Prezident İlham Əliyevin rəhbərliyi ilə həyata keçirilən islahatlar əhalinin həyat səviyyəsinin yüksəlməsinə xidmət edir

09.04.2019 [16:58]
Çap et
A⁺ A^-

Bakı, 9 aprel, AZƏRTAC

Azərbaycanda davamlı iqtisadi inkişafın sürətləndirilməsi nəticəsində maliyyə imkanlarının genişlənməsi sosial sahədə dövlət siyasətinin daha uğurla reallaşdırılmasını təmin edir. Prezident İlham Əliyevin rəhbərliyi ilə həyata keçirilən genişmiqyaslı sosial-iqtisadi islahatlar hər bir vətəndaşın gündəlik həyatına müsbət təsir göstərməklə yanaşı, cəmiyyətin həssas təbəqəsinin, xüsusilə də məcburi köçkünlərin yaşayış şəraitinin daha da yaxşılaşmasına səbəb olub.

Bu sözləri AZƏRTAC-a müsahibəsində Azərbaycan Respublikasının Prezidenti yanında Dövlət İdarəçilik Akademiyasının (DİA) dekanı, iqtisad elmləri doktoru, professor Xatirə Hüseynova deyib.

Son aylarda əhalinin rifahına birbaşa təsir göstərən sosial xarakterli bir çox tədbirlərin gerçəkləşdiyini deyən X.Hüseynova qeyd edib ki, bu islahatların əsas hədəfləri Azərbaycanı inkişaf etmiş ölkəyə çevirmək, əhalinin həyat səviyyəsini yüksəltməkdir. Qarşımızda duran bütün vəzifələri icra etmək üçün güclü iqtisadiyyat olmalıdır. Bu məqsədə nail olmaq üçün regionalın sosial-iqtisadi inkişaf proqramları icra edilir. Artıq üçüncü Dövlət Proqramının icrası başa çatıb, dördüncü Proqram təsdiqlənib. Qarşıdakı illər üçün nəzərdə tutulan bu sənəddə əksini tapan vəzifələrin uğurla həyata keçirilməsi müəyyənləşdirilən hədəflərə yüksək səviyyədə nail olmağa əsas yaradacaq. Regionlar arasında sağlam rəqabət daha da güclənəcək, Azərbaycanın hər bir bölgəsi, kəndi, qəsəbəsi davamlı inkişafı ilə diqqətdə olacaq.

Prezident İlham Əliyevin ötən aylarda sosial sahədə qəbul etdiyi mühüm qərarlar birdəfəlik ödəmə alacaq şəhid ailələrinin əhatə dairəsinin genişləndirilməsi ilə başladı. Ötən il aprelin 11-də keçirilən seçkilərdə inamlı qələbə qazanan dövlətimizin başçısı növbəti prezidentlik müddətində imzaladığı ilk Fərman da məhz şəhid ailələrinin sosial müdafiəsi ilə bağlı idi. 2018-ci il 19 aprel tarixli həmin Fərmana əsasən şəhid hərbi qulluqçuların vərəsələrinə 11 min manat məbləğində birdəfəlik ödəmələrin verilməsi nəzərdə tutulurdu. Həmçinin Prezident İlham Əliyevin bu il yanvarın 30-da imzaladığı digər Fərmanla şəhid ailələri üçün Prezident təqaüdünün aylıq məbləği 58 manat artırılaraq 300 manat oldu, məcburi köçkünlərə verilən aylıq müavinətlər də 50 faiz artırıldı. Dövlətimizin öz vətəndaşına qayğısının digər nümunəsi isə minimum aylıq əməkhaqqının artırılmasıdır. Bu il fevralın 8-də imzalanan Sərəncamla ölkə üzrə minimum əməkhaqqı 50 manat (38,5 faiz) artırılaraq 180 manat səviyyəsinə çatdırıldı.

Son illərdə Azərbaycan iqtisadiyyatının bütün sahələrində, o cümlədən inşaat sektorunda əhəmiyyətli inkişaf müşahidə olunur, şəhərsalma və tikinti sahələrində irihəcmli investisiyaların böyük hissəsi çoxmənzilli yaşayış binalarının tikintisinə istiqamətləndirilir. Digər bir qərar Prezident İlham Əliyevin fevralın 19-da imzaladığı “Bəzi çoxmənzilli binaların istismarına icazə verilməsinin sadələşdirilməsi haqqında” Fərmandır. Bu Fərman təxminən 400 çoxmənzilli binanın sənədləşməsi məsələsində yaranmış çətinliklərin aradan qaldırılmasını nəzərdə tutur.

Bir neçə il bundan əvvəl dünya iqtisadi böhranı Azərbaycan iqtisadiyyatına da təsirsiz ötüşmədi. Əhalinin sosial cəhətdən həssas qrupunun ödəmə qabiliyyətinin zəifləməsinə səbəb oldu, nəticədə kredit təşkilatlarından borc alan vətəndaşların bank sistemi qarşısında öhdəliklərinin yerinə yetirilməsində çətinliklər yarandı. Dövlətimizin başçısı bu il fevralın 28-də vətəndaşların kredit probleminin həlli üçün “Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Fərman imzaladı. Bu Prezident İlham Əliyevin vətəndaşlarına olan qayğısının digər bir əyani sübutudur.

Bir sözlə, dövlətimizin başçısı tərəfindən siyasi, iqtisadi, sosial, məhkəmə-hüquq, təhsil, səhiyyə sahələrində aparılan islahatlar ölkəmizin daha da inkişafına rəvac verir. Bütün bunlar isə onu göstərir ki, Prezident İlham Əliyevin həyata keçirdiyi islahatlar məhz dövlətimizin və xalqımızın maraqlarına xidmət edir.

SİYASƏT

Prezident İlham Əliyevin rəhbərliyi ilə həyata keçirilən islahatlar əhalinin həyat səviyyəsinin yüksəlməsinə xidmət edir

MÜƏLLİFLƏ ƏLAQƏ

Bölmənin digər xəbərləri