib ki, müraciətlər əsasən Xətai, Nərimanov və Yasamal rayonlarından olur. Ağacların yaşına, boyuna və köçürülmə məsafəsinə görə qiymətlər dəyişir. Bir ağacın köçürülməsi təxminən 50-60 manat təşkil edir. Nazirliyə müraciət edildikdə Ekspertiza İdarəsinin rəyi, tələbləri və “Azərbaycan Yaşıllaşdırma və Landşaft Quruluşu” Açıq Səhmdar Cəmiyyəti ilə bağlanmış müqavilə əsasında ağacların kök torpağı ilə birgə çıxarılaraq daha uyğun ərazilərə köçürülməsi təmin edilir.
Nazirliyin ekologiya və təbiətin mühafizə siyasəti şöbəsinin müdiri Rasim Səttarzadə Salyan rayonunun Xıdırlı kəndində yerləşən Xəzər Dənizinin Suyunun Duzsuzlaşdırılması Kompleksi haqqında məlumat verib. Qeyd edilib ki, kompleksə daxil olan Dəniz Suyunun Duzsuzlaşdırılması zavodunun sutkalıq gücü 2 min kubmetrdir. Müəssisədə 2013-cü ildən bu günədək 3 milyon 894 min 634 kubmetr həcmində dəniz suyu qəbul edilib və bundan 1 milyon 687 min 995 kubmetr həcmində təmiz su istehsal olunub.
O bildirib ki, kompleksə daxil olan ərazidə 4 hektar tinglik sahəsi salınıb: “Burada 1 milyondan çox müxtəlif cinsli əkin materialları yetişdirilir. Ötən ildən etibarən isə burada aqrobağların salınmasında istifadə etmək üçün müxtəlif meyvə tinglərinin yetişdirilməsinə başlanılıb”.
R.Səttarzdə istehsal olunan sudan Ələt-Salyan avtomobil yolunun ətrafında salınmış yaşıllıqların və kompleksin tərkibində yaradılmış tinglik sahələrinin suvarılmasında istifadə edildiyini də diqqətə çatdırıb.
“Bundan əlavə, Şirvan kollektoru üzərində də qurğular quraşdırılıb. Həmin qurğular vasitəsilə yaşıllıqların suvarılması üçün gündə 5 min kubmetr suyu duzsuzlaşdırmaq mümkündür. Beləliklə, müəssisənin istehsal gücü gündəlik 7 min kubmetrə bərabər olur. Duzsuzlaşdırılan sular vasitəsilə 700 hektar sahədə yaşıllıqlar salınıb. Lakin həmin sular min hektar ərazinin yaşıllaşdırılmasına da kifayət edər”, - deyə şöbə müdiri qeyd edib.
Sonda media nümayəndələrini maraqlandıran suallar cavablandırılıb.