Bakı, 6 may, AZƏRTAC 

Qazaxıstanın paytaxtı Nur-Sultan şəhərində Rus Dili və Ədəbiyyatı Müəllimləri Beynəlxalq Assosiasiyasının (MAPRYAL) XIV konqresi və baş assambleyası keçirilib. Konqresdə Bakı Slavyan Universitetini (BSU) prorektorlar Telman Cəfərov, Rafiq Novruzov, ədəbiyyat nəzəriyyəsi və dünya ədəbiyyatı kafedrasının professoru Rəhilə Quliyeva təmsil ediblər. Ümumilikdə 49 ölkənin təmsil olunduğu tədbirin açılışında Qazaxıstan və Rusiyanın rəsmiləri iştirak edib, hər iki ölkənin dövlət və hökumət başçılarının təbrik məktubları oxunub.

BSU-dan AZƏRTAC-a bildirilib ki, professorlar Telman Cəfərov və Rafiq Novruzov MAPRYAL-ın prezidenti akademik L.Verbitskayanın hesabatının dinlənildiyi, yeni prezidentin, vitse-prezidentlərin, növbəti – XV konqresə ev sahibliyi edəcək şəhərin, rəyasət heyəti üzvlərini müəyyən edildiyi baş assambleyada iştirak ediblər. Rusiya prezidentinin rus dilinin inkişafı üzrə məsləhətçisi, L.Tolstoyun nəticəsi P.Tolstoy MAPRYAL-ın yeni prezidenti seçilib.

Assosiasiya prezidentinin hesabat məruzəsində və BSU nümayəndələrinin çıxışlarında Azərbaycanda keçirilən tədbirlər, xüsusilə də BSU və MAPRYAL-ın təşkil etdiyi birgə elmi konfrans, seminar və ixtisasartırma tədbirləri yüksək qiymətləndirilib. Son üç ildə davamlı olaraq respublikada rus dilinin tədrisinə, rusdilli təhsilə, Rusiya–Azərbaycan əlaqələrinin inkişafına və qorunmasına verdiyi töhfələr nəzərə alınaraq BSU-nun rektoru, professor Nurlana Əliyevanın MAPRYAL-ın prezidenti, milli assosiasiyaların rəhbərləri, tanınmış elm və təhsil xadimləri tərəfindən qurumun rəyasət heyətinə üzvlüyə namizədliyi irəli sürülüb və səs çoxluğu ilə qəbul edilib. Gizli səsvermə nəticəsində XV konqresin Sankt-Peterburqda keçirilməsi qərara alınıb.

“Çoxdilli dünyada rus sözü” adı altında keçirilən XIV konqres 14 elmi-metodik istiqamət (bölmə) və 6 dəyirmi masada 500-dən çox məruzə, çıxış və təqdimatı əhatə edib. Rus dili və ədəbiyyatının tədqiqi, tədrisi, dünyada rus dilli təhsilinin vəziyyəti və perspektivləri, problemləri, internet resursları, distant təhsil kimi ənənəvi elmi-nəzəri və elmi-praktik istiqamətlərlə yanaşı, müasir çoxdillilik və çoxmədəniyyətlilik şəraitində bilinqval və polilinqval təhsil modellərinin tətbiqi təcrübəsi, sosial-pedaqoji-psixoloji və linqvodidaktik əsasları, milli zəmində gənc nəslə multikultural dəyərlərin aşılanması və s. kulturoloji məsələlər müzakirə olunub.