CƏMİYYƏT


YAP gənclərinin iştirakı ilə “Dini mərasimlər: ənənəvilik və müasirlik” mövzusunda tədbir keçirilib

Bakı, 19 sentyabr, AZƏRTAC

Sentyabrın 19-da Azərbaycan Respublikası Dini Qurumlarla İş üzrə Dövlət Komitəsi (DQİDK) və Yeni Azərbaycan Partiyası Gənclər Birliyinin birgə təşkilatçılığı ilə “Dini mərasimlər: ənənəvilik və müasirlik” mövzusunda tədbir keçirilib.

AZƏRTAC xəbər verir ki, Dini Qurumlarla İş üzrə Dövlət Komitəsinin şöbə müdiri Amil Cavadov ölkəmizdə həyata keçirilən uğurlu dövlət-din, gənclər siyasəti barədə danışıb. Bildirilib ki, tədbirin əsas məqsədi gənclərin dövlət-din sahəsində həyata keçirilən siyasətə münasibətini öyrənməkdir. A.Cavadov qeyd edib ki, Azərbaycan dünyəvi dövlətdir və ölkəmizdə din dövlətdən ayrı olsa da, dövlət daim dini sahəyə, inanclı insanlara xüsusi diqqət və qayğı ilə yanaşır. Dövlətimizin başçısı mütəmadi olaraq din xadimləri ilə görüşür, dini konfessiyalara maddi yardımlar edilir, dini ibadət yerləri təmir-bərpa olunub inanclı insanların istifadəsinə verilir.

A.Cavadovun qeyd edib ki, dini icmalara maliyyə yardımının ayrılması, Mənəvi Dəyərlərin Təbliği Fondunun yaradılması Prezident İlham Əliyevin dinə və dindarlara, eləcə də mənəvi dəyərlərimizə diqqət və qayğısının bariz nümunəsidir.

Şöbə müdiri onu da vurğulayıb ki, insanlar, xüsusilə gənclər İslam dininin mahiyyətini anlamalıdırlar. Bunun üçün də oxumaq, dini bilgilərə yiyələnmək vacibdir. “Bəzi yerlərdə küçələrdə qara bayraqlar asırlar. Heç bilinmir ki, üstünə nə yazılıb. Azərbaycanın dövlət bayrağı var, bayrağımızın üzərində yaşıl rəng İslamın rəmzidir. Ona görə də hər yerdə Azərbaycan bayrağı asılmalıdır. Bunu təbliğ etmək lazımdır”, - deyə Amil Cavadov əlavə edib.

Daha sonra çıxış edən YAP Gənclər Birliyinin sədri Seymur Orucov bildirib ki, Azərbaycanda müxtəlif dinlərin nümayəndələri sərbəst şəkildə fəaliyyət göstərirlər. Azərbaycan tolerant dövlətdir, ona görə də ölkədə dini ayrı-seçkilik yoxdur. Bu da Azərbaycan dövlətinin özünəməxsusluğudur. Azərbaycan parlamentinin üzvləri arasında xristian və digər dinlərin nümayəndələrinin olduğunu diqqətə çatdıran S.Orucov ölkəmizin hər zaman tolerantlıq prinsiplərinə sadiq qaldığını bildirib. Bütün bunlar ulu öndər Heydər Əliyevin azərbaycançılıq ideologiyasının əsasını təşkil edir. Hər kəs bilməlidir ki, radikallığın sonu uçurumdur. Ölkə gəncləri yan təsirlərə meyillənməməlidirlər. O qeyd edib ki, Azərbaycanda din və dövlət münasibətləri ilə bağlı təkmil qanunvericilik bazası mövcuddur.

DQİDK-nın təhlil və proqnozlaşdırma şöbəsinin müdiri Elnarə Kərimova isə qeyd edib ki, xalqımızın milli adət-ənənələri, əxlaqi, mənəvi dəyərləri onun qədim tarixə malik zəngin mədəniyyətinin və zəngin mənəviyyatının göstəricisidir. Hər bir xalqın adət-ənənələri onun mənsub olduğu dinlə sıx bağlıdır. E.Kərimova vurğulayıb ki, İslam dini Azərbaycan xalqının milli-mənəvi dəyərlərində, dünyagörüşündə, həyat tərzində, adət-ənənələrində dərin izlər buraxıb. Zaman keçdikcə, cəmiyyət dəyişdikcə, sadəcə, din və onun qayda-qanunları, hökmləri dəyişilməz qalır. Şöbə müdirinin sözlərinə görə, adət-ənənələr, mərasimlər isə zamanla dəyişir, müasir dövrün tələbinə uyğunlaşır, yeni forma və məzmun kəsb edir. O deyib: “Dini mərasimlər dinimizi, tariximizi, mədəniyyətimizi, ənənələrimizi, həyat tərzimizi əks etdirməlidir. Düzgün maariflənmə, fərdi şəkildə xurafatla mübarizə, elmimizin və mənəviyyatımızın paralel inkişafı dinimizi xurafatdan, mövhumatdan qoruya və gələcək nəsillərə ötürə bilər”.

Azərbaycan İlahiyyat İnstitutunun prorektoru Aqil Şirinov çıxışında ölkəmizdə mövcud olan multikulturalizm dəyərlərindən bəhs edib. Multikulturalizm və tolerantlığın xalqımızın həyat tərzi olduğunu diqqətə çatdıran A.Şirinov vurğulayıb ki, ölkəmiz dünyada müxtəlif sivilizasiyaların qovuşduğu məkan olaraq, milli-mədəni rəngarənglik mühitinin formalaşdığı, ayrı-ayrı millətlərin və konfessiyaların nümayəndələrinin sülh, əmin-amanlıq, qarşılıqlı anlaşma şəraitində yaşadığı diyar kimi tanınır. Xalqımızın hər zaman milli və dini adət-ənənələrinə sadiqlik nümayiş etdirdiyini bildirən A.Şirinov aşuranın tarixindən də danışıb. O, eyni zamanda, vurğulayıb ki, aşura mərasimləri Qafqaz Müsəlmanları İdarəsinin fətvasına uyğun keçirilməlidir.

Azərbaycan İlahiyyat İnstitutu barədə də məlumat verən prorektor bildirib ki, adıçəkilən ali məktəbin yaradılmasında məqsəd Azərbaycan xalqının tarixi ənənələrinə söykənən və dövlət siyasətinin məntiqi nəticəsi olan yüksək dini-mənəvi mühitin qorunub saxlanılmasını və inkişaf etdirilməsini, dini fəaliyyətin təşkili sahəsində yüksək ixtisaslı kadrların hazırlanmasını təmin etməkdir.

Tədbir iştirakçıların suallarının cavablandırılması ilə yekunlaşıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.