ELM VƏ TƏHSİL


Azərbaycanın enerji siyasətinin düzgün qurulması dövlət müstəqilliyinin taleyində önəmli rol oynayıb

Bu fikir Bakı Slavyan Universitetində “Azərbaycanın enerji siyasəti” mövzusunda keçirilən seminarda səsləndirilib

Bakı, 21 dekabr, AZƏRTAC

Bakı Slavyan Universitetinin (BSU) diplomatiya və xarici siyasət kafedrasının təşkilatçılığı ilə “Azərbaycanın enerji siyasəti” mövzusunda seminar keçirilib.

BSU-dan AZƏRTAC-a bildirilib ki, tədbirdə çıxış edən elmi işlər üzrə prorektor, professor Rafiq Novruzov enerji siyasətinin bugünkü dünyada həlledici faktorlar sırasında olduğunu bildirib. O, Azərbaycanın enerji siyasətinin düzgün qurulmasının dövlət müstəqilliyinin taleyində önəmli rol oynadığını deyib.

Kafedranın müəllimi Aygün Əliyeva müstəqillik dövründə Azərbaycanın neft və qaz strategiyası barədə geniş məruzə ilə çıxış edib. O, 1990-cı illərin əvvəllərində ölkədə baş verən qarşıdurmalar ucbatından Azərbaycan neftinin və qazının dünya bazarına çıxarılması sahəsində ciddi problemlər yaşandığını bildirib. Məruzəçi yalnız ümummilli lider Heydər Əliyevin xalqın iradəsi, çağırışı və təkidi ilə 1993-cü ildə hakimiyyətə qayıdışından sonra Azərbaycanın siyasi və iqtisadi həyatında taleyüklü dəyişikliklərin başlandığını, ölkənin beynəlxalq aləmlə münasibətlərinin qaydaya düşdüyünü, enerji sahəsində dövlətin müstəqil siyasətinin formalaşdığını qeyd edib. O, 1994-cü ildə imzalanan “Əsrin müqaviləsi”nin sonradan dünyanın 19 ölkəsinin 41 neft şirkəti ilə 30-dək sazişin ərsəyə gəlməsinə yol açdığını diqqətə çatdırıb. A.Əliyeva "Əsrin müqaviləsi"nin həm karbohidrogen ehtiyatlarının miqdarına, həm də qoyulan sərmayələrin həcminə görə dünyada bağlanan ən iri sazişlər siyahısına daxil olduğunu deyib. A.Əliyeva, həmçinin “Əsrin müqaviləsi”nin Azərbaycanı dünyaya çıxardığını, ölkəyə investisiya axınına şərait yaratdığını nəzərə çatdırıb. O əlavə edib ki, beynəlxalq neft sazişlərinin imzalanması neft sazişlərində iştirak edən şirkətlərin dövlətləri ilə səmərəli və qarşılıqlı faydalı əməkdaşlığın inkişafı, ölkənin geosiyasi mövqeyinin daha da möhkəmlənməsi, dünya iqtisadiyyatına inteqrasiya prosesinin sürətlənməsi üçün şərait yaradıb. Məruzəçi bu gün Azərbaycanın regionun lider dövləti olmasında bünövrəsi Ümummilli Lider tərəfindən qoyulmuş enerji siyasətinin son dərəcə böyük rol oynadığını bir daha qeyd edib.

Sonra məruzə ətrafında diplomatiya və xarici siyasət kafedrasının müdiri, dosent Əsgər Əhməd, beynəlxalq münasibətlər və regionşünaslıq fakültəsinin dekanı, dosent Şirinbəy Əliyev və azərbaycanşünaslıq elmi-tədqiqat laboratoriyasının müdiri, dosent Sadir Məmmədov çıxış ediblər.

Seminarda iştirak edən tələbələrlə müəllimlər arasında mövzu ilə bağlı diskussiyalar olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.